PAGBASA GIKAN SA BASAHON NI PROPETA JEREMIAS
Jer. 18:18-20
Miingon ang katawhan sa Judea ug ang lumulupyo sa Jerusalem, "Hala! Hipuson ta si Jeremias! Kabsan ba god kitag mga pari nga makatudlo kanato, ug mga tawong maalamon nga makatambag kanato, o mga propeta nga mosangyaw sa gisulti sa Dios! Dili! Pasakaan ta siyag sumbong ug dili na kita mamati sa iyang isulti." Busa nag-ampo ako, "Ginoo, patalinghugi intawon kining isulti ko kanimo, ingon man ang gipanulti sa akong mga kaaway batok kanako. Ang kaayo baslan ba diay'g dautan? Apan naghimo sila'g gahong alang kanako. Hinumdomi nga midangop ako kanimo aron paghangyo kanimo nga hunongon mo unta ang imong kasuko kanila.
ANG PULONG SA GINOO.
SALAMAT SA DIOS.
SALMO RESPONSORYO
Ps. 31:5-6, 14, 15-16
R. Luwasa ako, O Ginoo, diha sa imong makanunayon nga gugma.
Luwason ako nimo sa lit-ag nga ilang gibutang alang kanako, kay ikaw man ang akong dalangpanan. Sa imong mga kamut akong gitugyan ang akong espiritu; imo akong luwason, O Ginoo, O matinumanon nga Dios. (R)
Nakadungog ako sa mga hagawhaw sa katawhan, nga nakahadlok kanako gikan sa tanang dapit, Sa ilang pagsabutsabot batok kanako, sa ilang paglaraw sa pagpatay kanako. (R)
Apan ang akong pagsalig anaa kanimo, O Ginoo; nagaingon ako, "Ikaw ang akong Dios," Diha sa imong mga kamut anaa ang akong destino; luwasa ako gikan sa mga hakgom sa akong mga kaaway ug sa akong mga manggugukod. (R)
BERSO SA DILI PA ANG EBANGHELYO
Jn. 8:12
Aleluya! Ako mao ang kahayag sa kalibutan, nag-ingon ang Ginoo; ang tawo nga magsunod sa akong kabubut-on makabaton sa kahayag sa kinabuhi. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 20:17-28
Samtang nagtungas si Jesus paingon sa Jerusalem, gilain niya ang napulog duha ka tinun-an, ug giingnan niya sila, "Pamati kamo: nagpadulong kita sa Jerusalem, ug didto ang Anak sa Tawo itugyan ngadto sa kadagkoan sa mga pari ug sa mga magtutudlo sa Balaod. Siya hukman nila sa kamatayon, ug unya itugyan nila ngadto sa mga dili Judio ug bugalbugalan siya ug latuson ug ilansang sa krus; apan sa ikatulo ka adlaw banhawon siya." Unya ang asawa ni Sebedeo miadto kang Jesus uban sa iyang mga anak, miyukbo kaniya, ug mihangyo kaniyag usa ka butang. Nangutana si Jesus kaniya, "Unsa may imong gusto?" Siya mitubag, "Isaad kanako nga kining duha ko ka anak palingkoron mo sa imong tuo ug sa imong wala kon maghari ka na." Si Jesus mitubag kanila, "Wala kamo masayod sa inyong gipangayo. Makahimo ba kamo pag-inom sa kupa nga sa dili madugay akong imnan?" Sila mitubag, "Oo, makahimo." Si Jesus miingon kanila, "Kamo makainom gayod gikan sa akong kupa, apan wala akoy katungod sa pagpili kon kinsa ang palingkoron sa akong tuo ug sa akong wala. Kining mga dapita alang lamang niadtong giandaman niini sa akong Amahan." Sa pagkadungog niini sa napulo ka tinun-an, nangasuko sila sa duha ka magsuon. Busa gitawag ni Jesus silang tanan ug giingnan, "Nasayod kamo nga ang mga punoan naghari sa mga tawo, ug ang mga kadagkoan nagmando kanila. Apan dili kini mao ang paagi nga angay ninyong sundon. Kon usa kaninyo buot mahimong dako, kinahanglan nga mag-alagad siya sa tanan; ug kon usa kaninyo buot nga molabaw sa tanan kinahanglan nga magpaulipon siya ninyo sama sa Anak sa Tawo nga wala moanhi aron alagaran, kondili sa pag-alagad ug paghatag sa iyang kinabuhi aron pagluwas sa daghang tawo."
ANG EBANGHELYO SA GINOO.
DAYGON IKAW, O KRISTO.
