PAGBASA GIKAN SA BASAHON NI PROPETA DANIEL
Dan. 9:4-10
Nag-ampo ako sa Ginoo nga akong Dios, ug gisugid ko kaniya ang akong mga sala. Miingon ako, "O Ginoo nga gamhanan ug Dios nga angay kahadlokan ug nagtuman sa gikasabutan ug kansang gahom walay paglubad alang niadtong nahigugma kanimo ug nagtamod sa imong kasugoan. "Nakasala kami kanimo sa among pagbuhat ug dautan ug sa among pagsupil kanimo, ug sa pagsalikway namo sa imong kasugoan ug mga lagda. Wala namo pamati-a ang imong mga sulugoon, ang mga propeta, nga nakigsulti sa ngalan nimo ngadto sa among mga hari, mga kadagkoan, ug sa among katigulangan, ug sa tanang katawhan sa nasod. Matarong ka, Ginoo, apan kami walay ulaw; ingon man ang mga tawo sa Juda, ug ang mga molupyo sa Jerusalem, ug sa tibuok Israel, kadtong anaa sa duol ingon man kadtong atua sa Iayo, nga atua sa tanang kayutaan diin mo sila aboga, tungod kay nagbudhi man sila kanimo. Ginoo, kami ug ang among mga hari, ang among kadagkoan, ug ang among katigulangan angay maulaw kay nakasala man kami kanimo. Apan ikaw, Ginoo, nga among Dios maluluy-on ug andam sa pagpasaylo, bisan pa'g misupil kami kanimo. Wala namo tumana ang sugo sa Ginoo nga among Dios nga iyang gihatag kanamo pinaagi sa iyang mga alagad, ang mga propeta."
ANG PULONG SA GINOO.
SALAMAT SA DIOS.
SALMO RESPONSORYO
Ps. 79:8, 9, 11, 13
R. Ginoo, ayaw kami tagda sumala sa angay sa among mga sala.
Ayaw hinumdomi batok kanamo ang mga kadautan nga nangagi; ang imong kaluoy madali unta nga moabot kanamo, kay nahimutang kami sa dakong kalisdanan. (R)
Tabangi kami, O Dios among manluluwas, tungod sa himaya sa imong ngalan; Luwasa kami ug pasayloa ang among kasal-anan tungod sa imong ngalan. (R)
Paabota nganha kanimo ang agulo sa mga binilanggo; sa imong dakong gahom luwasa sila nga gihukman sa kamatayon. Unya kami, ang imong Iungsod ug mga karnero sa imong panon magpasalamat kanimo sa kahangturan; latas sa tanang kaliwat among isangyaw ang imong kadayganan. (R)
BERSO SA DILI PA ANG EBANGHELYO
Jn. 6:63c, 68c
Aleluya! Ang mga pulong nga akong gisulti kaninyo-Espiritu ug kinabuhi; ang mga pulong nga naghatag ug kinabuhing walay katapusan. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 6:36-38
Miingon si Jesus sa iyang mga tinun-an: "Busa pagmaluluy-on kamo, ingon nga maluluy-on ang inyong Amahan." "Ayaw kamo paghukom sa inyong isigkatawo, ug ang Dios dili maghukom kaninyo; ayaw sila pakasad-a, ug kamo dili pakasad-on sa Dios; pasayloa sila, ug ang Dios mopasaylo usab kaninyo. Panghatag kamo sa uban, ug ang Dios mohatag usab kaninyo: madawat ninyo ang hustong takos, ug pakapinan pa gayod, ibu'bo sa inyong mga kamut kutob sa inyong mahakop. Ang taksanan nga inyong gamiton alang sa uban mao usab ang taksanan nga gamiton sa Dios alang kaninyo."
ANG EBANGHELYO SA GINOO.
DAYGON IKAW, O KRISTO.
