Huwebes sa Ikakatloa'g Tulo nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 5: 1-10

Nakita ko ang usa ka linukot nga basahon diha sa tuong kamut niadtong naglingkod sa trono; gisulatan kini sa sulod ug sa gawas ug gisirhan ug pito ka silyo. Ug nakita ko ang usa ka gamhanang anghel nga nagsinggit, "Kinsa bay takos makatangtang sa mga silyo ug sa pagbukhad sa linukot nga basahon?" Apan walay bisan kinsa sa langit o sa yuta o sa ilalom sa yuta nga takus makabukhad sa linukot nga basahon ug sa pagtan-aw sa sulod niini. Naghilak ako pag-ayo kay wala may nakaplagan nga takos sa pagbukhad sa basahon ug sa pagtan-aw sa sulod niini. Unya usa sa mga pangulo miingon kanako, "Ayaw paghilak, kay ang Liyon sa banay ni Juda, ang gamhanang kaliwat ni David, midaog ug makatangtang siya sa pito ka silyo ug makabukhad sa linukot nga basahon." Unya nakita ko ang usa ka Nating Karnero nga nagtindog taliwala sa trono nga gilibotan sa upat ka buhing binuhat ug sa mga pangulo. Ang Nating Karnero daw miagig pagkamatay. May pito kini ka sungay ug pito ka mata nga mao ang pito ka espiritu sa Dios nga gipasuroy sa tibuok kalibutan. Giduol sa Nating Karnero ang naglingkod sa trono ug gikuha niya ang linokut nga basahon gikan sa iyang tuong kamut. Sa dihang gihimo niya kini, ang upat ka binuhat ug ang kawhaag-upat ka pangulo nanghapa atubangan sa Nating Karnero. Ang matag usa kanila may dalang alpa ug mga bulawang panaksan nga puno sa insenso nga mao ang pag-ampo sa katawhan sa Dios. Nag-awit sila ug bag-ong awit: "Takos ka sa pagkuha sa linukot nga basahon ug sa pagtangtang sa mga silyo niini. Kay gipatay ka ug pinaagi sa imong kamatayon gitubos mo ang katawhan alang sa Dios, gikan sa tanang banay, pinulongan, katawhan, ug kanasuran. Gihimo mo silang gingharian sa mga pari aron magalagad sa atong Dios; Ug maghari sila sa kalibutan."

SALMO RESPONSORYO

Ps. 149: 1-2. 3-4. 5-6. 9

Gihimo kita sa Kordero nga usa ka gingharian sa mga pari aron mag-alagad sa atong Dios.

Aleluya.

Awiti ang Ginoo og usa ka bag-ong awit sa pagdayeg diha sa pundok sa mga nagtuo kaniya. Palipaya ang Israel diha sa ilang magbubuhat, ang mga anak sa Sion palipaya diha sa ilang hari.

Gihimo kita sa Kordero nga usa ka gingharian sa mga pari aron mag-alagad sa atong Dios.

Aleluya.

Padayga sila sa iyang ngalan diha sa malipayong sayaw, paawita sila kaniya og pagdayeg sa piyangpiyang ug alpa. Kay ang Ginoo nahigugma sa iyang lungsod ug gidayanan niya ang mapaubsanon sa kadaugan.

Gihimo kita sa Kordero nga usa ka gingharian sa mga pari aron mag-alagad sa atong Dios.

Aleluya.

Ang nagtuo pasadyaa diha sa himaya, paawita sila sa kasadya diha sa ilang mga higdaanan; Ang tag-as nga mga pagdayeg sa Dios maanaa sa ilang mga tutonlan; kini mao ang himaya sa tanan nga nagatuo kaniya. Aleluya.

Gihimo kita sa Kordero nga usa ka gingharian sa mga pari aron mag-alagad sa atong Dios.

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 19: 41-44

Nagkaduol na si Jesus sa siyudad ug sa iyang pagkakita niini, mihilak siya, ug miingon, "Kon nasayod ka pa unta karong adlawa kon unsa ang gikinahanglan alang sa kalinaw! Apan karon dili ka makakita niini! Kay moabot ang mga adlaw nga likosan ka sa imong mga kaaway ug alihan ka ug atakihon nila sa tanang dapit. Gun-obon ka sa hingpit ug laglagon ang mga tawo nga nagpuyo diha kanimo; walay usa ka bato nga ibilin nila sa nahimutangan niini, kay wala nimo ilha ang panahon sa pag-anhi sa Dios aron pagluwas kanimo."