PAGBASA GIKAN SA BASAHON NI PROPETA ISAIAS
Is. 41:13-20
Ang Dios miingon, "Kay ako, ang Ginoo nga imong Dios, maoy naglig-on kanimo; ako ang nagsulti kanimo, 'Ayaw kahadlok, kay tabangan ko ikaw.'" Ang Ginoo nag-ingon, "Ayaw kahadlok, Israel. bisag sama ka lamang sa ulod, kay tabangan ko ikaw, kay ako, ang Balaang Dios sa Israel, moluwas kanimo. Himoon ko ikaw nga galamiton sa paggiok, bag-o, hait, ug duhay sulab: giukon ug dugmokon mo ang kabukiran ug himoon mo ang kabungtoran nga ingon sa abog. Alig-igon mo sila ug ipadpad sila sa hangin ngadto sa layo, ug katagon sila sa bagyo, apan magmalipayon kamo kay ako man ang inyong Dios; Daygon ninyo ako ang Balaang Dios sa Israel." "Sa dihang mangitag tubig ang akong katawhan ug wala silay hikaplagan, ug mag-uga ang ilang dila sa kauhaw, ako, ang Ginoo, motabang kanila ako, ang Dios sa Israel, dili gayod mobiya kanila. Padagaydayon ko ang mga suba diha sa opaw nga kabungtoran, ug mga tuburan taliwala sa kawalogan; himoon kong linaw ang kamingawan, ug patunghaon ko ang mga sapa diha sa disyerto. Magtanom akog sidro, akasya, mirto ug olibo didto sa kamingawan; ug malukop sa sipre, palo de tsina ug aguho ang kamingawan; aron ang katawhan makakita ug masayod; nga ang Ginoo, ang Balaang Dios sa Israel, maoy naghimo niini."
ANG PULONG SA GINOO.
SALAMAT SA DIOS.
SALMO RESPONSORYO
Ps. 145:1, 9, 10-11, 12-13
R. Ang Ginoo maayo ug maluluy-on; dugay nga masuko ug puno sa kaayo.
Ibayaw ko ikaw, O Dios ug akong hari, ug daygon ko ang imong ngalan hangtod sa kahangturan. Ang Ginoo maayo alang sa tanan ug maluluy-on sa tanan niyang mga binuhat. (R)
Magpasalamat unta kanimo ang tanan mong mga binuhat, O Ginoo, ug magdayeg kanimo ang mga nagtuo kanimo. Pasultiha sila sa himaya sa imong gingharian ug pahisguta sa imong kagamhanan. (R)
Ipahibalo nila sa katawhan ang imong gahom, ug ang mahimayaong kasanag sa imong gingharian. Ang imong gingharian, gingharian alang sa tanang katuigan, ug ang imong kamandoan nagalungtad latas sa tanang kaliwatan. (R)
PAGBASA SA SANTOS NGA EBANGHELYO SUMALA NI SAN MATEO
Mt. 11:11-15
Si Jesus miingon ngadto sa katawhan, "Hinumdomi kini: Wala pay tawo nga sama ni Juan nga Magbubunyag. Apan ang labing iwit sa Gingharian sa Langit labaw pa kaniya. Sukad sa pagwali ni Juan hangtod karon, ang Gingharian sa Langit nahiagom sa mga mapintas nga pag-ataki, ug ang mapintas nga mga tawo nanlimbasog sa pag-agaw niini. Ang tanang Propeta ug ang Balaod ni Moises, hangtod sa panahon ni Juan, naghisgot mahitungod sa Gingharian; ug kun buot kamo motuo sa ilang mensahe, si Juan mao si Elias, kansang pag-anhi gitagna. Busa pamati kon may dalunggan kamo!"
ANG EBANGHELYO SA GINOO.
DAYGON IKAW, O KRISTO.
