PAGBASA GIKAN SA UNANG SULAT NI SAN PEDRO
1 Pt. 1:18-25
Kay nasayran ninyo nga ang gibayad aron pagluwas kaninyo gikan sa daotang pagkinabuhi nga inyong nasunod sa inyong mga katigulangan, dili butang nga kawad-an ug bili sama sa salapi o bulawan. Kay giluwas naman kamo sa bililhong dugo ni Cristo kinsa sama sa nating karnero, walay buling o mansa. Gipili siya sa Dios sa wala pa buhata ang kalibotan, ug gipadayag siya niining kataposang mga adlaw tungod kaninyo. Pinaagi Kaniya nagtuo kamo sa Dios nga maoy nagbanhaw ug nagpasidungog kaniya aron ang inyong pagtuo ug paglaom adto ninyo ibutang sa Dios. Karon nga nahinlo na kamo pinaagi sa inyong pagsunod sa kamatuoran, ug may matinud-anon nang gugma alang sa inyong isigka-magtutuo, paghigugmaay kamo sa kinasingkasing gayod. Kay kamo gipanganak pag-usab dili pinaagi sa tawo kondili pinaagi sa buhi ug walay kataposan nga pulong sa Dios. Kay nag-ingon ang kasulatan, "Ang tanang mga tawo sama sa bailli, Ug ang tanan nilang katahom sama sa bulak niini; Ang bailli mamatay ug malarag ang bulak niini, Apan ang pulong sa Dios magpabilin hangtod sa kahangtoran."
ANG PULONG SA GINOO.
SALAMAT SA DIOS.
SALMO RESPONSORYO
Ps. 147:12-13, 14-15, 19-20
R. Dayga ang Ginoo, Jerusalem.
Dayga ang Ginoo, O Jerusalem; dayga ang imong Dios, O Sion. Kay iyang gilig-on ang mga trangka sa imong mga ganghaan; iyang gipanalanginan ang imong mga anak sulod kanimo. (R)
Gitugot niya ang kalinaw sulod sa imong mga utlanan; gibuhong ikaw niya sa labing maayong trigo. Gipadala niya ang iyang sugo ngadto sa yuta; makusog ang pagdagan sa iyang pulong. (R)
Iyang gisangyaw ang iyang pulong ngadto kang Jacob, ang iyang mga balaod ug mga gimbut-an ngadto kang Israel. Wala siya maghimo sa ingon sa Iaing nasod; wala niya ipahibalo ang iyang mga kasugoan ngadto kanila. Aleluya. (R)
BERSO SA DILI PA ANG EBANGHELYO
Mk. 10:45
Aleluya! Ang Anak sa Tawo wala moanhi aron alagaran, kondili sa pag-alagad ug paghatag sa iyang kinabuhi aron pagtubos sa daghang mga tawo. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 10:32-45
Diha na sila sa dalan paingon sa Jerusalem. Nag-una si Jesus sa iyang mga tinun-an, ug nahingawa sila pag-ayo; nangahadlok ang mga tawo nga nagsunod kaniya. Gilain na usab pagpundok ni Jesus ang iyang mga tinun-an ug gisultihan niya sila bahin sa mga butang nga mahitabo kaniya. "Pamati kamo," matud ni Jesus, "nagpadulong kita sa Jerusalem ug itugyan ang Anak sa Tawo ngadto sa kadagkoan sa mga pari ug sa mga magtutudlo sa Balaod. Hukman nila siya sa kamatayon ug unya itugyan ngadto sa mga dili Judio. Siya ilang bugalbugalan, lud-an, latuson, ug unya patyon. Apan mabanhaw siya sa ikatulo ka adlaw." Unya si Santiago ug si Juan, mga anak ni Sebedeo, miduol kang Jesus ug miingon, "Magtutudlo, aduna kami ipabuhat kanimo." "Unsa may ipabuhat ninyo kanako?" nangutana si Jesus kanila. Mitubag sila, "Kon molingkod ka na unya sa imong trono didto sa imong Gingharian nga mahimayaon, palingkura kami uban kanimo: ang usa sa imong tuo ug ang usa sa imong wala." Miingon si Jesus kanila, "Wala kamoy kalibotan sa inyong gipangayo. Makainom ba kamo sa kupa sa pag-antos nga akong imnan? Makapabunyag ba kamo sa paagi nga ako bunyagan?" "Oo," mitubag sila. Miingon si Jesus kanila, "Makainom gayod kamo sa kupa nga akong imnan ug makapabunyag kamo sa paagi nga ako bunyagan. Apan wala akoy katungod sa pagpili kon kinsa ang palingkuron sa akong tuo ug sa akong wala. Ang Dios mao ang mohatag niining mga dapita ngadto sa gitagan-an niini." Sa pagkabati niini sa napulo ka tinun-an, nangasuko sila kang Santiago ug kang Juan. Tungod niini, gipaduol silang tanan ni Jesus ug giingnan, "Nasayod kamo nga ang mga punoan sa mga tawo naghari kanila, ug ang mga pangulo nagmando kanila; apan kaninyo dili kini mao ang paagi. Kon usa kaninyo buot madakong tawo, kinahanglan nga mag-alagad siya sa tanan; ug ang buot nga mahimong labaw sa tanan, kinahanglan nga siya magpaulipon sa tanan. Kay bisan gani ang Anak sa Tawo wala moanhi aron alagaran, kondili sa pagalagad ug paghatag sa iyang kinabuhi aron pagtubos sa daghang mga tawo."
ANG EBANGHELYO SA GINOO.
DAYGON IKAW, O KRISTO.
