Biyernes sa Ikakatloa'g Tulo nga Semana sa Ordinaryong Panahon
PAGBASA GIKAN SA BASAHON SA ANG GIPADAYAG
Rv. 10: 8-11
Unya nadungog ko na usab ang tingog gikan sa langit nga miingon, "Kuhaa ang binukhad nga basahon nga gikuptan sa anghel nga nagbarog sa dagat ug sa yuta." Busa giduol ko ang anghel aron sa pagpangayo kaniya sa gamayng basahon; ug miingon siya kanako, "Kuhaa kini ug kan-a; tam-is kini sama sa dugos samtang anha pa sa imong ba-ba, apan pait kon matulon mo na." Ug gikuha ko ang gamayng basahon gikan sa iyang kamut ug gikaon ko kini; tam-is kini daw dugos sa diha pa sa akong ba-ba, apan nahimong pait sa natulon ko na. Unya giingnan ako, "Kinahanglan isangyaw mo pag-usab ang mensahe sa Dios ngadto sa daghang katawhan, mga nasod, mga pinulongan, ug mga hari!"
ANG PULONG SA GINOO
SALMO RESPONSORYO
Ps. 119: 14. 24. 72. 103. 111. 131
Katam-is tagamtamon sa imong saad.
Sa paagi sa imong mga gimbut-an nalipay ako ingon og diha sa tanang mga bahandi.
Katam-is tagamtamon sa imong saad.
Oo, ang imong mga sugo mao ang akong kalipay; sila ang akong mga magtatambag.
Katam-is tagamtamon sa imong saad.
Ang balaod sa imong baba mas bililhon alang kanako kaysa linibo nga bulawan ug plata.
Katam-is tagamtamon sa imong saad.
Katam-is tagamtamon sa imong mga saad, mas matam-is kay sa dugos alang sa akong ba-ba.
Katam-is tagamtamon sa imong saad.
Ang imong mga sugo maoy akong sulondon hangtod sa kahangturan; sila ang kalipay sa akong kasingkasing.
Katam-is tagamtamon sa imong saad.
Naghingahinga ako sa kahidlaw alang sa imong mga sugo.
Katam-is tagamtamon sa imong saad.
PAGBASA SA SANTOS NGA EBANGHELYO SUMALA NI SAN LUKAS
Lk. 19: 45-48
Si Jesus misulod sa Templo ug giabog niya ang mga nagpatigayon didto; ug giingnan niya sila, "Nahisulat sa Kasulatan nga ang Dios nag-ingon, 'Ang akong balay tawgon nga balay-alampoanan,' apan gihimo ninyo kini nga taguanan sa mga tulisan!" Si Jesus nagtudlo didto sa Templo sa matag adlaw. Ang mga kadagkoan sa mga pari, ang mga magtutudlo sa Balaod, ug ang mga pangulo sa mga tawo buot mopatay kaniya, apan wala silay nahimo tungod kay ang tanang tawo nagpadayon man pagpamati sa tanan niyang gisulti.
ANG EBANGHELYO SA GINOO
