PAGBASA GIKAN SA BASAHON SA KAALAM NI SOLOMON
Wis. 2:23-3:9
Sa pagbuhat sa Dios kanato, dili niya tuyo nga kita mamatay; gibuhat kita niya sama sa iyang kaugalingon. Ang kasina sa yawa mao ang nagdala sa kamatayon nganhi sa kalibutan, ug sila nga iya sa yawa mao ang mangamatay. Apan ang matarong nga mga tawo panalipdan sa Dios ug dili gayod mag-antus sa kasakit. Usa ka binoang nga sayop ang panghunahuna nga ang mga matarong nga mga tawo mamatay ug nga ang ilang kamatayon usa ka makalilisang kadaot. Ila kitang biyaan, apan dili kini usa ka kadaot. Sa pagkatinuod, ang matarong anaa sa kalinaw. Daw nag-antos sila sa silot, apan naghupot diay sila sa masaligong paglaum sa pagkawalay kamatayon. Ang ilang mga giantos angay ra kon itandi sa mga kabulahanan nga ilang pagadawaton. Ang Dios nagsulay kanila, ingon sa bulawan diha sa usa ka hasohasoan, ug hikaplagan sila nga gamay sa pagpakig-uban kaniya. Gidawat niya sila maingon sa iyang pagdawat sa mga sakripisyo nga sunogon didto sa altar sa mga nagsimba kaniya. Inig-abot sa Dios aron pagganti sa mga matarong, mosidlak sila atubangan sa mga dautan daw kalayo diha sa uga nga uhot. Magmando sila sa kanasuran ug mga katawhan, ug ang Ginoo mao ang mahimo nilang hari hangtod sa kahangturan. Sila nga nagsalig sa Dios moabot sa pagsabot sa kamatuoran sa iyang mga paagi. Sila nga nagmatinumanon kaniya magpuyo uban kaniya diha sa iyang gugma, kay siya maayo ug maluluy-on kanila nga iyang gipili.
ANG PULONG SA GINOO.
SALAMAT SA DIOS.
SALMO RESPONSORYO
Ps. 34:2-3, 16-17, 18-19
R. Daygon ko ang Ginoo sa tanang panahon.
Daygon ko ang Ginoo sa tanang panahon: ang iyang kadayganan maania kanunay sa akong ba-ba, Maghimaya ang akong kalag diha sa Ginoo; makabati kanako ang mapaubsanon ug malipay. (R)
Ang Ginoo nagatan-aw sa matarong, ug mamati sa ilang dangoyngoy, Ang Ginoo nagasudya sa mga nagbuhat og dautan, aron dili na sila hinumdoman sa yuta. (R)
Sa pagtuwaw sa matarong, nagapatalinghug ang Ginoo kanila, ug sa tanan nilang mga kagul-anan giluwas sila niya. Ang Ginoo haduol sa mahinulsolon og kasingkasing; ug luwason niya ang mga naguol. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 17:7-10
Si Jesus miingon: "Pananglitan adunay usa kaninyo nga may sulugoon nga nagdaro o nag-atiman sa mga karnero. Inig-abot niya gikan sa uma, ingnon ba nimo siya, 'Pagdali diha aron mokaon ka!' Dili gayod! Imo hinoon siyang ingnon, 'Andama ang akong panihapon, ug unya pagtapis ug silbihi ako; human niini, ikaw na usab ang mokaon.' Ang usa ka sulugoon dili angayng pasalamatan tungod sa iyang pagtuman sa sugo, dili ba? Mao usab kamo; kon nakabuhat na kamo sa tanan nga gisugo kaninyo, ingna ninyo, 'Mga sulugoon kami ug nagbuhat lamang sa among katungdanan.'"
ANG EBANGHELYO SA GINOO.
DAYGON IKAW, O KRISTO.
