⚪ Domingo sa Pasko sa Pagkabanhaw sa atong Ginoo

PAGBASA GIKAN SA MGA BUHAT SA MGA APOSTOLES

Acts. 10:34, 37-43

Si Pedro miingon, "Karon naila ko na nga ang Dios walay pinalabi. Nasayod kamo niadtong dakong hitabo sa yuta sa Israel; nagsugod kini sa Galilea human sa pagwali ni Juan mahitungod sa bunyag. Nasayod kamo mahitungod kang Jesus nga Nazaretnon nga gibuboan sa Dios sa gahum sa Espiritu Santo. Miadto siya sa tanang dapit ug giayo niya ang tanang giyawaan, kay ang Dios diha man kaniya. Saksi kami sa tanan nga iyang gibuhat didto sa kayutaan sa Judea lakip sa Jerusalem. Ilang gipatay siya pinaagi sa paglansang kaniya didto sa krus. Apan nabanhaw siya sa ikatulo ka adlaw ug gipadayag siya. Wala makakita kaniya ang tanang mga tawo, kondili kami lamang nga mga saksi nga gipili na sa Dios. Nangaon kami ug nanginom uban kaniya human siya mabanhaw. Ug gisugo kami niya sa pagwali sa Maayong Balita ngadto sa katawhan ug sa pagmatuod nga siya mao ang gipili sa Dios paghukom sa mga buhi ug sa mga patay." "Naghisgot mahitungod kaniya ang tanang mga propeta, nga nag-ingon nga ang tanan nga nagtuo kaniya pasayloon sa ilang mga sala pinaagi sa gahum sa iyang ngalan."

SALMO RESPONSORYO

Ps. 118:1-2, 16-17, 22-23

R. Mao kini ang adlaw nga gihimo sa Ginoo; magsadya kita ug maglipay. / R. Aleluya.

Pasalamati ninyo ang Ginoo, kay siya maayo, kay ang iyang kaluoy nagalungtad hangtud sa kahangturan. Pasultiha ang balay ni Israel, "Ang iyang kaluoy nagalungtad sa kahangturan." (R)

Ang tuong kamut sa Ginoo mibayaw uban sa gahum; ang tuong kamut sa Ginoo gibayaw. Dili ako mamatay, kondili mabuhi ug isangyaw ko ang mga buhat sa Ginoo. (R)

Ang bato nga gisalikway sa mga magtutukod nahimong bato sa kanto. Sa Ginoo nahimo kini; kahibulongan kini atubangan sa atong mga mata. (R)

PAGBASA GIKAN SA SULAT NI SAN PABLO NGADTO SA TAGA-COLOSAS

Col. 3:1-4

Sanglit gibanhaw na man kamo uban ni Cristo, tinguhaa ang mga butang nga atua sa langit diin naglingkod si Cristo sa iyang trono sa tuo sa Dios. Hunahunaa ang mga butang langitnon, dili ang yutan-on. Kay namatay na kamo, ug ang inyong kinabuhi natago uban ni Cristo diha sa Dios. Ang matuod ninyong kinabuhi mao si Cristo ug inigpakita niya, makita usab kamo uban kaniya ug moambit sa himaya.

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 5:6-8

Dili maayo nga kamo magpagarbo! Nasayod kamo sa giingon, "Ang gamayng patubo makapatubo sa tibuok minasa." Kinahanglan nga inyong isalikway ang daang patubo sa sala aron maputli gayod kamo. Unya mahisama kamo sa bag-ong minasa nga walay patubo, ingon sa akong nahibaw-an nga kamo gayod. Kay si Cristo, ang nating karnero sa Pangilin sa Pagsaylo, gikahalad na. Busa saulogon ta ang kombira sa walay paggamit sa pan nga sinambogan sa daang patubo nga mao ang patubo sa sala ug kalaw-ayan, kondili sa pan nga walay patubo, ang pan sa kaputli ug sa kamatuoran.

