PAGBASA GIKAN SA MGA BUHAT SA MGA APOSTOLES
Acts 15:1-6
May pipila ka tawo nga nangabot sa Antioquia, gikan sa Judea, ug nanudlo sila sa mga kaigsuonan. Sila nag-ingon, "Dili kamo maluwas gawas kon modawat kamo sa seremonyas sa pagtuli sumala sa gisugo sa Balaod ni Moises." Kining pagtulon-ana gisupak pag-ayo ni Pablo ug ni Bernabe; busa gikauyonan nga Si Pablo ug Si Bernabe ug pipila ka mga tinun-an sa Antioquia mangadto sa Jerusalem ug makigkita sa mga apostoles ug sa mga kadagkoan bahin niining butanga. Busa gipagikan sila sa simbahan, ug sa ilang pag-agi sa Fenicia ug sa Samaria gitaho nila ang pagkakabig sa mga dili Judio ngadto sa Dios; kining balitaa nakalipay pag-ayo sa mga kaigsuonan. Pag-abot nila sa Jerusalem gidawat sila sa simbahan, ug sa mga apostoles, ug sa mga pangulo sa simbahan ug ilang gisuginlan sila sa tanang gibuhat sa Dios pinaagi kanila. Apan may mga magtutuo nga sakop sa pundok sa mga Pariseo nga mibarog ug miingon, "Kinahanglan gayod nga tulion sila ug patumanon sa Balaod ni Moises." Ang mga apostoles ug ang mga kadagkoan nagtigom aron paghusay niining butanga.
ANG PULONG SA GINOO.
SALAMAT SA DIOS.
SALMO RESPONSORYO
Ps. 122:1-2, 3-4, 4-5
R. Nalipay ako nga giingnan ako nila: mangadto na kita sa balay sa Ginoo. / R. Aleluya.
Nalipay ako kay giingnan ako nila, "Mangadto na kita sa balay sa Ginoo." Ug karon nagabarog na kami sulod sa imong mga ganghaan, O Jerusalem. (R)
Jerusalem, nga gitukod ingon usa ka siyudad nga gipundok sa kahiusa. Ngadto kaniya nanungas ang mga tribo, ang mga tribo sa Ginoo. (R)
Sumala sa kasugoan alang sa Israel, aron pagpasalamat sa ngalan sa Ginoo. Diha kaniya gipabarog ang mga lingkoranan sa hukmanan, ang mga lingkoranan alang sa balay ni David. (R)
BERSO SA DILI PA ANG EBANGHELYO
Jn. 15:4a, 5b
Aleluya! Pabibilin kamo kanako ug ako magpabilin kaninyo. Ang magpabilin kanako ug ako diha kaniya mamungag daghan. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 15:1-8
Si Jesus miingon sa iyang mga tinun-an, "Ako ang matuod nga punoan sa paras, ug ang akong Amahan maoy tig-atiman. Putlon niya ang tanang sanga nga dili mamunga ug pul-ongan niya ang tanang sanga nga mamunga aron kini mahinlo ug mamungag daghan. Nahinlo na kamo pinaagi sa mga pulong nga akong gisulti kaninyo. Pabilin kamo kanako ug ako magpabilin kaninyo. "Gawas kon magpabilin kamo kanako, dili kamo makabunga, ingon nga usa ka sanga dili makabunga gawas kon magpabilin kini sa punoan." "Ako ang punoan sa paras, ug kamo ang mga sanga. Ang magpabilin kanako ug ako diha kaniya mamungag daghan; kay kon wala ako wala kamoy mahimo. Ang dili magpabilin kanako mahisama sa usa ka sanga nga ibalibag ug malaya; pamuniton kini ug dauban. Kon magpabilin kamo kanako ug ang akong mga pulong magpabilin kaninyo, makapangayo kamog bisan unsa ug madawat ninyo kini. Sa inyong pagpamungag daghan kapasidunggan ang akong Amahan, ug sa ingon niini kamo mahimong akong mga tinun-an."
ANG EBANGHELYO SA GINOO.
DAYGON IKAW, O KRISTO.
