PAGBASA GIKAN SA BASAHON NI SIRAC
Sir. 48:1-4, 9-11
Unya mitungha ang maisugon nga Elias, kansang mga pulong misilaob ingon og usa ka sulo. Nagdala siyag usa ka gutom ngadto sa katawhan, ug daghan kanila nangamatay tungod sa iyang dakong tinguha sa pagpadayon. Sa pagsulti niya sa ngalan sa Ginoo, gipugngan niya ang ulan ug sa tulo ka higayon naghangyo siya nga ipakanaog ang kalayo. Elias, ang imong mga milagro mga katingalahan! Walay lain nga makapasigarbo sa maong mga buhat! Gidala ikaw ngadto sa langit diha sa usa ka alimpulos nga kalayo, usa ka karwahe nga gibitad sa nagsiga nga mga kabayo. Ang kasulatan nag-ingon nga andam ikaw sa pagpakita sa gitudlo nga panahon aron pagbugnaw sa kapungot sa Dios sa dili pa kini mosugwak diha sa kapungot; nga ikaw "magdala sa mga amahan ug sa mga anak sa pagkausa pag-usab," ug magpahiuli sa mga tribo sa Israel. Palaran sila nga buhi nga makakita kanimo nga mobalik ingon man sila nga nangamatay na diha sa gugma, kay kami usab mangabuhi.
ANG PULONG SA GINOO.
SALAMAT SA DIOS.
SALMO RESPONSORYO
Ps. 80:2-3, 15-16, 18-19
R. Ginoo, pabalika kami kanimo, pakitaa kami sa imong nawong ug maluwas kami.
O Magbalantay sa lsrael, pagpatalinghug, gikan sa imong trono diha sa kerubin, pagpadan-ag. Pakuhaa ang imong gahom, umari ka aron pagluwas kanamo. (R)
Sa makausa pa, O Ginoo sa kagahoman, dung-awa kami gikan sa langit, ug tan-awa; Ayoha paggalam kining bagon, ug panalipdi ang gitanom sa imong kamut nga tuo (ang anak sa tawo nga imong gihimong gamhanan). (R)
Ang imong panabang maanaa sa tawo sa imong kamut nga tuo uban sa anak sa tawo nga imong gihimong gamhanan. Unya dili siya mobulag kanimo; hatagi kamig bag-ong kinabuhi, ug magsangpit kami sa imong ngalan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 17:10-13
Unya nangutana kang Jesus ang mga tinun-an, "Nganong nag-ingon man ang mga magtutudlo sa Balaod nga si Elias maoy moanhi pag-una?" Si Jesus mitubag, "Si Elias una gayod nga moanhi, ug andamon niya ang tanan. Apan sultihan ko kamo: Mianhi na si Elias, apan wala moila kaniya ang mga tawo; hinonoa ilang gibuhat kaniya kutob sa ilang gusto. Sa samang paagi, ang Anak sa Tawo ila usab nga pasipad-an." Unya nakasabut ang mga tinun-an nga nagsulti siya mahitungod kang Juan nga Magbubunyag.
ANG EBANGHELYO SA GINOO.
DAYGON IKAW, O KRISTO.
