Sabado sa Ikakatloa'g Upat nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 22: 1-7

Gipakita usab sa anghel kanako ang suba sa tubig sa kinabuhi nga nagpangidlap daw bildo; naggikan ang maong suba sa trono sa Dios ug sa Nating Karnero, ug midagayday kini sa taliwala sa dalan sa siyudad. Sa isigkadaplin sa suba may kahoy nga naghatag sa kinabuhi nga mamungag kausa matag bulan, ug ang mga dahon niini tambal alang sa kanasuran. Walay bisan unsa nga tinunglo sa Dios hikaplagan diha sa siyudad. Anaa sa siyudad ang trono sa Dios ug sa Nating Karnero, ug simbahon siya sa mga alagad niya. Makakita sila sa nawong niya ug ang iyang ngalan isulat diha sa ilang agtang. Didto wala nay gabii ug dili na sila magkinahanglan ug mga suga o kahayag sa adlaw, kay ang Ginoong Dios mao may ilang kahayag, ug maghari sila hangtod sa kahangturan. Unya miingon ang anghel kanako, "Matuod kining mga pulong ug kasaligan. Ang Ginoong Dios nga naghatag sa iyang Espiritu ngadto sa mga propeta nagsugo sa iyang anghel aron ipakita ngadto sa iyang mga alagad ang mga butang nga mahitabo sa dili madugay." Miingon si Jesus, "Mobalik ako sa dili madugay. Bulahan kadtong nag-amping sa gipanagna dinhi niining libroha!"

SALMO RESPONSORYO

Ps. 95: 1-2. 3-5. 6-7

Maranatha! Umari ka, Ginoo Jesus!

Umari kamo, awitan ta nga malipayon ang Ginoo; ilhon ta ang Bato sa atong kaluwasan. Yukboan ta siya uban sa pasalamat; awitan ta siya nga masadya ug mga salmo.

Maranatha! Umari ka, Ginoo Jesus!

Kay ang Ginoo halangdon nga Dios, ug usa ka dakong hari labaw sa tanang mga Dios; Sa iyang mga kamut anaa ang mga kahiladman sa yuta, ug ang kinatumyan sa kabukiran iyaha usab. Iyaha ang dagat, kay siya man ang nagbuhat niini, ug ang mamala, nga giumol sa iyang mga kamut.

Maranatha! Umari ka, Ginoo Jesus!

Umari kamo, moduko kita diha sa pagsimba; mangluhod kita atubangan sa Ginoo nga nagbuhat kanato. Kay siya man ang Atong Dios, ug kita ang katawhan nga iyang gidumala, ang panon nga iyang gitultolan.

Maranatha! Umari ka, Ginoo Jesus!

PAGBASA SA SANTOS NGA EBANGHELYO SUMALA NI SAN LUKAS

Lk. 21: 34-36

Si Jesus miingon sa iyang mga tinun-an: "Busa pagbantay kamo! Ayaw kamo patuyang sa pagkaon ug pag-inom sa makahubog nga ilimnon, ug ayaw kamo padaog sa mga kabalaka mahitungod niining kinabuhia, kay tingali unyag hikalitan kamo niadtong Adlawa; kay moabot kini sa tanang mga tawo sa tibuok kalibutan ingon sa usa ka lit-ag. Busa pagbantay gayod kamo ug pag-ampo kanunay nga makabaton kamog kalig-on, aron makaatubang kamo nga dili maunsa niining tanan nga mahitabo, ug makabarog sa atubangan sa Anak sa Tawo."