ANG SINUGDANAN SA BASAHON SA KAALAM NI SOLOMON
Wis. 1:1-7
Higugmaa ang hustisya, kamong mga nagamando sa kalibutan. Ibutang sa tinuoray ang inyong mga hunahuna diha sa Ginoo, ug pangitaa siya sa natinud-anon gayod. Sila nga wala magsulay kaniya makakaplag kaniya; mopakita siya kanila nga nagsalig kaniya. Ang katawhan sa Dios mahimulag kaniya tungod sa mga hunahuna nga dili matarong, ug kon may igo kitang kabuang sa pagsulay kaniya, maulawan kita sa iyang gahom. Ang kaalam dili gayod mopuyo diha kang bisan kinsa nga malimbongon o ulipon sa sala. Ang tanan nga balaan nakakat-on pagpahilayo sa malimbongon nga mga tawo. Dili siya igkita sa diha nga ang mga binuang hunahuna igapadayag; dili siya mahimutang sa diha nga gihimo ang panglupig. Ang kaalam maoy usa ka espiritu nga mahigalaon sa mga tawo, apan dili magsulti batok sa Dios, kay ang Dios nasayod man sa atong mga gibati ug mga hunahuna, ug namati sa atong tagsatagsa ka pulong. Sanglit ang tibuok kalibutan napuno man sa Espiritu sa Ginoo, ug naghugpong sa tanan nga anaa niini; nahibalo siya sa tagsatagsa ka pulong nga gisulti sa mga tawo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 139:1-3, 4-6, 7-8, 9-10
R. Agaka ako, Ginoo, subay sa dalan nga walay-katapusan.
O Ginoo, gisulay mo ako ug nakaila ikaw kanako; nahibalo ikaw kanus-a ako molingkod ug kanus-a motindog; nakasabut ka sa akong mga hunahuna gikan sa halayo. Ang akong mga panaw ug mga pahulay imong giusisa, sinati ikaw sa tanan kong mga paagi. (R)
Bisan sa wala pa ang usa ka pulong sa akong dila, ania, O Ginoo, nahibalo ka na sa tibuok niini, Sa akong atubangan ug sa akong luyo, imo akong gipiit ug gibutang mo ang imong kamut kanako. Ang maong kahibalo katingalahan ra kaayo kanako; taas ra kaayo nga akong abton. (R)
Asa man ako makalikay sa imong espiritu? sa imong presensiya asa man ako makakagiw? Kon mosaka ako sa kalangitan, tua ikaw didto; kon mosalom ako sa kahiladman sa kalibutan, tua ikaw. (R)
Kon molupad ako sa mga pako sa kaadlawon, kon moadto ako sa kinalay-ang kautlanan sa dagat, Bisan didto ang imong kamut mag-agak kanako, ang imong tuong kamut hugot nga mogunit kanako. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 17:1-6
Si Jesus miingon sa iyang mga tinun-an, "Ang mga butang nga makaangin sa mga tawo pagpakasala mahitabo gayod, apan alaut ang tawo nga tungod kaniya nahitabo kining mga butanga. Maayo pa kaniya nga hiktan ang iyang liog sa usa ka dako nga galingang bato ug itambog siya ngadto sa dagat, kay sa makaangin niining gagmayng mga bata sa pagpakasala. Busa pagmatngon kamo!" "Kon ang imong isigkatawo makasala, badlonga siya; ug kon maghinulsol, pasayloa. Kon makasala siya kanimo sa makapito sulod sa usa ka adlaw, ug sa matag higayon moanha siya kanimo ug moingon, 'Naghinulsol ako,' kinahanglan imo siyang pasayluon." Ang mga apostoles miingon sa Ginoo, "Dugangi ang among pagtuo." Ug ang Ginoo mitubag, "Kon duna kamoy pagtuo nga ingon kadako sa liso sa mustasa makasugo kamo sa kahoy nga sikomoro, 'Maluka ka ug balhin sa dagat!' ug kini motuman kaninyo."
ANG EBANGHELYO SA GINOO.
DAYGON IKAW, O KRISTO.
