[F] San Andres, apostol

PAGBASA GIKAN SA SULAT NI SAN PABLO NGADTO SA TAGA-ROMA

Rom. 10: 9-18

Maluwas ka kon ipahayag mo nga si Jesus mao ang Ginoo, ug sa kinasingkasing motuo ka nga gibanhaw siya sa Dios. Kay mituo man kita sa Dios; ug naluwas kita kay gipahayag man nato kini. Kay ang Kasulatan nag-ingon, "Ang nagtuo kaniya dili gayod magmahay." Alang kini sa tanan sanglit wala may kalainan sa mga Judio ug sa dili Judio; ang Dios mao ray Ginoo sa tanan, ug manalangin sa tanan nga magsangpit kaniya. Sumala sa Kasulatan, "Ang tanan nga magsangpit sa ngalan sa Ginoo maluwas." Apan unsaon man nila pagsangpit kaniya kon wala sila motuo ug unsaon man nila pagtuo kon wala nila hidunggi ang mensahe? Ug unsaon man nila pagkadungog kon wala kini iwali? Ug unsaon man pagwali sa mensahe kon walay gipadala nga magwawali? Sumala sa Kasulatan, "Pagkatahom sa mga tiil niadtong nagwali sa Maayong Balita!" Apan wala modawat ang tanan sa Maayong Balita! Si Isaias miingon, "Ginoo, kinsay mituo sa among giwali?" Busa ang pagtuo naggikan sa pagpamati sa mensahe, ug ang mensahe naggikan sa pagwali kang Cristo. Apan mangutana ako: Tinuod ba nga wala sila makadungog sa mensahe? Nakadungog sila sumala sa Kasulatan: "Milanog sa tibuok kalibutan ang ilang tingog, miabot sa mga utlanan sa kalibotan ang ilang mga pulong."

SALMO RESPONSORYO

Ps. 19: 2-3. 4-5

Ang ilang mensahe migula latas sa tibuok kalibutan.

Ang imong mga pulong, Ginoo, espiritu ug kinabuhi.

Ang mga langit nagpadayag sa himaya sa Dios, ug ang kahitas-an nagsangyaw sa buhat sa iyang kamut. Ang adlaw nagsulti ngadto sa sunod adlaw, ang gabii nagapahibalo ngadto sa sunod gabii.

Ang ilang mensahe migula latas sa tibuok kalibutan.

Ang imong mga pulong, Ginoo, espiritu ug kinabuhi.

Walay usa ka pulong ni usa ka pakigsulti kansang tingog wala madungog; latas sa tibuok yuta milanog ang ilang tingog, ug hangtod sa kinatumyan sa kalibotan, miabot ang ilang mensahe.

Ang ilang mensahe migula latas sa tibuok kalibutan.

Ang imong mga pulong, Ginoo, espiritu ug kinabuhi.

PAGBASA SA SANTOS NGA EBANGHELYO SUMALA NI SAN MATEO

Mt. 4: 18-22

Samtang naglakaw si Jesus daplin sa Lanaw sa Galilea, nakita niya ang duha ka magsuon nga mananagat, si Simon (nga ginganlag Pedro) ug si Andres nga iyang igsuon, nga namukot. Si Jesus miingon kanila, "Kuyog kamo kanako ug tudloan ko kamo sa pagpanagat ug mga tawo." Dihadiha gibiyaan nila ang ilang mga pukot ug mikuyog kaniya. Mipadayon siya paglakaw ug nakita niya ang laing duha ka magsuon, si Santiago ug si Juan nga mga anak ni Sebedeo. Didto sila sa ilang sakayan uban sa ilang amahan, nagpuna sa ilang mga pukot. Gitawag sila ni Jesus, ug dihadiha gibiyaan nila ang ilang sakayan ug ang ilang amahan, ug mikuyog sila kaniya.