SEKWENSIYA

Ngadto sa Biktima sa Pasko maghalad og mga pagdayeg ang Kristiyano. Ang Kordero mitubos sa mga karnero; Si Cristo nga walay sala, ngadto sa Amahan mipahiuli sa mga makasasala. Ang kamatayon ug kinabuhi nag-atbangay sa katingalahang panag-away: Ang tag-iya sa kinabuhi nga namatay, buhi naghari sa tunhay. Maria, imo kaming sultihan, “Unsay imong nakita sa dalan?” “Ang lubong ni Cristo nga buhi: nakita ko ang himaya sa nabanhaw nga Hari; Mga manulondong saksi, habol ug bisti. Si Cristo akong kalauman nabanhaw: Siya ngadto sa Galilea mouna kaninyo paglakaw.” Nga si Cristo matuod nga nabanhaw sayod kami; Ikaw, Hari nga mananaog, kami intawon, kaloy-i! Amen. Aleluya.

BERSO SA DILI PA ANG EBANGHELYO

1 Cor. 5:7b-8a

Aleluya! Si Cristo, ang Nating Karnero sa pangilin sa pagsaylo, gikahalad na; busa saulugon ta ang kombira nga puno sa kalipay. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 20:1-9

Sayo sa Dominggo sa buntag, samtang ngitngit pa, si Maria Magdalena miadto sa lubnganan ug nakita niya nga ang bato naligid na gikan sa baba sa lubnganan. Midagan siya ug miadto kang Simon Pedro ug sa tinun-an nga gimahal ni Jesus, ug giingnan niya sila, "Gikuha nila sa lubnganan ang Ginoo ug wala kami mahibalo kon hain nila ibutang siya!" Unya si Pedro ug ang laing tinun-an nangadto sa lubnganan. Nagdagan silang duha, apan ang maong tinun-an mas kusog nga midagan kay kang Pedro ug nahiuna pag-abot sa lubnganan. Mitikubo siya ug iyang nakita ang panapton nga lino, apan wala siya mosulod. Miabot si Simon Pedro sunod kaniya, ug midiritso siya ngadto sa Iubnganan. Ug nakita niya didto ang panapton nga lino, ug ang panapton nga giputos sa ulo ni Jesus. Wala kini mahitipon sa panapton nga lino kondili gilukot ug gilain pagbutang. Unya kadtong tinun-an nga nahiuna pag-abot sa lubnganan misulod usab ug nakakita siya ug mituo. (Wala gihapon sila makasabot sa bahin sa Kasulatan nga nag-ingon nga mabanhaw siya.)

PAGBASA SA SANTOS NGA EBANGHELYO SUMALA NI SAN LUKAS

Lk. 24:1-12

Sayo kaayo pagka-Domingo sa buntag, miadto sa lubnganan ang mga babaye dala ang mga pahumot nga ilang giandam. Ug nakaplagan nila nga naligid na ang bato nga giali sa pultahan sa lubnganan, busa misulod sila; apan wala nila hikaplagi ang lawas sa Ginoong Jesus. Samtang nagbarog sila didto nga nalibog mahitungod niini, sa kalit mitungha sa ilang tupad ang duha ka lalaki nga nagsul-ob og sulaw nga bisti. Nangalisang pag-ayo ang mga ba-baye ug miduko sila, samtang miingon kanila ang duha ka lalaki, "Nganong gipangita man ninyo ang buhi diha sa mga patay? Wala siya dinhi; nabanhaw siya! Hinumdomi ang iyang gisulti kaninyo sa didto pa siya sa Galilea: 'Ang Anak sa Tawo kinahanglan nga itugyan ngadto sa mga makasasala ug ilansang sa krus, ug unya banhawon sa ikatulong adlaw.'" Unya nahinumdoman sa mga babaye ang gisulti niya, ug namauli sila ug gisugilon nila kining tanan ngadto sa napulog-usa ka tinun-an ug sa uban. Ang mga babaye mao si Maria Magdalena, si Juana, ug si Maria nga inahan ni Santiago; kini sila ug ang ubang mga babaye nga kauban nila nanugilon niining mga butanga ngadto sa mga apostoles. Apan naghunahuna ang mga apostoles nga binuang ang gisulti sa mga babaye, busa wala sila motuo kanila. Apan mitindog si Pedro ug midagan ngadto sa lubnganan; mitikubo siya ug nakita niya nga ang panapton nga giputos sa minatay mao na lay nahibilin didto. Unya mipauli siya nga nahibulong kon unsa gayod kaha ang nahitabo.

