PAGBASA GIKAN SA UNANG SULAT NI SAN JUAN
1 Jn. 2:18-21
Mga anak, duol na ang katapusan sa kalibutan! Gisuginlan na kamo nga moanhi ang Kaaway ni Kristo, ug ania na karon ang daghang mga kaaway ni Kristo. Busa masiguro nato nga duol na gayod ang katapusan. Kining mga tawhana dili tinuod nga sakop sa atong pundok, busa namulag sila kanato. Kon tinuod pang ato silang mga kauban, magpabilin unta sila kanato. Apan namiya sila aron maila gayod nga sila dili kauban nato. Apan gibuboan na kamo ni Kristo sa Espiritu Santo, busa nasayod kamong tanan sa kamatuoran. Gisulatan ko kamo dili tungod kay wala kamo masayod sa kamatuoran, kondili tungod kay nasayod kamo niini, ug nahibalo nga walay bakak nga maggikan sa kamatuoran.
ANG PULONG SA GINOO.
SALAMAT SA DIOS.
SALMO RESPONSORYO
Ps. 96:1-2, 11-12, 13
R. Pagsadya langit ug yuta.
Awiti ang Ginoo og bag-ong awit; awiti ang Ginoo, kamong tanang kayutaan. Awiti ang Ginoo, dayga ang iyang ngalan. (R)
Paglipay mga langit, ug pagsadya, yuta; palanoga ang dagat ug ang nagpuno niini. Pagsadya mga kapatagan ug ang tanan nga anaa kanila, unya manlukso sa kalipay ang tanang mga kahoy sa kalasangan atubangan sa Ginoo. (R)
Ang Ginoo miabot, miabot siya aron pagmando sa yuta. Magmando siya sa kalibutan uban sa katarong, ug sa katawhan uban sa iyang kamakanunayon. (R)
PAGBASA SA SANTOS NGA EBANGHELYO SUMALA NI SAN JUAN
Jn. 1:1-18
Sa wala pay nabuhat bisan unsa, ang Pulong diha na. Ang Pulong uban sa Dios, ug ang Pulong Dios. Sukad pa gayod sa sinugdan ang Pulong uban sa Dios. Pinaagi kaniya gibuhat sa Dios ang tanan, ug walay bisan usa sa tanan nga nabuhat nga dili pinaagi kaniya. Gikan kaniya ang kinabuhi, ug ang maong kinabuhi mao ang kahayag sa mga tawo. Ang kahayag nagdan-ag diha sa kangitngit, ug wala makabuntog niini ang kangitngit. May tawo nga ginganlag Juan nga gipadala sa Dios pagsaksi ngadto sa mga tawo mahitungod sa kahayag, aron ang tanan makadungog sa mensahe ug motuo. Si Juan dili mao ang kahayag, apan mianhi siya aron pagsaksi mahitungod sa kahayag. Mao kini ang matuod nga kahayag nga moanhi na sa kalibutan ug mag-iwag sa tanang tawo. Ang Pulong dinhi na sa kalibutan. Pinaagi kaniya gibuhat sa Dios ang kalibutan, apan ang kalibutan wala moila kaniya. Mianhi siya sa iyang kaugalingong katawhan, apan wala sila modawat kaniya. Hinoon, may midawat ug mituo kaniya; busa sila gihatagan niya sa katungod nga mahimong mga anak sa Dios. Wala sila mahimong mga anak sa Dios sa paagi nga tawhanon-wala sila mangatawo nga mga anak sa tawhanong amahan, kay ang Dios mismo mao ang ilang Amahan. Ang Pulong nahimong tawo ug mipuyo uban kanato. Nakita namo ang iyang himaya nga puno sa grasya ug sa kamatuoran. Kini ang himaya nga iyang nadawat ingon nga Bugtong Anak sa Amahan. Misaksi si Juan mahitungod kaniya, ug misinggit nga nag-ingon, "Siya ang akong gihisgotan sa pag-ingon ko, 'Siya nga moabot sunod kanako labaw kanako kay diha na man siya sa wala pa ako matawo.'" Gikan sa naghingapin niyang grasya kitang tanan gihatagan niya sa walay puas nga panalangin. Ang Balaod gihatag sa Dios pinaagi kang Moises, apan ang grasya ug ang kamatuoran miabot pinaagi kang JesuKristo. Wala pa gayoy tawo nga nakakita sa Dios. Ang Bugtong Anak nga Dios nga pinangga kaayo sa Amahan maoy nagpaila kaniya.
ANG EBANGHELYO SA GINOO.
DAYGON IKAW, O KRISTO.
