PAGBASA GIKAN SA BASAHON NI PROPETA ISAIAS
Is. 1:10, 16-20
Pamati-a ninyo kamong mga pangulo ug katawhan sa Jerusalem sama kamo sa taga-Sodoma ug Gomora. "Panghugas kamo ug hinloi ninyo ang inyong kaugalingon hunong na sa pagbuhat og dautan ug buhata ang maayo; patunhaya ang hustisya, ug tabangi ang gidaugdaog; panalipdi ang mga ilo, ug labani ang mga biyuda." Nag-ingon ang Ginoo, "Ngari kamo, ug maghusay kita. Bisa'g unsa ka pula ang inyong sala, maputi kini kaayo; bisan pa kini'g dagtom pula, maputi kini sama sa balhibo sa karnero. Kon magmasinugtanon kamo, makakaon kamo sa mga maayong abot sa yuta; apan kon mosukol kamo ug dili mopatuo, patyon kamo pinaagi sa espada. Ako, ang Ginoo, maoy nagsulti niini."
ANG PULONG SA GINOO.
SALAMAT SA DIOS.
SALMO RESPONSORYO
Ps. 50:8-9, 16-17, 21, 23
R. Sa matarong akong ipakita ang makaluluwas nga gahum sa Dios.
Dili tungod sa imong mga sakripisyo gibadlong ko ikaw, kay ang imong mga halad anaa sa akong atubangan kanunay. Wala ako magkuha og tore gikan sa imong balay ni mga kanding gikan sa imong panon. (R)
Nganong giasoy mo man ang akong mga kasugoan ug giangkon sa imong baba ang akong kasabutan, Bisan kon gidumtan mo ang pagpanton ug gisalikway mo ang akong mga pulong? (R)
Sa pagbuhat mo niining mga butanga, magpakabungol ba lamang ako? O naghunahuna ka ba nga sama ako kanimo? Badlongon ko ikaw diha sa pagpahinumdom kanila sa imong atubangan. Ang magahalad og pagdayeg agi'g sakripisyo nagahimaya kanako; ug kaniya nga nagalakaw sa matarong ipakita ko ang kaluwasan sa Dios. (R)
BERSO SA DILI PA ANG EBANGHELYO
Ezeq. 18:31
Isalikway ninyo ang tanan ninyong sala ug bag-oha ang inyong kasinkasing ug hunahuna.
PAGBASA SA SANTOS NGA EBANGHELYO SUMALA NI SAN MATEO
Mt. 23:1-12
Miingon si Jesus ngadto sa katawhan ug sa iyang mga tinun-an: "Ang mga magtutudlo sa Balaod ug ang mga Pariseo mao ang may katungod sa paghubad sa Balaod ni Moises. Busa kinahanglan tumanon ninyo ug sundon ang tanan nga ilang isugo kaninyo; apan ayaw ninyo'g sunda ang ilang mga buhat, kay wala man sila magtuman sa ilang giwali. Nagbugkos sila og bug-at nga mga karga ug gipapas-an nila sa mga tawo, apan dili gani sila mogamit bisa'g usa na lang ka tudlo aron pagtabang pagpas-an sa maong karga. Himoon nila ang tanan aron lamang pagpasigarbo ngadto sa mga tawo. Tan-awa'g unsa kadagko sa gisudlan nila sa mga sinulat nga mga bersikulo sa Kasulatan, nga ilang gibutang sa ilang mga agtang ug gibaligtos sa ilang mga bukton! Ug tan-awa'g unsa kataas ang sidsid sa ilang mga saput! Gusto sila sa Iabing maayong mga dapit sa mga kombira ug sa mga linaing lingkoranan sa mga sinagoga; gusto silang yukboan ug tahuron didto sa mga merkado, ug nga ang mga tawo motawag kanilag 'Magtutudlo.' Ayaw kamo pagpahingalag 'Magtutudlo,' kay kamong tanan managsuon man ug usa ra ang inyong Magtutudlo. Ug dinhi sa kalibutan ayaw tawga si bisan kinsa nga 'Amahan,' kay usa ra ang inyong Amahan nga atua sa langit. Ayaw usab kamo pagpatawag og 'Pangulo,' kay usa ra ang inyong pangulo nga mao ang Mesiyas. Ang labing dako kaninyo kinahanglang mahimo nga inyong sulugoon. Ug ipaubos ang magpataas sa iyang kaugalingon, ug ang magpaubos, ipataas."
ANG EBANGHELYO SA GINOO.
DAYGON IKAW, O KRISTO.