PAGBASA SA SANTOS NGA EBANGHELYO SUMALA NI SAN LUKAS

Lk. 24:13-35 (SA MISA SA HAPON O GABII)

Sa maong adlaw, duha kanila naglakaw paingon sa usa ka balangay nga ginganla'g Emmaus, mga napulog-usa ka kilometro gikan sa Jerusalem, ug nagsultihanay sila mahitungod sa tanang mga butang nga nahitabo. Samtang nagsultihanay sila, miduol si Jesus ug mikuyog kanila; nakita nila siya, apan wala sila makaila kaniya. Unya miingon si Jesus kanila, "Unsa bay inyong gipanagsultihan samtang naglakaw kamo?" Mihunong sila nga subo og panagway. Ug ang usa kanila nga ginganlag Cleopas, nangutana kaniya, "Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?" "Unsang mga hitaboa?" nangutana siya. "Ang nahitabo kang Jesus nga Nazaretnon," mitubag sila. "Usa siya ka propeta, ug giila sa Dios ug sa tanang mga tawo nga gamhanan sa pulong ug sa buhat. Ang mga kadagkoan sa mga pari ug ang mga punoan mitugyan kaniya aron silotan siya sa kamatayon, ug gilansang nila siya sa krus. Naglaum unta kami nga kadto siya mao ang moluwas sa Israel! Labot pa niini, ikatulong adlaw na karon sukad kini nahitabo. Ug pipila sa mga babaye nga among mga kauban nakapakurat kanamo; nangadlawon sila pag-adto sa lubnganan, apan wala nila hikaplagi didto ang iyang lawas. Ug namalik sila ug nanugilon nga nakakita kuno sila'g panan-awon diin may mga anghel nga misulti kanila nga buhi siya. Ug pipila sa among mga kauban nangadto sa Iubnganan, ug nakaplagan nila kini sumala gayod sa gisugilon sa mga babaye, apan wala sila makakita kaniya." Unya miingon si Jesus kanila, "Pagkabuang gayod ninyo! Pagkadugay ninyong motuo sa tanang gisulti sa mga propeta! Dili ba kinahanglan man nga mag-antus ang Mesiyas niining mga butanga ug unya mosulod sa iyang himaya?" Ug gipasabot ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtud sa mga sinulat sa tanang propeta. Niadtong tungora duol na sila sa balangay nga ilang adtoan, ug nagpasabot si Jesus nga daw mopadayon lang siya sa unahan; apan gihawiran nila siya ug giingnan, "Anhi lang ta mamahulay kay hapit na magabii." Busa midayon siya ug nagpabilin uban kanila. Sa ila nang pagpanihapon, mikuha siya sa pan ug gipanalanginan niya kini; unya gipikaspikas niya ug gihatag kanila. Dihadiha nabuka ang ilang mga mata ug nakaila sila kaniya, apan nahanaw siya. Nag-ingnanay sila, "Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?" Ug nanindog sila dayon ug namalik sa Jerusalem, diin hikaplagan nila ang napulog-usa ka tinun-an ug ang uban pa nga nagkatigum, ug nag-ingon, "Tinuod gayod nga nabanhaw ang Ginoo! Si Simon nakakita kaniya!" Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan.