Huwebes sa Ikakatloa'g Upat nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 18: 1-2. 21-23; 19: 1-3. 9

Tapos niini, nakita ko ang laing anghel nga nanaog gikan sa langit. May dako siyang gahom ug nahayagan ang tibuok kalibutan sa iyang kadan-ag. Misinggit siya, "Napukan na! Napukan na gayod ang gamhanang Babilonia! Karon nahimo na siyang puloy-anan sa mga demonyo ug sa mga dautang espiritu, ug sa tanang hugaw og dulomtanang kalanggaman." Unya usa ka gamhanang anghel mipunit og bato nga sama kadako sa dakong galingan ug gitambog kini ngadto sa dagat ug miingon siya, "Sama niini kamakalilisang ang pagkapukan sa dakong siyudad sa Babilonia, ug dili na gayod siya makita pag-usab. Diha kanimo dili na gayod madungog pag-usab ang mga honi sa mga alpa ug sa mga musikero nga hanas sa mga plawta ug trumpeta. Dili na gayod hikaplagan diha kanimo ang mga manggagama sa bisan unsa; ug dili na gayod mabati pag-usab diha kanimo ang tingog sa galingan. Dili na gayod makita diha kanimo ang hayag sa suga ni mabati pa diha kanimo ang tingog sa pamanhonon ug sa pangasaw-onon. Ang imong mga negosyante maoy labing gamhanan sa tibuok kalibutan ug gilimbongan mo pinaagi sa mga salamangka ang tanang katawhan sa kalibutan!" Tapos niini, nadungog ko ang daw magahob nga tingog sa dakong panon sa katawhan didto sa langit nga nag-ingon, "Dayga ang Dios! Ang kaluwasan, ang himaya ug ang gahom iya sa atong Dios! Matuod ug matarong ang iyang mga hukom! Kay gisilotan niya ang nabantog nga dautang babaye nga maoy nagduhig sa kalibutan sa iyang kaulag. Gisilotan siya sa Dios tungod kay gipatay man niya ang mga sulugoon sa Dios." Misinggit sila pag-usab, "Dayga ang Dios! Ang aso gikan sa dakong siyudad nga nasunog nag-utbo sa walay katapusan!" Unya miingon ang anghel kanako, "Isulat kini: Bulahan ang gidapit pagtambong sa bangkite sa kasal sa Nating Karnero." Ug miingon pa gayod ang anghel, "Mao kini ang matuod nga mga pulong sa Dios."

SALMO RESPONSORYO

Ps. 100: 1. 2. 3. 4. 5

Bulahan sila nga gidapit alang sa bangkite sa kasal sa Kordero.

Awiti nga masadya ang Ginoo; kamong tibuok yuta, alagari nga malipayon ang Ginoo; duol kamo kaniya sa masadya nga awit.

Bulahan sila nga gidapit alang sa bangkite sa kasal sa Kordero.

Sayri ninyo nga ang Ginoong Dios, siya ang nagbuhat kanato, iyaha gayod kita; ang iyang lungsod ug panon nga iyang gidumala.

Bulahan sila nga gidapit alang sa bangkite sa kasal sa Kordero.

Sulod kamo nga mapasalamaton sa iyang ganghaan, sulod sa iyang kahawanan uban sa pagdayeg; pasalamati ninyo siya ug dayga ang iyang ngalan.

Bulahan sila nga gidapit alang sa bangkite sa kasal sa Kordero.

Ang Ginoo maayo; ang iyang kaluoy nagalungtad sa kahangturan, ug ang iyang kamatinumanon, ngadto sa tanang kaliwatan.

Bulahan sila nga gidapit alang sa bangkite sa kasal sa Kordero.

PAGBASA SA SANTOS NGA EBANGHELYO SUMALA NI SAN LUKAS

Lk. 21: 20-28

Si Jesus miingon sa iyang mga tinun-an; "Kon makita ninyo nga ang Jerusalem likosan na sa mga kasundalohan, masayran ninyo nga laglagon na kini sa dili madugay. Unya ang nagpuyo sa Judea kinahanglang managan ngadto sa kabungtoran, ug kadtong atua sa mga siyudad kinahanglang mamahawa usab, ug ang nagpuyo sa banika kinahanglang dili moadto sa siyudad. Kay mao kini 'Ang mga Adlaw sa Pagsilot,' aron pagtuman sa tanan nga giingon sa Kasulatan. Pagkaalaut gayod sa mga mabdos ug sa mga inahan nga may mga masuso niadtong mga adlawa! Moabot ang makalilisang nga kalisdanan niining yutaa, ug hiagoman niining maong katawhan ang kapungot sa Dios. Pamatyon sila pinaagi sa espada ug bihagon ngadto sa tanang kanasuran. Unya mailog ang Jerusalem sa mga tawo nga wala motuo sa Dios hangtod matapos ang gitagal nga panahon sa ilang pagmando." "Aduna unyay mga ilhanan diha sa adlaw ug sa bulan ug sa kabitoonan. Kawad-an sa paglaum ang mga nasod, ug mangalisang sila sa dinaguok sa dagat ug sa nagpungasi nga mga balod. Panguyapan ang mga tawo tungod sa kalisang samtang magpaabot sila sa mahitabo sa tibuok kalibutan; kay ang mga planeta sa kawanangan motipas sa ilang naandang agianan. Unya motungha ang Anak sa Tawo—moabot siya nga may gahom ug himaya diha sa panganod. Inigsugod nag kahitabo niining mga butanga, tindog ug hangad kamo kay duol na ang inyong kaluwasan."