PAGBASA GIKAN SA BASAHON SA NUMEROS
Nm. 6:22-27
Ang Ginoo miingon kang Moises, "Ingna si Aaron ug ang iyang mga anak nga ingnon ninyo niini pagpanalangin ang mga Israelita: "Panalanginan ug bantayan unta kamo sa Ginoo!" "Magmaluluy-on magmahinatagon unta siya kaninyo!" "Kahimut-an unta kamo sa Ginoo ug hatagan kamog kalinaw!" Ug miingon ang Ginoo, "Kon ilang ibungat ang akong ngalan agig panalangin alang sa katawhan sa Israel, panalanginan ko sila."
ANG PULONG SA GINOO.
SALAMAT SA DIOS.
SALMO RESPONSORYO
Ps. 67:2-3, 5, 6, 8
R. Bendisyonan unta kita sa Dios diha sa iyang kaluoy.
Kaloy-an unta kita sa Dios ug bendisyonan kita; ipadan-ag unta kanato ang iyang nawong. Mahibaw-an unta ang iyang dalan dinhi sa yuta; ug diha sa tanang mga nasod, ang imong kaluwasan. (R)
Maglipay unta ang mga nasod ug magsadya kay nagamando ka sa kanasuran diha sa katarong; imong agakon ang mga nasod dinhi sa yuta. (R)
Daygon unta ikaw sa katawhan, O Dios; ang tanang kalungsoran magdayeg unta kanimo! Bendisyonan unta kita sa Dios, ug sa tanang kautlanan sa yuta mahadlok unta kaniya! (R)
PAGBASA GIKAN SA SULAT NI SAN PABLO NGADTO SA TAGA-GALACIA
Gal. 4:4-7
Apan pag-abot sa hustong panahon, gipadala sa Dios ang iyang Anak. Mianhi siya ingon nga anak sa tawhanong inahan, ug nagpuyo sa ilalom sa Balaod, aron pagluwas niadtong nailalom sa Balaod ug aron mahimo kitang mga anak sa Dios. Aron pagpaila nga kamo iyang mga anak, gipadala sa Dios ang Espiritu sa iyang Anak nganhi sa atong kasingkasing, ang Espiritu nga nagtuwaw, "Amahan ko!" Busa dili na kamo ulipon kondili anak na. Ug tungod kay kamo iyang anak, ang Dios maghatag kaninyo sa tanan nga anaa kaniya.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUKAS
Lk. 2:16-21
Busa midali sila pag-adto ug hikaplagan nila si Maria ug si Jose, ug nakita nila ang bata nga naghigda sa pasongan. Sa diha nga ang mga magbalantay nakakita sa bata, gisugilon nila ang gisulti sa anghel mahitungod kaniya. Ug ang tanang nakadungog niini nahibulong sa gibalita kanila sa mga magbalantay sa karnero. Nahinumdom si Maria niining tanan, ug namalandong siya pag-ayo mahitungod niing mga butanga. Ug namauli ang mga magbalantay sa karnero nga nag-awit og mga pagdayeg sa Dios tungod sa tanan nga ilang nadungog ug nakita, sumala gayod sa gisugilon kanila sa anghel. Sa pagka-ikawalo ka adlaw nga mao nay ihimo sa seremonyas sa pagtuli sa bata, gihinganlan siyag Jesus, ang ngalan nga gisulti sa anghel ngadto kang Maria sa wala pa ipanamkon ang bata.
ANG EBANGHELYO SA GINOO.
DAYGON IKAW, O KRISTO.
