PAGBASAG GIKAN SA BASAHON NI PROPETA JOEL
Jl. 1:13-15; 2:1-2
Kamong mga pari nga nag-alagad diha sa halaran sa Ginoo, pagbisti kamog sako ug panghilak kamo; pangadto kamo sa Templo ug pagbangotan didto sa tibuok gabi. Hapit na moabot ang adlaw sa Ginoo; magdala kinig kalaglagan gikan sa Labing Gamhanan. Pagkamakalilisang sa maong adlaw! Patingoga ang trumpeta; ipalanog ang pasidaan didto sa Sion, ang balaang bungtod sa Dios! Pangurog kamong katawhan sa Juda, kay hapit na moabot ang adlaw sa Ginoo. Usa kini ka ngitngit ug dulom nga adlaw, gitaptapan sa mga panganod ug ngiob kaayo. Ug Sama sa kangitngit nga molukop sa kabukiran, mohugpa ang bagang panon sa dulon nga wala pa ingon sukad-masukad ni may sama niini sa umaabot nga mga adlaw.
ANG PULONG SA GINOO.
SALAMAT SA DIOS.
SALMO RESPONSORYO
Ps. 9:2-3, 6, 16, 8-9
R. Ang Ginoo maghukom nga matarong sa kalibutan.
Pasalamtan ko ikaw, O Ginoo, sa tibuok kong kasingkasing; isaysay ko ang tanang mong katingalahang mga buhat. Maglipay ako ug magsadya diha kanimo; awiton ko ang kadayganan sa imong ngalan, O Labing Halangdon. (R)
Gibadlong mo ang kanasuran ug gilaglag ang dautan; gipapas mo ang ilang mga ngalan hangtud sa kahangturan. Ang mga nasod naunlod sa gahong nga ilang gihimo; sa lit-ag nga ilang giladlad, nabitik ang ilang mga tiil. (R)
Apan ang Ginoo nagalingkod sa iyang trono hangtud sa kahangturan; gipabarog niya ang iyang trono aron maghukom, gihukman niya nga matarong ang kalibutan; gimandoan niya ang kanasuran uban sa kaangayan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 11:15-26
Pipila sa mga katawhan miingon, "Si Beelsebul, ang pangulo sa mga yawa, maoy naghatag kaniyag gahom sa pagpapahawa kanila." Dihay uban nga buot mobitik kaniya, mao nga sila mihangyo kaniya nga mohimo siyag usa ka milagro aron pagpaila nga siya pinadala sa Dios. Apan nahibalo si Jesus sa ilang mga hunahuna ug miingon siya kanila, "Bisan unsang nasora nga magkabahin-bahin ug mag-unay pag-away dili molungtad og dugay; ang banay nga mabahinbahin maungkag. Busa kon diha sa gingharian ni Satanas may mga pundok nga nag-unay'g away, unsaon man paglungtad sa maong gingharian? Nag-ingon kamo nga naghingilin ako sa mga yawa tungod kay naghatag si Beelsebul kanakog gahom sa paghimo niini. Kon giingon niini nako paghingilin kanila, giunsa man diay sa inyong mga sumusunod pagpapahawa kanila? Ang inyong kaugalingong mga sumusunod nagpaila nga sayop gayod kamo! Ang tinuod mao nga tungod sa gahom sa Dios naghingilin ako sa mga yawa, ug kini maoy nagmatuod nga naghari na ang Dios kaninyo." "Kon ang usa ka tawo nga kusgan, nga sangkap sa tanan niyang inandam nga mga hinagiban, magbantay sa iyang balay, dili gayod kahilabtan ang iyang mga butang. Apan kon may labi pang kusgan nga mosulong ug mobuntog kaniya, ang labing kusgan mosakmit sa tanang mga hinagiban nga gisaligan sa tag-iya ug bahinbahinon ang iyang tinulis." "Ang dili dapig kanako, batok gayod kanako; ang dili motabang kanako pagtigom, nagpatibulaag." "Sa panahon nga mogula sa usa ka tawo ang usa ka dautang espiritu, magsuroy-suroy siya sa mga dapit nga mamala ug mangitag iyang kapahulayan; kondili siya makakaplag niini, magkanayon siya, Mobalik lang ako sa akong gipuy-an kaniadto. Busa mobalik siya ug makakaplag sa balay nga malinis ug maayo nang pagkapahimutang ang mga kasangkapan niini. Unya mogula siya ug magdalag laing pito ka espiritu nga labi pang dautan kay kaniya, ug manulod sila ug mopuyo didto. Busa, sa katapusan, kadtong tawhana molabi pa kadautan kay sa sinugdan."
ANG EBANGHELYO SA GINOO.
DAYGON IKAW, O KRISTO.
