🔴 Biyernes Santo sa Pagsaulog sa Pasyon sa Ginoo

PAGBASA GIKAN SA BASAHON NI PROPETA ISAIAS

Is. 52:13-53:12

Ang Ginoo miingon, "Molampos gayod ang akong alagad, magamhanan siya ug pasidunggan pag-ayo. Daghan ang mahibulong kaniya kay nadaot man pag-ayo ang iyang panagway ug dili na kini hitsura'g tawo mahibulong usab kaniya ang daghang mga nasud; ug maamang ang mga hari sa iyang atubangan; kay ila mang makita kadtong wala isugilon kanila, ug makasabot sila niadtong wala nila hidunggi." Ang mga tawo mitubag, "Kinsay makatuo sa amo karong gisangyaw? Kinsay makatuo nga buhat kini sa Ginoo? Kay kabubut-on sa Ginoo nga ang iyang alagad motubo daw tanum diha sa ugang yuta. Wala siyay kaambong nga makadani kanato, ug dili siya guwapo nga mabihag kita kaniya. Gitamay nato siya ug gisalikway; nakasinati siya'g mga kagul-anan ug mga pag-antus; wala gani motan-aw kaniya; wala nato siya tagda ug gipakawalay bili lamang, "Apan gi-antus niya ang mga kasakitan nga kita untay angay mag-antus ug gipas-an ang atong mga alantuson; apan giisip ta nga ang iyang pag-antus silot kaniya sa Dios. Gisamaran siya tungod sa atong mga sala, nangapangos siya tungod sa atong pagkadautan; gi-antus niya ang kastigo nga maoy nakaluwas kanato, ug pinaagi sa iyang mga labod nangaayo kita. Kitang tanan sama sa mga karnero nga nasalaag; wala mosubay sa hustong dalan, apan siyay gidakdakan sa Ginoo sa tanan tang kasal-anan. "Bisa'g gidaugdaug siya ug gipaantus pag-ayo, nagpakahilom lamang siya; sama sa nating karnero nga gidala ngadto sa ihawan, ug sama sa karnero atubangan sa moalot kaniya, wala gayod siyay timik. Gitaral siya nga hinikawan sa hustisya, ug walay nanumbaling sa iyang gidangatan, gihunosan siya sa iyang kinabuhi, tungod sa atong kalapasan. Giandaman siya'g lubnganan tipon sa mga kriminal, gilubong siya uban sa usa ka dato, bisa'g wala siya makabuhat ug dautan ni makasultig bakak." Ang Ginoo nag-ingon, "Maoy akong kabubut-on ang pagpaantus ug pagsakit kaniya; sa dihang gihimo niya ang iyang kaugalingon ingon nga halad alang sa sala, makita niya ang iyang mga kaliwat ug makabaton siyag taas nga kinabuhi; ug pinaagi kaniya matuman ang laraw sa Ginoo. Inigkatapos sa iyang mga pag-antus, malipay na usab siya ug masayod siya nga wala makawang ang iyang mga pag-antus. Siya ang matarong kong alagad ug siya maoy mopas-an sa silot sa katawhan aron mahimo silang matarong. Busa pasidunggan ko siya uban sa mga bantugan ug gamhanan kay nagpakamatay man siya tipon sa mga kriminal. Gipas-an niya ang sala sa daghang mga tawo, ug siyay nag-antus puli kanila ug nag-ampo aron sila pasayloon."

SALMO RESPONSORYO

Ps. 31:2, 6, 12-13, 15-16, 17, 25

R. O Amahan, gitugyan ko ang akong kinabuhi diha sa imong mga kamut.

Diha kanimo, O Ginoo, nagadangop ako; nga dili gayod unta ako kaulawan, sa imong katarong luwasa ako. Sa imong mga kamut gitugyan ko ang akong espiritu; imo akong luwason, O Ginoo, O matinud-anong Dios. (R)

Alang sa tanan natong mga kaaway nahimo akong salawayon, usa ka kataw-anan alang sa akong mga silingan, Ug usa ka kahadlokan alang sa akong mga higala; ang nakakita kanako sa gawas nagpahilayo kanako. Hikalimtan ako sama sa mga minatay nga wala hinumdomi; sama ako sa usa ka panaksan nga buak. (R)

Apan ang akong pagsalig anaa kanimo, O Ginoo; nagaingon ako, "Ikaw ang akong Dios." Sa imong mga kamut anaa ang akong destino; luwasa ako gikan sa gahum sa akong mga kaaway ug mga manggugukod. (R)

