KINUTLO GIKAN SA BASAHON SA KAALAM NI SOLOMON
Wis. 6:2-11
Nagdumala kamo sa daghang mga yuta ug mapagarbohon nga daghan ang ang mga tawo nga ubos sa inyong pagmando, apan kining awtoridad gihatag kaninyo sa Ginoo nga Labing Halangdon. Usisahon niya unsa ang inyong nabuhat ug unsa ang inyong gilaraw nga buhaton. Nagmando kamo sa ngalan sa Dios ug sa iyang gingharian, ug kon dili kamo magmando sa minatarong, kon dili ninyo tumanon ang balaod, kon dili kamo magkinabuhi subay sa kabubut-on sa Dios, mahiagom kamo sa kalit ug makalilisang nga silot. Ang hukom mahigpit ilabina alang kanila nga anaa sa gahom. Ang ordinaryo nga tawo mahimo nga pasayloon sa ilang kasaypanan tungod sa kaluoy, apan sila nga anaa sa gahom moatubang sa usa ka mahingpit nga hukom. Ang Ginoo sa tanan dili mahadlok kang bisan kinsa, bisan unsa pa siya kagamhanan. Siya mismo maoy nagbuhat sa tanan, gamhanan siya o ordinaryo ug giangay niya pagsangkap ang tanan, apan iyang hukman ang binuhatan sa mga nagamando sa dugang nga kahingpit. Alang kaninyo, gamhanang mga hari, gisulat ko kining mga pulonga, aron mahibalo kamo unsaon pagbuhat nga maalamon ug paglikay sa mga sayop. Kini mga balaang butang, ug kon inyo kining atimanon sa paagi nga balaan, kamo mismo isipon nga balaan. Kon. makakat-on kamo niining pagtulon-ana, makahimo kamo pagpanalipod sa inyong kaugalingon sa Adlaw sa Paghukom. Busa himoa ang akong pagtulon-an nga inyong bahandi ug kalipay, ug matudloan kamo pag-ayo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 82:3-4, 6-7
R. Tindog, O Dios, ug hukmi ang kalibutan.
Labani ang ubos ug ang walay amahan; hukmi sa matarong ang naguol ug ang hangol. Luwasa ang ubos ug ang kabus; gikan sa kamut sa dautan palingkawasa sila. (R)
"Miingon ako: kamo mga dios, kamong tanan nga anak sa Labing Halangdon; Apan ingog mga tawo mamatay kamo, ug mapukan sama sa bisan kinsang prinsipe." (R)
PAGBASA SA SANTOS NGA EBANGHELYO SUMALA NI SAN LUKAS
Lk. 17: 11-19
Sa nagpadulong si Jesus sa Jerusalem, miagi siya sa utlanan sa Samaria ug Galilea. Samtang nagpaingon siya sa usa ka balangay, gisugat siya og napulo ka sanlahon. Nagpaantaw sila ug naninggit, "Jesus! Magtutudlo! Kaloy-i intawon kami!" Nakakita kanila si Jesus ug miingon, "Lakaw ug pahiling kamo sa mga pari." Samtang diha pa sila sa dalan, nangaayo sila. Ang usa kanila, sa pagtan-aw nga naayo na siya, mibalik ug nagdayeg sa Dios sa kusog nga tingog. Mihapa siya sa tiilan ni Jesus nagpasalamat kaniya. Ang maong tawo Samaryanhon. Unya miingon si Jesus. "Dili ba napulo man ka tawo ang nangaayo? Hain na man ang siyam? Ngano man nga kining dumuduong mao ra may mibalik aron pagpasalamat?" Ug miingon kaniya si Jesus, "Tindog ug lakaw; ang imong pagtuo maoy nakaayo kanimo."
ANG EBANGHELYO SA GINOO.
DAYGON IKAW, O KRISTO.
