[M] Ang Paghalad didto sa Templo sa Bulahang Birhen Maria
PAGBASA GIKAN SA BASAHON NI PROPETA ZACARIAS
Zec. 2: 14-17
Miingon ang Ginoo, "Pag-awit kamo ug paglipay, O mga anak nga babaye sa Sion, kay moanhi ako ug mopuyo diha kaninyo." Niadtong panahona daghang mga nasod modangop sa Ginoo, ug sila maiyang katawhan. Ug mopuyo siya uban kanila, ug hibaloan unya nila nga ang Ginoo nga Labing Gamhanan maoy nagpadala kaniya ngadto kanila. Ug maiya sa Ginoo ang Juda ingon nga iyang bahin sulod sa balaang yuta, ug pilion niya pag-usab ang Jerusalem. Paghilom kamo atubangan sa Ginoo, kay moanhi siya gikan sa iyang balaang puloy-anan.
ANG PULONG SA GINOO
SALMO RESPONSORYO
Lk. 1: 46-47. 48-49. 50-51. 52-53. 54-55
Ang Dios nga makagagahum naghimog dagkong mga butang dinhi kanako, santos ang iyang ngalan.
O Bulahang Birhen Maria, Inahan sa Anak sa Amahan.
Miingon si Maria: "Nagasangyaw ako sa kadako sa Ginoo ang akong espiritu nalipay diha sa Dios, ang akong manunubos."
Ang Dios nga makagagahum naghimog dagkong mga butang dinhi kanako, santos ang iyang ngalan.
O Bulahang Birhen Maria, Inahan sa Anak sa Amahan.
Kay nanumbaling man siya pagtan-aw sa iyang ulipon diha sa iyang kaubos; ang tanang kaliwatan magtawag kanako nga bulahan. Ang Dios nga makagagahum naghimog dagkong mga butang dinhi kanako, santos ang iyang ngalan.
Ang Dios nga makagagahum naghimog dagkong mga butang dinhi kanako, santos ang iyang ngalan.
O Bulahang Birhen Maria, Inahan sa Anak sa Amahan.
Ang iyang kaluoy gikan sa katuigan ngadto sa katuigan alang kanila nga mahadlokon kaniya. Ang gigutom gibuhong niya sa tanang mga kaayohan, samtang ang adunahan gihinginlan niya nga walay dala.
Ang Dios nga makagagahum naghimog dagkong mga butang dinhi kanako, santos ang iyang ngalan.
O Bulahang Birhen Maria, Inahan sa Anak sa Amahan.
Gipabarog niya si Israel iyang sulugoon, kay nahinumdom siya sa iyang kaluoy; Ingon sa iyang gisaad sa atong mga katigulangan, kang Abraham ug sa iyang kaliwat hangtod sa kahangturan.
Ang Dios nga makagagahum naghimog dagkong mga butang dinhi kanako, santos ang iyang ngalan.
O Bulahang Birhen Maria, Inahan sa Anak sa Amahan.
PAGBASA SA SANTOS NGA EBANGHELYO SUMALA NI SAN MATEO
Mt. 12: 46-50
Samtang nakigsulti pa si Jesus ngadto sa katawhan, miabot ang iyang inahan ug mga igsuong lalaki. Nagtindog sila didto sa gawas ug buot makigsulti kaniya. Unya usa sa mga tawo didto miingon kaniya, "Ang imong inahan ug mga igsuon atua sa gawas, ug buot sila makigsulti kanimo." Si Jesus mitubag, "Kinsa man ang akong inahan? Kinsa man ang akong mga igsuon?" Unya gitudlo niya ang iyang mga tinun-an ug miingon, "Tan-awa! Kini sila mao ang akong inahan ug ang akong mga igsuon. Kay ang nagbuhat sa gisugo sa akong Amahan nga atua sa langit mao ang akong inahan ug mga igsuon."
ANG EBANGHELYO SA GINOO