Ipadan-ag ang imong nawong ngari sa imong sulugoon; luwasa ako diha sa imong kaluoy. Pagmaisog ug paglig-on sa kasingkasing kamong tanan nga nagalaum sa Ginoo. (R)

PAGBASA GIKAN SA SULAT NGADTO SA MGA HEBREO

Heb. 4:14-16; 5:7-9

Lig-onon ta ang atong pagtuo kay duna kitay Pangulong Pari nga halangdon nga atua na sa presensiya sa Dios—si Jesus, ang Anak sa Dios. Ang atong Pangulong Pari dili sama sa ubang pari nga dili mobati'g kaluoy sa atong mga kahuyang. Hinunoa, usa siya ka Pangulong Pari nga gitintal sa tanang paagi sama kanato, apan wala gayod makasala. Busa magmasaligon kita ug moduol sa trono sa Dios diin atua ang grasya aron madawat nato ang kaluoy ug ang grasya nga atong gikinahanglan. Sa dinhi pa siya sa kalibutan, nag-ampo ug nangaliyupo si Jesus uban sa makusog nga pagtuwaw og mga luha ngadto sa Dios nga may gahum sa pagluwas kaniya sa kamatayon. Tungod kay mapaubsanon ug buotan man siya, gidungog siya sa Dios. Apan bisan siya mao ang Anak sa Dios nakakat-on siya sa pagkamasinugtanon pinaagi sa iyang mga pag-antus. Sanglit nahingpit man siya, nahimo siyang tinubdan sa dayon nga kaluwasan alang sa tanan nga masinugtanon kaniya.

BERSO SA DILI PA ANG EBANGHELYO

Fil. 2:8-9

Aleluya! Alang kanato si Kristo nahimong masugtanon hangtud sa kamatayon sa krus. Busa ang Dios mibayaw Kaniya ug mihatag Kaniya'g ngalan nga labaw sa tanang mga Ngalan. Aleluya!

