PAGBASA GIKAN SA UNANG SULAT NI SAN JUAN
1 Jn. 2:22-28
Nan, kinsa man ang bakakon? Ang bakakon mao kadtong nag-ingon nga si Jesus dili mao ang Kristo. Siya ang Kaaway ni Kristo kay gisalikway man niya ang Amahan ug ang Anak. Kay ang nagsalikway sa Anak nagsalikway usab sa Amahan, ug ang midawat sa Anak midawat usab sa Amahan. Busa ampingi gayod ninyo ang mensahe nga inyong nadungog sukad pa sa sinugdan. Kay kon inyong ampingan diha sa inyong kasingkasing ang nadungog ninyo, magpabilin kamo kanunay diha sa Anak ug sa Amahan. Ang gisaad ni Kristo kanato mao ang kinabuhing walay katapusan. Gisulatan ko kamo mahitungod niadtong buot molimbong kaninyo. Apan gibuboan na kamo ni Kristo sa iyang Espiritu ug samtang ang iyang Espiritu anaa kaninyo, wala kamo magkinahanglan og laing magtutudlo. Kay ang iyang Espiritu magtudio kaninyo sa tanang butang ug matuod ang iyang itudlo kaninyo. Busa sunda ang itudlo kaninyo sa Espiritu, ug pabilin kamo diha kang Kristo. Busa, mga anak, pabilin kamo diha kaniya aron makabaton kitag pagsalig ug dili maulaw nga moatubang kang Kristo sa iya unyang pagbalik.
ANG PULONG SA GINOO.
SALAMAT SA DIOS.
SALMO RESPONSORYO
Ps. 98:1, 2-3, 3-4
R. Ang tanang kautlanan sa yuta nakakita sa makaluluwas nga gahom sa Dios.
Awiti ang Ginoo og bag-ong awit; kay naghimo siya og katingalahang mga buhat. Ang iyang tuong kamot nakakab-ot og kadaugan alang kaniya, ang iyang balaan nga bukton. (R)
Ang Ginoo nagpahibalo sa iyang kaluwasan; sa atubangan sa kanasuran iyang gipahayag ang iyang katarong. Nahinumdom siya sa iyang kaluoy ug sa iyang kamatinud-anon alang sa balay sa Israel. (R)
Ang tanang kautlanan sa yuta nakakita, sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan. Singgit kamo sa pag-awit; awita ang pagdayeg. (R)
PAGBASA SA SANTOS NGA EBANGHELYO SUMALA NI SAN JUAN
Jn. 1:19-28
Kini ang gisulti ni Juan sa diha nga ang mga kadagkoan sa mga Judio sa Jerusalem nagpadalag mga pari ug mga Levita aron pagpangutana kon kinsa siya. Wala magdumili si Juan pagtubag kanila; mitug-an siya sa walay lipod-lipod nga dili siya ang Mesiyas. "Kinsa ka man diay?" Nangutana sila. "Si Elias ka ba?" "Dili," mitubag siya. "Ikaw ba ang Propeta nga among gipaabot?" Nangutana sila. "Dili," mitubag siya. Ug sila miingon, "Nan, sultihi kami kon kinsa ka aron may ikatubag kami sa mga nagsugo kanamo. Unsa may ikasulti mo mahitungod sa imong kaugalingon?" Si Juan mitubag, "Ako mao 'Ang tingog nga nagsinggit sa kamingawan: Hawani ang dalan nga agian sa Ginoo!'" (Kinsa ang gisulti ni Propeta Isaias.) Ang mga sinugo pinadala sa mga Pariseo. Gipangutana na usab nila si Juan, "Kon ikaw dili mao ang Mesiyas, ni si Elias, ni ang Propeta, nganong namunyag ka man?" Si Juan mitubag, "Ako nagbunyag pinaagi sa tubig, apan may usa diha kaninyo nga wala ninyo hiilhi. Moabot siya sunod kanako, apan ako dili takos bisan gani paghubad sa higot sa iyang sandalyas." Kining tanan nahitabo didto sa Betania, sa tabok sa Suba sa Jordan, diin namunyag si Juan.
ANG EBANGHELYO SA GINOO.
DAYGON IKAW, O KRISTO.
