PAGBASA GIKAN SA BASAHON NI PROPETA MALAQUIAS
Mal. 3:13-4:2a
"Nagsulti kamog dautan mahitungod kanako," matod sa Ginoo. "Apan miingon kamo, 'Unsa bay among gisulti mahitungod kanimo?' Mingon kamo, Walay kapuslanan ang pag-alagad sa Dios. Unsay kapuslanan sa atong pagtuman sa iyang mga sugo o sa pagpakita ngadto sa Ginoo nga Labing Gamhanan nga nasubo kita sa atong gibuhat? Sumala sa atong nakita, ang mga mapahitas-on mao hinoon ang bulahan. Wala lamang mouswag ang dautan, kon dili. gihagit pa nila ang Dios pinaagi sa pagbuhat og dautan ug wala sila maunsa." Unya ang katawhan nga may kahadlok sa Ginoo nagsultihanay ug ang Ginoo namati kanila. Sa atubangan niya may usa ka basahon diin nasulat ang mga ngalan niadtong may kahadlok ug may pagtahod sa Ginoo. "Sila mahimong akong katawhan," nag-ingon ang Ginoo nga Labing Gamhanan. "Sa adlaw nga buhaton ko kini, maako na gayod sila. Kaloy-an ko sila, sama sa amahan nga maluoy sa anak nga nag-alagad kaniya. Makita ninyo ang kalainan sa matarong ug sa dautan, ug sa nag-alagad kanako ug wala mag-alagad." Nag-ingon ang Ginoo nga Labing Gamhanan, "Ang adlaw moabot nga ang tanang mapahitas-on ug dautan sunogon sama sa dagami. Niadtong adlawa mangasunog sila ug walay mahibilin kanila. Apan alang kaninyo nga nagsunod kanako, ang akong gahom sa pagluwas mosubang sama sa adlaw ug mag-ayo sa mga balatian sama sa bidlisiw sa adlaw."
ANG PULONG SA GINOO.
SALAMAT SA DIOS.
SALMO RESPONSORYO
Ps. 1:1-2, 3, 4, 6
R. Bulahan sila nga nagalaum sa Ginoo.
Bulahan ang tawo nga wala magsunod sa tambag sa dautan, ni maglakaw sa dalan sa mga makasasala, ni makig-uban sa mga walay ulaw, kondili nalipay pagpalandong sa balaod sa Ginoo sa adlaw ug sa gabii. (R)
Sama siya sa usa ka kahoy nga gitanum duol sa masulog nga tubig, nga nagahatag sa iyang bunga sa tingbunga, ug ang iyang dahon dili gayod malarag. Bisag unsay iyang buhaton molampos. (R)
Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan nagalaglag sa dalan sa dautan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 11:5-13
Si Jesus miingon sa iyang mga tinun-an, "Pananglit usa kaninyo moadto sa balay sa usa ka higala sa tungang gabii ug moingon kaniya, 'Bay, pabayloa kog tulo ka buok pan, kay miabot sa amo ang usa ko ka higala nga nagpanaw ug wala gayod akoy ikadalit kaniya.' Kon pananglit tubagon ka sa imong higala didto sa sulod, 'Ayaw na akog samoka! Gitrangkahan na ang pultahan, ug ang akong kabataan ug ako nanghigda na, ug dili na ako makabangon sa paghatag kanimo bisag unsa.' Unsa may imong buhaton? Sultihan ko kamo nga bisag higala ka niya, dili siya mobangon ug mohatag kanimog pan; apan mobangon na lang siya ug mohatag kanimo sa tanan nga imong gikinahanglan, kay wala ka man maulaw sa pagpunay og pangayo. Busa sultihan ko kamo: Pangayo kamo, ug kamo hatagan; pangita kamo, ug kamo makakaplag; pagtuktok kamo, ug ablihan ang pultahan alang kaninyo. Kay ang tanan nga mangayo hatagan, ug siya nga mangita makakaplag, ug ang pultahan ablihan alang kaniya nga magtuktok. May usa ba kaninyong mga amahan nga mohatag sa iyang anak og bitin kon siya mangayog isda? O mohatag ba kamo kaniyag tanga kon mangayo siyag itlog? Bisan pa sa inyong pagkadautan, mahibalo kamong mohatag og maayong mga butang ngadto sa inyong mga anak. Nan, ang Amahan nga atua sa langit labaw pang mohatag sa Espiritu Santo kanila nga mangayo kaniya!"
ANG EBANGHELYO SA GINOO.
DAYGON IKAW, O KRISTO.