ANG PASYON SA ATONG GINOONG JESUKRISTO SUMALA NI SAN JUAN

Jn. 18:1-19:42

Human si Jesus makaampo niini, milakaw siya kuyog sa iyang mga tinun-an ug mitabok sa sapa sa Kedron. Niadtong dapita may usa ka tanaman, ug misulod niini si Jesus ug ang iyang mga tinun-an. Si Judas, ang nagbudhi kaniya, nakatultol niining dapita, kay si Jesus ug ang iyang mga tinun-an mag-adtoan man didto. Busa miadto si Judas sa tanaman kuyog ang usa ka panon sa mga sundalo ug pipila ka guwardiya sa templo nga gipadala sa mga Kadagkoan sa mga Pari ug sa mga Pariseo. Sangkap sila'g mga hinagiban, mga parol, ug mga sulo. Nasayod si Jesus sa tanan nga mahitabo kanila, busa mitagbo siya kanila ug miingon, "Kinsay inyong gipangita?" Sila, mitubag, "Si Jesus nga taga-Nazaret." "Ah… ako," Siya miingon. Si Judas, ang nagbudhi kaniya, nagbarog didto uban kanila. Sa pag-ingon ni Jesus kanila. "Ako," Misibog sila ug nangatumba. Ug gipangutana sila pag-usab ni Jesus, "Kinsay inyong gipangita?" "Si Jesus nga taga-Nazaret," Sila mitubag. "Giingnan ko na kamo nga ako si Jesus. Kon akoy inyong gipangita, ayaw ninyog hilabti kining uban." Miingon siya. (Gisulti niya kini aron matuman ang iyang giingon, "Amahan, walay usa kanila nga nawala niadtong tanan nga imong gihatag kanako.") Unya si Simon Pedro nga may espada, milanit niini ug gitigbas niya ang ulipon sa Pangulong Pari, ug naputol ang tuong dalunggan sa ulipon. Miingon si Jesus kang Pedro, "Isakob ang imong espada! Nagtuo ka ba nga dili ko imnon ang kupa sa pag-antus nga gihatag kanako sa akong Amahan?" Unya gidakop si Jesus sa mga sundalo uban sa ilang kapitan ug sa mga guwardiyang Judio, ug siya gigapos nila ug gidala una ngadto kang Annas, ang ugangan ni Caifas nga mao ang Pangulong Pari niadtong tuiga. Si Caifas mao ang nagtambag sa mga Judio nga mas maayo nga usa ra ka tawo ang mamatay alang sa tanang tawo. Si Simon Pedro ug laing tinun-an misunod kang Jesus. Ang maong tinun-an kaila sa Pangulong Pari, busa mikuyog siya kang Jesus ngadto sa hawanan nga diha sa tugkaran sa balay sa Pangulong Pari. Nagpabilin si Pedro sa gawas duol sa ganghaan. Mibalik paggula ang laing tinun-an nga kaila sa Pangulong Pari ug misulti sa babaye nga didto sa ganghaan ug unya gidala niya si Pedro ngadto sa sulod. Ang babaye nga didto sa ganghaan miingon kang Pedro, "Dili ba usa ka man sa mga tinun-an nianang tawhana?" "Dili, oy!" Mitubag si Pedro. Tugnaw kadtong panahona, busa ang mga sulugoon ug mga guwardiya naghaling og kalayo ginamit ang uling ug nagdangdang sila nga nagbarog libot niini. Miduol si Pedro ug mibarog uban kanila aron mainitan usab siya. Unya gipangutana si Jesus sa Pangulong Pari mahitungod sa iyang mga tinun-an ug sa iyang pagtulon-an. Si Jesus mitubag. "Nagsulti ako sa dayag ngadto sa tanan; ang tanan kong pagpanudlo gibuhat ko sulod sa mga sinagoga ug sa templo. Wala akoy gisulti sa tago. Busa nganong nangutana ka pa man kanako? Maoy pangutan-a ang mga tawong nakadungog kanako kay nasayod sila sa akong gisulti." Sa pagsulti ni Jesus niini, gisagpa siya sa usa sa mga guwardiya ug giingnan, "Nganong nakaako ka pagsultig ingon niini sa Pangulong Pari?" Si Jesus mitubag kaniya, "Kon may sayop ako sa akong gisulti, ipahayag kini sa tanan nga ania dinhi. Apan kon husto ako, nganong gisagpa mo man ako?" Unya, ginapos gihapon, gipadala siya ni Annas ngadto kang Caifas, ang Pangulong Pari. Niadtong higayona nag-tindog gihapon si Pedro duol sa kalayo. Busa ang uban miingon kaniya, "Dili ba usa ka man sa mga tinun-an nianang tawhana?" Apan milimod si Pedro. "Dili oy!" Miingon siya. Unya usa sa mga ulipon sa Pangulong Pari, paryenti sa tawo kansang dalunggan giputol ni Pedro, nangutana, "Dili ka ba ang akong nakit-an uban kaniya didto sa tanaman?" Ug si Pedro miingon na usab, "Dili!" Ug dihadiha may mituktugaok nga manok. Unya gikan sa balay ni Caifas, ilang gidala si Jesus ngadto sa palasyo sa Gobernador. Sayo kadto sa buntag. Ang mga Judio wala mosulod sa palasyo kay dili sila buot molapas sa balaod sa ilang tinuohan bahin sa panglinis, aron makakaon