Lunes sa Ikakatloa'g Upat nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 14: 1-3. 4-5

Ako, si Juan, nakakita sa Nating Karnero nga nagtindog sa Bukid sa Sion, uban ang usa ka gatos ug kap-atan ka libo ka tawo, kansang mga agtang gisulatan sa iyang ngalan ug sa ngalan sa iyang Amahan. Ug nadungog ko ang usa ka tingog gikan sa langit nga sama sa dinaguok sa dakong busay ug sa masipa nga dalugdog. Ang nadungog kong tingog sama sa honi sa mga alpa. Nag-awit silag bag-ong awit atubangan sa trono ug sa upat ka buhing binuhat ug sa mga pangulo. Walay makamao sa maong awit gawas sa usa ka gatos ug kap-atan ka libo nga gitubos gikan sa kalibutan. Kini sila nagpabiling putli kay wala man sila makighilawas sa mga babaye; wala sila magminyo. Mag-uban sila sa Nating Karnero bisan asa siya; gitubos sila ug mao ang unang gihalad ngadto sa Dios ug sa Nating Karnero. Wala gayod sila makapamakak ug walay ikasaway kanila.

SALMO RESPONSORYO

Ps. 24: 1-2. 3-4. 5-6

Ginoo, mao kini ang katawhan nga nangandoy sa pagtan-aw sa imong nawong.

Sa Ginoo ang yuta ug ang iyang kapuno; ang kalibutan ug sila nga nagapuyo niini. Kay iya kining gitukod ibabaw sa kadagatan, ug iyang gibuhat ibabaw sa kasubaan.

Ginoo, mao kini ang katawhan nga nangandoy sa pagtan-aw sa imong nawong.

Kinsay makatungas sa bukid sa Ginoo? o kinsay makabarog sa iyang balaang dapit? Siya kansang mga kamut walay mga sala kansang kasingkasing malinis. Siya nga wala magtinguha sa mga butang nga walay-hinungdan.

Ginoo, mao kini ang katawhan nga nangandoy sa pagtan-aw sa imong nawong.

Ganti gikan sa Dios nga iyang manluluwas. Mao kini ang kaliwat nga nangita kaniya, nga nangita sa nawong sa Dios ni Jacob.

Ginoo, mao kini ang katawhan nga nangandoy sa pagtan-aw sa imong nawong.

PAGBASA SA SANTOS NGA EBANGHELYO SUMALA NI SAN LUKAS

Lk. 21: 1-4

Nakita ni Jesus ang mga dato nga nanghulog sa ilang mga gasa sa panudlanan sa Templo. Nakita usab niya ang usa ka biyuda nga kabus kaayo nga naghulog ug duha ka dako, ug miingon si Jesus, "Sultihan ko kamo nga kining kabus nga biyuda labaw gayod ug gikahatag kay kanilang tanan. Kay ang uban naghalad man sa ilang mga gasa nga sobra na sa ilang bahandi, apan siya, bisan pa sa iyang kakabus, mihatag sa tanan nga iyang gikabuhian."