Biyernes sa Ikakatloa'g Upat nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 20: 1-4. 11 - 21: 2

Unya nakita ko ang usa ka anghel nga mikunsad gikan sa langit. Nagdala siyag dakong kadena ug yawe alang sa bung-aw nga dili matugkad. Gidakop niya ang dragon, ang karaang bitin nga mao ang Yawa o Satanas, ug gigapos niya sulod sa usa ka libo ka tuig. Gitambog sa anghel ang yawa ngadto sa bung-aw, unya iyang gisirhan ug gitrangkahan aron ang yawa dili na makapanlimbong sa mga kanasuran hangtod nga matapos ang usa ka libo ka tuig. Tapos niana, buhian siya sulod sa mubong panahon. Unya nakita ko ang mga trono ug ang mga naglingkod niini; gihatagan silag gahom sa paghukom. Nakita ko usab ang mga kalag niadtong gipamunggotan tungod sa pagsangyaw nila sa kamatuoran nga gipadayag ni Jesus, ug tungod sa pulong sa Dios. Wala sila mosimba sa mananap ni sa iyang larawan, ni napatikan ang ilang agtang ug kamut sa timaan sa mananap. Nabanhaw sila ug naghari uban kang Cristo sulod sa usa ka libo ka tuig. Unya nakita ko ang dako ug puti nga trono ug ang naglingkod niini. Mikalagiw ang yuta ug ang langit gikan sa naglingkod sa trono ug wala na kini makita pag-usab. Ug nakita ko ang mga patay, inila ug dili inila, nga nagbarog atubangan sa trono. Gibukhad ang mga libro, ug may lain pa gayong librong gibukhad nga mao ang libro sa kinabuhi. Gihukman ang mga patay sumala sa ilang binuhatan nga nahisulat sa mga libro. Unya ang kadagatan, ang Kamatayon ug ang Hades mitugyan sa mga patay nga diha kanila ug gihukman silang tanan sumala sa ilang binuhatan. Unya gitambog ang Kamatayon ug ang Hades ngadto sa linaw nga kalayo. Kining linaw sa kalayo mao ang ikaduhang kamatayon. Ang tanan kansang ngalan wala mahisulat sa libro sa kinabuhi gitambog ngadto sa linaw nga kalayo. Unya nakita ko ang usa ka bag-ong langit ug bag-ong yuta, kay nahanaw na man ang unang langit ug ang unang yuta ingon man ang dagat. Nakita ko usab nga mikunsad gikan sa langit ang Balaang Siyudad, ang bag-ong Jerusalem nga gikan sa Dios, nga sama sa kaslonong babaye nga andam na sa pagsugat sa iyang pamanhunon.

SALMO RESPONSORYO

Ps. 84: 3. 4. 5-6. 8

Dinhi nagapuyo ang Dios taliwala sa iyang lungsod.

Ang akong kalag nangandoy ug gihidlaw sa mga kahawanan sa Ginoo. Ang akong kasingkasing ug akong lawas nagasinggit alang sa buhi nga Dios.

Dinhi nagapuyo ang Dios taliwala sa iyang lungsod.

Bisan ang goriyon nakakaplag og puloy-anan ug ang sayaw usa ka salag nga kabutangan sa iyang mga piso. Mao usab ang imong altar, O Ginoo sa kagahuman, akong hari ug akong Dios.

Dinhi nagapuyo ang Dios taliwala sa iyang lungsod.

Bulahan sila nga nagapuyo sa imong balay, kay sa kanunay nagadayeg sila kanimo. Bulahan ang mga tawo kansang kusog mao ikaw, mag-uswag sila gikan sa kusog ngadto sa kusog.

Dinhi nagapuyo ang Dios taliwala sa iyang lungsod.

PAGBASA SA SANTOS NGA EBANGHELYO SUMALA NI SAN LUKAS

Lk. 21: 29-33

Unya gisuginlan sila ni Jesus niining sambingaya: "Hinumdomi ninyo ang kahoyng igera ug ang tanang mga kahoy. Kon makita ninyo nga manahon na sila, mahibalo kamo nga duol na ang ting-init. Sa ingon usab, inigkakita ninyo nga mahitabo kining mga butanga, mahibaloan ninyo nga hapit na maghari ang Dios." "Timan-i kini: mahitabo kining tanan sa dili pa mangamatay ang mga tawo nga karon buhi pa. Ang langit ug ang yuta mangahanaw, apan dili gayod mapakyas ang akong gisulti."