[M] San Andres Dunglac, pari, ug mga kauban, mga martir

PAGBASA GIKAN SA BASAHON SA ANG GIPADAYAG

Rv. 14: 14-19

Samtang ako, si Juan nagtan-aw, nakita ko ang usa ka puting panganod ug naglingkod diha sa panganod nga sama sa tawo nga may koronang bulawan sa iyang ulo ug nagbitbit siyag hait nga galab. Unya may laing anghel nga migula sa templo ug misinggit kaniya nga naglingkod sa panganod, "Galaba ang alanihon kay miabot na ang hustong panahon, ug hinog na gayod ang alanihon sa kalibutan!" Busa gigalab sa naglingkod sa panganod ang alanihon ug gianihan ang kalibutan. Unya nakita ko ang laing anghel nga migula sa templo didto sa langit ug may dala usab siyang hait nga galab. Ug may lain pa gayong anghel nga migula gikan sa halaran; siyay nagbantay sa kalayo. Misinggit siya sa anghel nga nagdalag hait nga galab, "Gamita ang imong galab ug abisa ang mga ubas sa parasan sa kalibutan kay hinog na." Busa gigalab sa anghel ang mga ubas ug giitsa ngadto sa pug-anan sa dakong kapungot sa Dios.

SALMO RESPONSORYO

Ps. 96: 10. 11-12. 13

Moabot ang Ginoo aron paghukom sa yuta.

Isulti diha sa kanasuran: Ang Ginoo hari. Gihimo niya ang kalibutan nga malig-on, aron dili gayod matarog; nagadumala siya sa iyang lungsod uban sa kaangayan.

Moabot ang Ginoo aron paghukom sa yuta.

Maglipay ang kalangitan ug magsadya ang yuta; molanog ang dagat ug ang nakapuno niini; magsadya ang kapatagan ug ang tanan nga anaa kanila.

Moabot ang Ginoo aron paghukom sa yuta.

Manglukso sila sa kasadya atubangan sa Ginoo kay nagaabut siya; nagaabut siya aron maghari sa yuta. Maghari siya sa kalibutan uban sa kaangayan ug sa kalungsoran uban sa iyang kamakanunayon.

Moabot ang Ginoo aron paghukom sa yuta.

PAGBASA SA SANTOS NGA EBANGHELYO SUMALA NI SAN LUKAS

Lk. 21: 5-11

Dihay pipila kanila nga naghisgot bahin sa Templo kon unsa kini katahom tan-awon nga gidayandayanan sa maanindot nga mga bato, ug sa mga gasa nga gihalad ngadto sa Dios. Unya miingon si Jesus, "Kining tanan nakita ninyo apan moabot ang panahon nga walay bisan usa ka bato nga magpabilin sa nahimutangan niini; ang tanan tumpagon gayod." "Magtutudlo," nangutana sila, "kanus-a ba kini mahitabo? Ug unsa man ang ilhanan nga magpaila nga moabot na ang panahon nga kini matuman?" Si Jesus miingon, "Pagbantay kamo ug ayaw kamo palimbong; kay daghan ang moanhi sa akong ngalan nga mag-ingon, 'Ako mao ang Cristo!' ug moingon usab, 'Miabot na ang panahon!' Apan ayaw sila tuohi. Ayaw kamo kahadlok kon makadungog kamog mga gubat ug mga kagubot; kay kining mga butanga kinahanglan nga mahitabo gayod pag-una, apan wala kini magpasabut nga duol na ang katapusan." Mipadayon siya pag-ingon, "Ang usa ka nasod makiggubat sa laing nasod, ug ang usa ka gingharian mosulong sa laing gingharian. Mahitabo unya ang makalilisang nga mga linog, gutom, ug kamatay sa tanang dapit, ingon man ang makahahadlok nga mga butang ug mga dagkong ilhanan gikan sa langit."