PAGBASA GIKAN SA IKADUHANG BASAHON SA MGA HARI
2 Kgs. 5:14-17
Miadto si Naaman sa Suba sa Jordan ug mitunlob siya makapito, sumala sa gisulti kaniya sa propeta sa Dios, ug nahiuli ang iyang pamanit sama sa panit sa usa ka bata. Unya si Naaman ug ang iyang mga kauban mibalik ngadto sa propeta sa Dios ug mingon, "Karon nasayod ha ako nga walay laing Dios sa tibuok kalibutan gawas sa Dios sa Israel, busa dawata kining gasa ko kanimo." Apan mitubag si Eliseo, "Ingon nga buhi ang Ginoo nga akong gialagaran, dili gayod ako modawat bisag unsa." Namugos si Naaman kang Eliseo nga dawaton niya ang gasa, apan midumili si Eliseo. Unya si Naaman miingon, "Kon dili mahimo, naghangyo ako kanimo nga hatagan mo akog yuta nga madala sa duha ka mula kay sukad karon dili na ako mohalad og halad nga sunogon ni mohalad og mga mananap ngadto sa laing mga dios."
ANG PULONG SA GINOO.
SALAMAT SA DIOS.
SALMO RESPONSORYO
Ps. 98:1, 2-3, 3-4
R. Ang Ginoo nagpadayag sa kanasuran sa iyang makaluluwas nga gahom.
Awiti ang Ginoo og bag-ong awit, kay naghimo siya og katingalahang mga buhat; ang iyang tuong kamut, ang iyang balaang bukton, nakakab-ot og kadaogan alang kaniya. (R)
Ang Ginoo nagpahibalo sa iyang kaluwasan; sa atubangan sa kanasuran iyang gipadayag ang iyang katarong. Nahinumdom siya sa iyang kaluoy ug sa iyang kamatinud-anon alang sa balay ni Israel. (R)
Ang tanang kautlanan sa yuta nakakita sa kaluwasan nga gihimo sa atong Ginoo. Awiti nga malipayon ang Ginoo, kamong tanang kayutaan; singgit kamo sa pag-awit; awita ang pagdayeg. (R)
PAGBASA GIKAN SA IKADUHANG SULAT NI SAN PABLO NGADTO KANG TIMOTEO
2 Tm. 2:8-13
Hinumdomi si Jesu Kristo nga gibanhaw, nga kaliwat ni David, sumala sa Maayong Balita nga akong giwali. Nag-antos ako ug gigapos gani og kadena sama sa usa ka kriminal tungod kay nagwali man ako sa Maayong Balita. Apan ang pulong sa Dios dili ginapos, busa giantos ko ang tanan tungod sa piniling katawhan sa Dios, aron makabaton usab sila sa kaluwasan nga anaa kang Kristo Jesus, inubanan sa himayang dayon. Matuod gayod ang giingon: "Kon namatay kita uban kaniya, mabanhaw usab kita uban kaniya; kon molahutay kita, maghari usab kita uban kaniya; kon ilimod ta siya, ilimod usab kita niya; kon kita dili magmatinumanon, magpabilin siyang matinumanon, kay matinud-anon man siya."
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUKAS
Lk. 17:11-19
Sa nagpadulong si Jesus sa Jerusalem, miagi siya sa utlanan sa Samaria ug Galilea. Samtang nagpaingon siya sa usa ka balangay, gisugat siya og napulo ka sanlahon. Nagpaantaw sila ug naninggit, "Jesus! Magtutudlo! Kaloy-i intawon kami!" Nakakita kanila si Jesus ug miingon, "Lakaw ug pahiling kamo sa mga pari." Samtang diha pa sila sa dalan, nangaayo sila. Ang usa kanila, sa pagtan-aw nga naayo na siya, mibalik ug nagdayeg sa Dios sa kusog nga tingog. Mihapa siya sa tilan ni Jesus ug nagpasalamat kaniya. Ang maong tawo Samaryanhon. Unya miingon si Jesus, "Dili ba napulo man ka tawo ang nangaayo? Hain na man ang siyam? Ngano man nga kining dumuduong mao ra may mibalik aron pagpasalamat?" Ug miingon kaniya si Jesus, "Tindog ug lakaw; ang imong pagtuo maoy nakaayo kanimo."
ANG EBANGHELYO SA GINOO.
DAYGON IKAW, O KRISTO.