sila sa panihapon sa Pangilin sa Pagsaylo. Busa migula si Pilato ug nangutana kanila, "Unsa may inyong sumbong batok niining tawhana?" Sila mitubag, "Dili unta namo siya dad-on nganhi kanimo kon wala pa siya makasala." Ug si Pilato miingon kanila, "Dad-a ninyo siya ug hukmi sumala sa inyong balaod." Ang mga Judio mitubag, "Wala itugot kanamo ang pagpatay'g tawo." (Nahitabo kini aron matuman ang gisulti ni Jesus sa iyang paghisgot unsang paagiha mamatay siya.) Unya mibalik si Pilato pagsulod sa palasyo ug gitawag niya si Jesus ug gipangutana, "Ikaw ba ang hari sa mga Judio?" Si Jesus mitubag, "Imo ra ba gayod kining pangutana o gisultihan ka ba hinoon sa uban mahitungod kanako?" Si Pilato mitubag, "Judio ba gud ako? Ang imong kaugalingong katawhan ug ang mga Kadagkoan sa mga Pari ang nagtugyan kanimo ngari kanako. Unsa bay imong nabuhat?" Si Jesus mitubag, "Ang akong gingharian dili iya niining kalibutana; kon ang akong gingharian iya pa niining kalibutana, ang akong mga sakop makig-away unta aron dili ako ikatugyan ngadto sa mga Judio. Apan lagi ang akong gingharian dili iya niining kalibutana!" Tungod niini nangutana si Pilato kaniya, "Hari ka ba diay?" Si Jesus mitubag, "Nag-ingon ka nga hari ako. Tungod niini natawo ug mianhi ako sa kalibutan alang sa usa lamang ka tuyo nga mao ang pagsaksi sa kamatuoran. Ang anaa sa kamatuoran mamati kanako." "Kay unsa bay kamatuoran?" Nangutana si Pilato kaniya. Unya mibalik paggula si Pilato ug miingon sa mga Judio, "Wala akoy nakaplagang katarungan sa pagsilot kaniya. Apan sumala sa inyong nabatasan, buhian ko ang usa ka binilanggo nga inyong pangayoon sa panahon sa Pangilin sa Pagsaylo. Gusto ba kamo nga buhian ko ang hari sa mga Judio?" Sila misinggit pagtubag kaniya, "Dili siya! Si Barabas maoy among gusto!" (Si Barabas usa ka tulisan.) Unya gikuha ni Pilato si Jesus ug iyang gipalatos. Ang mga sundalo naghimog purong-purong sa mga sangang tunokon ug gipahaom nila kini sa ulo ni Jesus. Gisul-oban usab nila siya og saput nga dagtom-pula, ug nanuol sila kaniya ug miingon, "Mabuhi ang Hari sa mga Judio!" Ug siya gipanagpa nila. Unya migula na usab si Pilato ug miingon sa mga tawo, "Karon, dad-on ko siya nganhi kaninyo aron mahibalo kamo nga wala akoy nakaplagang katarungan sa pagsilot kaniya." Busa migula si Jesus nga nagsul-ob sa purongpurong nga tunokon ug sa saput nga dagtom-pula. Unya miingon si Pilato kanila, "Ania ang tawo!" Sa pagkakita sa kadagkoan sa mga pari sa mga guwardiya kaniya, naninggit sila, "Ilansang siya sa krus! Ilansang siya!" Si Pilato miingon kanila, "Kon mao kana, kuhaa siya ug ilansang sa krus. Wala akoy nakaplagang katarungan nga silotan ko siya." Ang mga Judio mitubag, "Aduna kami balaod nga nagsugo nga angay siyang patyon, kay siya nagpaka-Anak sa Dios." Sa pagkadungog ni Pilato niini misamot siyag kahadlok. Busa mibalik siya pagsulod sa palasyo ug nangutana kang Jesus, "Taga diin ka ba gayod?" Apan si Jesus wala motubag kaniya. Busa si Pilato miingon kaniya, "Dili ka ba motubag kanako? Wala ka ba mahibalo nga ako may gahum sa pagbuhi kanimo ug sa pagpalansang kanimo sa krus?" Si Jesus mitubag, "Wala ka untay gahum kanako kon wala pa kini ihatag kanimo sa Dios. Busa ang tawo nga nagtugyan kanako nganha kanimo mas sad-an pa kay kanimo." Sa pagkadungog ni Pilato niini, naninguha siya sa pagbuhi kaniya. Apan ang mga Judio misinggit, "Kon buhian siya nagpasabut kana nga dili ka higala sa Emperador. Kay bisan kinsay magpakahari kaaway sa Emperador!" Sa pagkadungog ni Pilato niini, gidala niya si Jesus sa gawas ug milingkod siya sa lingkoranan sa maghuhukom didto sa dapit nga ginganlag "Ang Plataporma nga Bato." (Sa Hebreo ang ngalan niini "Gabata.") Hapit na kadto maudto sa bisperas sa Pangilin sa Pagsaylo. Unya si Pilato miingon sa mga Judio, "Ania ang inyong hari!" Apan sila naninggit sa pagtubag, "Patya siya! Patya! Ilansang siya sa krus!" Si Pilato nangutana kanila, "Gusto ba ninyong ipalansang ko sa krus ang inyong hari?" Ang kadagkoan sa mga pari mitubag, "Wala kami hari gawas sa Emperador!" Tungod