Unang Domingo sa Adbiyento

PAGBASA GIKAN SA BASAHON NI PROPETA ISAIAS

Is. 63: 16-17. 19; 64: 2-7

Kay ikaw mao ang among Amahan, bisan tuod wala makaila kanamo ang among katigulangan, si Abraham ug si Jacob, ikaw kanunay maoy nagluwas kanamo. Ginoo, nganong gitugotan mo man nga mahisalaag kami gikan sa imong dalan, ug mahimong mogahi ang among ulo nga maoy nakapawala sa among kahadlok kanimo? Tungod sa imong mga alagad, kaloy-i intawon ang imong katawhan. Nahisama kami sa mga tawo nga wala mo harii, ug dili mo katawhan. Mangurog sila sama sa tubig; nga mobukal kon initon. Ngari ug ipadayag ang imong gahom ngadto sa imong mga kaaway aron mangurog ang kanasuran. Sa dihang naghimo kag makalilisang buhat nga wala namo paabota, nanaog ka ug nangurog ang kabukiran tungod sa kahadlok kanimo. Sukad masukad wala pa gayoy nakadungog ni may nakakita og Dios nga sama kanimo, Dios nga motabang niadtong mosalig kanimo. Kahimut-an mo ang nagkinabuhig matarong, ug nagtuman sa imong sugo. Nasuko ka sa dihang nakasala kami, ug nagpadayon kami sa pagpakasala. Sama kami sa tawong sad-an ug ang among matarong nga buhat ingon lamang sa hugawng pahiran. Nangalaya kami daw dahon, ang among pagkadautan daw hangin nga mipadpad kanamo. Wala gayoy misangpit sa imong ngalan, ug mibangon aron pagkupot kanimo; kay gilingiw mo man ang imong nawong ug gipasagdan mo kami tungod sa among mga sala. Apan Amahan ka gihapon namo, O Ginoo; kami ang lapok, ikaw ang magkukolon; kaming tanan imong mga binuhat.

SALMO RESPONSORYO

Ps. 80: 2-3. 15-16. 18-19

Ginoo pabalika kami kanimo, pakitaa kami sa imong nawong ug maluwas kami.

O Magbalantay sa Israel, pamati gikan sa imong trono diha sa kerubin, padan-ag. Dasiga ang imong gahom ug umari ka aron pagluwas kanamo.

Ginoo pabalika kami kanimo, pakitaa kami sa imong nawong ug maluwas kami.

O Ginoo sa kagahuman, dung-awa kami pag-usab gikan sa langit, ug tan-awa kami; Atimana pag-ayo kining parasan, ug bantayi ang tanom sa imong kamut nga tuo (ang anak sa tawo nga imong gihimong makusganon.)

Ginoo pabalika kami kanimo, pakitaa kami sa imong nawong ug maluwas kami.

Matabangan unta nimo ang tawo sa imong tuong kamut, pinaagi sa anak sa tawo nga imong gihimong makusganon. Unya dili na kami mapahilayo kanimo; tagai kamig bag-ong kinabuhi ug sangpiton namo ang imong ngalan.

Ginoo pabalika kami kanimo, pakitaa kami sa imong nawong ug maluwas kami.

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 1: 3-9

Ang Dios nga atong Amahan ug ang Ginoong Jesucristo maghatag unta kaninyog grasya ug kalinaw. Sa kanunay nagpasalamat ako sa Dios alang kaninyo tungod sa grasya nga iyang gihatag kaninyo pinaagi kang Cristo Jesus. Kay diha sa pagkahiusa ninyo kang Cristo, nadato kamo sa tanang butang lakip sa tanang pagpanulti ug sa tanang kahibalo. Ang mensahe mahitungod kang Cristo nakagamot na kaninyo, ug tungod niini nakadawat kamo sa tanang panalangin, samtang nagpaabot kamo sa pagpadayag sa atong Ginoong Jesucristo. Lig-onon usab kamo niya hangtod sa katapusan aron wala unyay ikasaway kaninyo sa adlaw sa pagbalik sa atong Ginoong Jesucristo. Kasaligan ang Dios nga nagtawag kaninyo aron mahiusa sa iyang Anak nga si Jesucristo nga atong Ginoo.

PAGBASA SA SANTOS NGA EBANGHELYO SUMALA NI SAN MARKOS

Mk. 13: 33-37

Si Jesus miingon sa iyang mga tinun-an: "Busa pagbantay ug pagtukaw kamo, kay wala kamo masayod kanus-a kini moabot. Sama kini sa usa ka agalon nga mopanaw sa layong dapit. Sa dili pa siya mogikan hatagan niyag buluhaton ang tagsatagsa ka mga sulugoon, ug pahimangnoan ang guwardiya sa pultahan nga magbantay kanunay. Busa pagtukaw kamo, kay wala ninyo hibaloi kanus-a ang agalon mopauli—sa hapon ba, sa tungang gabii ba, o sa dili pa ang kaadlawon, kon sa buntag ba. Kon mokalit siya pag-abot kinahanglan nga dili kamo niya hikaplagan nga mangatulog! Ang gisulti ko kaninyo, gisulti ko usab sa tanan. Busa pagbantay kamo!"