PAGBASA GIKAN SA MGA BUHAT SA MGA APOSTOLES
Acts 14:19-28
Pipila ka mga Judio nangabot gikan sa Antioquia sa Pisidia, ug gikan sa Iconio; nadani nila ang mga tawo ug gibato nila si Pablo ug giguyod ngadto sa gawas sa lungsod; nagdahom sila nga patay na siya. Apan sa dihang gialirongan siya sa mga magtutuo, mibangon siya ug mibalik sa lungsod. Pagkasunod adlaw siya ug si Bernabe nangadto sa Derbe. Nagwali sa Maayong Balita si Pablo ug si Bernabe didto sa Derbe, ug nakakabig sila og daghang mga tinun-an. Unya namalik sila sa Listra, unya sa Iconio, ug dayon sa Antioquia sa Pisidia. llang gilig-on ang mga magtutuo ug gidasig nga magpadayon sa pagtuo. Nanudlo sila sa pag-ingon, "Kinahanglan moagi kita sa daghang mga kalisdanan aron makasulod sa gingharian sa Dios." Sa matag simbahan nagtudlo sila og mga pangulo; ug uban sa mga pag-ampo ug pagpuasa ilang gitugyan sila ngadto sa Ginoo nga ilang gisaligan. Unya milatas sila sa Pisidia ug miabot sa Pampilia. Giwali nila ang mensahe sa Ginoo didto sa Perga ug unya mipatighulog sila ngadto sa Atalia. Gikan didto milawig sila balik sa Antioquia, diin kaniadto gitugyan sila ngadto sa grasya sa Dios alang sa buhat nga karon ila nang nahuman. Sa pag-abot nila sa Antioquia, ilang gitigum ang mga sakop sa simbahan ug gisuginlan sa tanan nga gibuhat sa Dios pinaagi kanila, ug sa iyang pagbukas og dalan alang sa mga dili Judio aron motuo sila. Didto nagpabilin sila'g dugay uban sa mga magtutuo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 145:10-11, 12-13, 21
R. Ang imong mga higala nagtug-an sa himaya sa Imong gingharian, O Ginoo. / R. Aleluya.
Papasalamata kanimo ang tanan mong mga buhat, O Ginoo, ug padayga kanimo ang tanan nga nagtuo kanimo. Pasultiha sila bahin sa himaya sa Imong gingharian ug pasuginla sa Imong gahum. (R)
Pasaysaya sila sa katawhan mahitungod sa imong gahum ug sa mahimayaong kasanag sa Imong gingharian. Ang Imong gingharian maoy gingharian alang sa tanang katuigan, ug ang Imong pagmando nagalungtad latas sa tanang kaliwatan. (R)
Ang akong baba magsulti unta sa kadayeganan sa Ginoo, ug ang tanang tawo magdayeg unta sa Imong balaang ngalan hangtud sa kahangturan. (R)
BERSO SA DILI PA ANG EBANGHELYO
Lk. 24:26
Aleluya! Ang Mesiyas kinahanglan mag-antos ug unya mabanhaw ug mosulod sa iyang himaya. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 14:27-31
Si Jesus miingon sa iyang mga tinun-an, "Ang kalinaw ibilin ko kaninyo; ang akong kalinaw ihatag ko kaninyo, kalinaw nga dili ingon sa ikahatag sa kalibutan. Ayaw kamo'g kabalaka ug ayaw kahadlok. Gisultihan ko na kamo nga mobiya ako, apan mobalik ako. Kon gihigugma ninyo ako, malipay kamo nga moadto ako sa Amahan, kay siya labaw man kanako. Gisultihan ko kamo niini karon sa wala pa kini mahitabo aron inigkahitabo niini, motuo kamo. Dili na ako makigsulti kaninyo'g dugay, kay taliabot ang nagmando niining kalibutana. Wala siyay gahum kanako, apan kinahanglan mahibalo ang kalibutan nga nahigugma ako sa Amahan; busa gibuhat ko ang tanan nga iyang gisugo kanako. "Tana manglakaw na kita."
ANG EBANGHELYO SA GINOO.
DAYGON IKAW, O KRISTO.