niini gitugyan ni Pilato si Jesus ngadto kanila aron ilansang sa krus. Busa ilang gidala si Jesus. Migula siya nga nagpas-an sa krus ug miabot sa dapit nga ginganlag "Dapit sa Kalabera." (Sa Hebreo ginganlan kinig "Golgota.") Ug didto, siya gilansang nila sa krus. May duha usab ka tawo nga gilansang nila sa krus diha sa isigkakilid ni Jesus. Nagsulat si Pilato ug pahibalo ug gipabutang niya kini sa krus ni Jesus. Ang iyang gisulat mao kini: "Jesus nga taga-Nazaret, ang Hari sa mga Judio." Daghang mga Judio nakabasa niini, kay ang dapit diin gilansang si Jesus dili man layo sa siyudad. Ang pahibalo gisulat sa Hebreo, sa Latin, ug sa Griego. Ang mga kadagkoan sa mga pari miingon kang Pilato, "Ayaw isulat nga hari siya sa mga Judio, kondili nga miingon siya, 'Ako ang Hari sa mga Judio.'" Apan si Pilato mitubag, "Ang nasulat ko, dili ko na ilisan." Tapos si Jesus ikalansang sa mga sundalo didto sa krus, gikuha nila ang iyang saput ug gibahin sa upat, usa ka bahin sa matag sundalo. Gikuha usab nila ang bisti nga taas nga walay tinahian. Ang mga sundalo nag-ingnanay, "Dili nato kini gision; magripa hinoon kita kon kinsay makapanag-iya niini." Nahitabo kini aron matuman ang bahin sa Kasulatan nga nag-ingon: "Gibahin-bahin nila ang akong saput, ug giripahan nila ang akong bisti." Busa gibuhat kini sa mga sundalo. Duol sa krus ni Jesus nagbarog ang iyang inahan ug ang igsuon sa iyang inahan, si Maria nga asawa ni Cleofas, ug si Maria Magdalena. Sa pagkakita ni Jesus sa iyang inahan ug sa tinun-an nga iyang gimahal nga nagbarog didto, miingon siya sa iyang inahan, "Babaye, ania ang imong anak." Unya miingon siya sa tinun-an, "Ania ang imong inahan." Sukad niadto gipatipon si Maria pagpuyo sa tinun-an. Human niini, si Jesus nga nasayod nga ang tanan natuman na, ug aron pagtuman sa Kasulatan, miingon, "Giuhaw ako." Didto may usa ka panaksan nga puno sa suka, ug nagtunlob silag espongha sa suka ug gibutang sa usa ka sanga sa isopo, ug giisa nila kini ngadto sa iyang ba-ba. Human makatilaw si Jesus sa suka, miingon siya, "Natapos na!" Unya miduko siya ug namatay. (𝘋𝘐𝘕𝘏𝘐 𝘔𝘈𝘕𝘎𝘓𝘜𝘏𝘖𝘋 𝘈𝘕𝘎 𝘛𝘈𝘕𝘈𝘕 𝘜𝘎 𝘔𝘜𝘗𝘈𝘏𝘐𝘓𝘖𝘔 𝘚𝘈 𝘔𝘈𝘒𝘈𝘋𝘐𝘠𝘖𝘛) Ang mga Judio mihangyo kang Pilato nga balion nila ang mga bitiis sa mga tawo nga gilansang sa krus ug unya kuhaon sila. Gihimo nila kini kay Biyernes man kadto. Adlaw sa Pagpangandam, ug dili sila buot nga magpabilin ang mga lawas didto sa krus sa Adlawng Igpapahulay, sanglit ang umaabot nga Adlawng Igpapahulay balaan man kaayo. Busa nangadto ang mga sundalo ug ilang gipamali ang mga bitiis sa duha ka tawo nga gilansang sa krus uban kang Jesus. Apan sa pagduol na nila kang Jesus, nakita nila nga patay na siya, busa wala na nila balia ang iyang mga bitiis. Apan ang kilid ni Jesus giduslak sa usa sa mga sundalo sa iyang bangkaw, ug dihadiha mibuhagay ang dugo ug tubig. (Ang tawo nga nakakita niining hitaboa nagmatuod niini aron manuo usab kamo. Tinuod ug kasaligan ang iyang gisulti, ug nahibalo siya nga nagsulti siya sa tinuod.) Gihimo kini aron matuman ang bahin sa Kasulatan nga nag-ingon, "Walay bukog niya nga balion." Ug may lain pa gayong bahin sa Kasulatan nga nag-ingon, "Ang mga tawo motan-aw kaniya nga ilang gidughang." Human niini, si Jose nga taga Arimatea mihangyo kang Pilato nga kuhaon niya ang lawas ni Jesus. (Si Jose usa ka sumusunod ni Jesus, apan sa tago lamang kay nahadlok man siya sa mga kadagkoan sa mga Judio.) Gitugotan siya ni Pilato, busa miadto si Jose ug gikuha ang lawas ni Jesus. Ug si Nicodemo, ang nakigkita kang Jesus usa niana ka gabii, mikuyog kaniya dala ang mga kalim-an ka kilo nga pahumot, sinako nga mira ug aloe. Unya gikuha nilang duha ang lawas ni Jesus ug ilang giputos og panapton nga lino uban sa mga pahumot, kay mao man kini ang nabatasan sa mga Judio sa pag-andam sa minatay alang sa paglubong. May usa ka tanaman didto sa dapit diin gilansang si Jesus, ug sa maong tanaman may usa ka lubnganan nga wala pa gayod kalubngi. Ug sanglit adlaw man kadto sa Pagpangandam, ug kay duol ra man ang lubnganan, ilang gilubong si Jesus didto.