Miyerkoles sa Ikakatloa'g Upat nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 15: 1-4

Unya nakita ko ang laing dako ug kahibulongang talan-awon didto sa langit. Ang nakita ko pito ka anghel nga nagdalag pito ka katalagman. Kini ang katapusang mga katalagman kay katapusan man kining pagpakita sa kapungot sa Dios. Ug nakita ko ang sama sa bildong dagat nga sinambogan og kalayo; nakita ko usab ang mga tawo nga nakabuntog sa mananap ug sa iyang larawan ug kaniya kansang ngalan gisimbolohan sa usa ka numero. Nagbarog sila sa daplin sa bildong dagat ug nagdalag mga alpa nga hinatag sa Dios. Nag-awit sila sa awit ni Moises, ang sulugoon sa Dios, ug sa awit sa Nating Karnero: "Ginoong Dios nga Labing Gamhanan, Pagkakahibulongan sa imong mga buhat! Hari sa tanang kanasuran, matarong ug matuod gayod ang imong mga paagi! Kinsa bay dili mahadlok kanimo, Ginoo? Kinsa bay magdumili pagsangyaw sa imong pagkagamhanan? Kay ikaw lamang ang balaan. Moduol ug mosimba kanimo ang tanang kanasuran. Kay nakita sa tanan ang matarong mong mga buhat."

SALMO RESPONSORYO

Ps. 98: 1. 2-3. 7-8. 9

Dako ug katingalahan ang tanan mong mga buhat, Ginoong Dios nga gamhanan.

Awiti ang Ginoo og usa ka bag-ong awit, kay naghimo siya og katingalahang mga buhat; ang iyang tuong kamut nakadangat og kadaugan alang kaniya, ang iyang balaan nga bukton.

Dako ug katingalahan ang tanan mong mga buhat, Ginoong Dios nga gamhanan.

Ang Ginoo nagpahibalo sa iyang kaluwasan: sa atubangan sa kanasuran iyang gipadayag ang iyang katarong. Nahinumdom siya sa iyang kaluoy ug sa iyang kamatinud-anon, alang sa balay ni Israel.

Dako ug katingalahan ang tanan mong mga buhat, Ginoong Dios nga gamhanan.

Palanoga ang kadagatan ug ang nagapuno niini, ang kalibutan ug sila nga nagapuyo niini; Papamakpaka ang kasapaan, pasinggita ang masadya nga kabukiran.

Dako ug katingalahan ang tanan mong mga buhat, Ginoong Dios nga gamhanan.

Atubangan sa Ginoo, kay moabot siya, moabot siya aron pagmando sa yuta; magmando siya sa kalibutan uban sa katarong ug sa katawhan uban sa iyang kamakanunayon.

Dako ug katingalahan ang tanan mong mga buhat, Ginoong Dios nga gamhanan.

PAGBASA SA SANTOS NGA EBANGHELYO SUMALA NI SAN LUKAS

Lk. 21: 12-19

Si Jesus miingon sa iyang mga tinun-an: "Sa dili pa mahitabo kining mga butanga, dakpon kamo ug lutoson; taralon kamo ngadto sa mga sinagoga ug bilangguon, ug dad-on kamo atubangan sa mga hari ug sa mga punoan tungod kanako. Mao unya kini ang higayon nga makasangyaw kamo sa Maayong Balita. Sa dili pa kini mahitabo, usaha ang inyong hunahuna nga dili kamo mabalaka kon unsaon ninyo pagpanalipod sa inyong kaugalingon; kay hatagan kamog igsusulti ug kaalam nga walay usa sa inyong mga kaaway nga makatubag o makapanghimakak. Budhian kamo bisan gani sa inyong mga ginikanan ug mga igsuon, ingon man sa inyong mga paryenti ug mga higala; ug patyon nila ang pipila kaninyo. Magdumot kaninyo ang tanan tungod kanako, apan walay bisan usa ka buhok sa inyong ulo nga mawala. Pabilin kamo nga malig-on kay niining paagiha maluwas kamo."