PAGBASA GIKAN SA BASAHON NI ZACARIAS
Zech. 2:14-17
"Pag-awit ug pagsadya, O anak nga dalaga sa Sion! Tan-awa, miabot ako aron pagtipon kaninyo," miingon ang Ginoo. Nianang adlawa daghang nasud motipon diha sa Ginoo ug mamahimo silang iyang katawhan. Magpabilin siya ug inyong mahibaloan nga ang Ginoo maoy nagpadala kanako diha kaninyo. Alang sa Ginoo, ang katawhan sa Juda mahimo nga iyang bahin sa balaang yuta ug iyang pilion pag-usab ang Jerusalem. Ayaw pagsaba, kamong iyang katawhan, kay ang Ginoo mobarug gikan sa iyang balaang pahulayan.
ANG PULONG SA GINOO.
SALAMAT SA DIOS.
PAGBASA GIKAN SA BASAHON NI ZACARIAS
Rv. 11:19; 12:1-6, 10
Unya naabli ang templo sa langit, ug nakita sa sulod niini ang Sudlanan sa Kasabotan sa Dios. Unya may kilat, kagahob, dalugdog, linog ug mibunok ang yelo. Unya nagpakita ang usa ka dakong tilimad-on didto sa langit: may usa ka babaye nga nagbistig adlaw ug nagtunob sa bulan, ug gikoronahan siyag napulog-duha ka bitoon. Hapit na siya moanak ug nagtiyabaw siya sa kasakit. Laing tilimad-on nagpakita didto sa langit. May dakong dragon nga pula nga may pito ka ulo, napulo ka sungay, ug may korona ang matag ulo niini. Gikahig niya sa iyang ikog ang ikatulong bahin sa mga bitoon sa langit ug gitambog ngadto sa yuta. Mibarog siya sa atubangan sa babayeng hapit na manganak aron tukbon niya ang bata nga mahimugso. Unya gianak sa babaye ang usa ka batang lalaki nga maghari sa kanasuran sa paagi nga higpit kaayo. Apan gisakmit ang bata ug gidala ngadto sa Dios ug sa iyang trono. Mikagiw ang babaye ngadto sa kamingawan diin ang Dios nag-andam kaniya og dapit, ug didto atimanon siya sulod sa usa ka libo ug duha ka gatos ug kan-uman ka adlaw. Unya nadungog ko ang singgit gikan sa langit nga nag-ingon, "Ania na gayod ang kaluwasan gikan sa Dios! Gipadayag na gayod sa Dios ang gahom niya ingon nga Hari, ug gipakita na sa Mesiyas ang iyang awtoridad! Kay ang tigsumbong sa atong mga kaigsuonan nga nagbarog sa atubangan sa Dios ug nagsumbong kanila adlaw ug gabii, gihinginlan na gikan sa langit."
ANG PULONG SA GINOO.
SALAMAT SA DIOS.
SALMO RESPONSORYO
Jdt. 13:18, 19
R. Ikaw ang labing dako nga dungog sa atong kaliwat.
Ang Dios Labing Halangdon nagdayeg kanimo, nagpanalangin siya kanimo, labaw sa tanang babaye sa yuta. Pagkatakus daygon ang Ginoong Dios nga nagbuhat sa langit ug sa yuta! (R)
Ang imong pagsalig sa Dios dili gayod hikalimtan nila nga nagtug-an sa gahom sa Dios. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 1:26-38
Sa ikaunom ka bulan sa pagmabdos ni Isabel, gipadala sa Dios ang anghel nga si Gabriel ngadto sa usa ka lungsod sa Galilea nga ginganlag Nazaret. May mensahe siya alang sa usa ka batan-ong dalaga nga sinayuran sa usa ka lalaki nga ginganlag Jose, nga kaliwat ni Hari David. Maria ang ngalan sa babaye. Miadto ang anghel kaniya ug miingon, "Paglipay! Ang Ginoo nag-uban ug nagpanalangin kanimo pag-ayo!" Nalibog pag-ayo si Maria sa pagkabati niya sa mensahe sa anghel, ug nagpalandong siya kon unsay kahulugan sa iyang mga pulong. Miingon ang anghel kaniya, "Ayaw kahadlok, Maria, kay gikahimut-an ka sa Dios. Magmabdos ka ug manganak og lalaki, ug nganlan mo siyag Jesus. Mahimo siyang inila ug tawgon siya nga Anak sa Dios nga Labing Halangdon. Ang Ginoong Dios maghimo kaniyang hari, sama sa iyang katigulangan nga si David, ug mahimo siyang hari sa mga kaliwat ni Jacob hangtod sa kahangturan; ug dili gayod matapos ang iyang gingharian!" Si Maria miingon sa anghel, "Ulay ako, busa unsaon man pagkahimo niini?" Ang anghel mitubag, "Mokunsad kanimo ang Espiritu Santo, ug magpabilin ang gahom sa Dios diha kanimo. Tungod niini, ang balaan nga bata tawgon nga Anak sa Dios. Hinumdomi ang imong paryenti nga si Isabel. Giingon nga dili na siya moanak; apan karon ikaunom na ka bulan ang iyang pagsabak, bisag tigulang na siya kaayo; kay walay dili mahimo sa Dios." Miingon si Maria, "Sulugoon ako sa Ginoo; mahitabo unta kanako ang imong gisulti." Ug mibiya ang anghel kaniya.
ANG EBANGHELYO SA GINOO.
DAYGON IKAW, O KRISTO.
PAGBASA SA SANTOS NGA EBANGHELYO SUMALA NI SAN LUKAS
Lk. 1:39-47
Wala madugay, nangandam si Maria ug midali pag-adto sa kabungtoran, sa usa ka lungsod sa Judea. Miadto siya sa balay ni Zacarias ug nangumosta kang Isabel. Sa pagkabati ni Isabel sa pangumosta ni Maria, milihok ang bata sulod sa iyang tiyan. Unya napuno sa Espiritu Santo si Isabel, ug misulti sa makusog, "Bulahan ka sa tanang mga babaye! Bulahan ang bata nga imong ianak! Ngano kaha nga miduaw man kanako ang inahan sa akong Ginoo? Kay pagkadungog ko gayud sa imong pangumosta, mi-ulpot sa kalipay ang bata nga akong gisabak. Bulahan ka nga mituo nga matuman gayud ang mensahe sa Ginoo kanimo!" Unya miingon si Maria, "Nagdayeg ang akong kasingkasing sa Ginoo. Ug nagmalipayon ang akong kalag tungod sa Dios nga akong Manluluwas."
ANG EBANGHELYO SA GINOO.
DAYGON IKAW, O KRISTO.
