PAGBASA GIKAN SA BASAHON NI PROPETA JOEL
Jl. 4:12-21
Ang Ginoo miingon: "Kinahanglan mangandam ang kanasuran ug moadto sa Walog sa Paghukom. Didto, ako, ang Ginoo, maghukom sa tanang kasikbit nga kanasuran. Dautan sila kaayo; galaba sila sama sa trigo sa panahon sa ting-ani; sila sama sa ubas diha sa pug-anan hangtod nga mobuhagay ang bino." Linibo ang katawhan didto sa Walog sa Paghukom. Hapit na gayod moabot ang adlaw sa Ginoo. Mongitngit ang adlaw ug ang bulan, ug dili na mohayag ang kabituonan. Mosinggit ang Ginoo didto sa Bukid sa Sion; modahunog ang iyang tingog didto sa Jerusalem: mokurog ang yuta ug ang langit, apan panalipdan niya ang iyang katawhan. "Unya masayod ka, Israel, nga ako ang Ginoo nga imong Dios. Magpuyo ako sa Sion, ang balaan kong bukid; ang Jerusalem mahimong balaang siyudad, ug ang mga langyaw dili na gayod makabuntog niini." Niadtong panahona ang kabukiran malukop sa mga parasan; may mga baka na unya sa kabungtoran, ug daghan nang tubig sa tibuok Juda. May suba nga moagay gikan sa Templo sa Ginoo, ug tubigan niini ang Walog sa mga Akasya. "Mahimong kamingawan ang Ehipto ingon man ang Edumea, kay gisulong man nila ang yuta sa Juda ug gipamatay ang mga tawong walay sala. Ako silang panimaslan silotan ko gayod ang sad-an. May magpuyo na unya sa Juda ug sa Jerusalem hangtod sa kahangturan, ug magpuyo na ang Ginoo didto sa Bukid sa Sion"
ANG PULONG SA GINOO.
SALMO RESPONSORYO
Ps. 97:1-2, 5-6, 11-12
T. Magsadya unta ang mga maayong tawo diha sa Ginoo.
Ang Ginoo hari; pasadyaa ang yuta; palipaya ang daghang mga pulo. Ang mga panganod ug kangitngitan nagalibot kaniya, ang katarong ug hukom mao ang gibarogan sa iyang trono.
T. Magsadya unta ang mga maayong tawo diha sa Ginoo.
Ang kabukiran milanay ingog talo atubangan sa Ginoo, atubangan sa Ginoo sa tibuok kalibutan. Ang mga langit nagasangyaw sa iyang katarong ug ang kanasuran nakakita sa iyang himaya.
T. Magsadya unta ang mga maayong tawo diha sa Ginoo.
Ang kahayag mibanagbanag alang sa matarong; ang kalipay, alang sa maligdong og kasingkasing paglipay diha sa Ginoo, kamong mga matarong, ug pasalamati ang iyang balaang ngalan.
T. Magsadya unta ang mga maayong tawo diha sa Ginoo.
PAGBASA SA SANTOS NGA EBANGHELYO SUMALA NI SAN LUKAS
Lk. 11:27-28
Human makasulti si Jesus niini, may usa ka babaye nga mituwaw taliwala sa pundok sa mga tawo ug miingon kaniya, "Bulahan ang babaye nga maoy nagsabak ug nagpasuso kanimo!" Apan si Jesus mitubag, "Bulahan hinoon sila nga namati sa pulong sa Dios ug nagtuman niini!"
ANG EBANGHELYO SA GINOO.