Miyerkoles sa Ikakatloa'g Tulo nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 4: 1-11

Unya sa akong panan-awon, nakita ko ang usa ka binuksang pultahan didto sa langit. Ug ang tingog nga nadungog ko na nga milanog sama sa usa ka trumpeta, miingon kanako, "Saka ngari ug ipakita ko kanimo unsay mahitabo human niini." Dihadiha gigamhan ako sa Espiritu ug nakita ko didto sa langit ang usa ka trono ug may naglingkod niini. Midan-ag ang iyang nawong ingon sa hamiling mga bato sama sa haspe ug kornalina; sa palibot sa trono may bangaw nga ang kolor daw esmeralda. Gilibotan ang trono ug kawhaag-upat ka laing trono ug sa tagsa-tagsa ka trono may naglingkod nga pangulo nga nagbistig puti ug may mga koronang bulawan. Gikan sa trono nanggula ang mga kilat ug may mga dahunog ug lanog sa dalugdog. Didtoy pito ka dinagkotang mga sulo nga nagsiga atubangan sa trono; mao kini ang pito ka espiritu sa Dios. Sa atubangan sa trono dihay ingon og dagat nga bildo, tin-aw sama sa kristal. Sa matag kilid sa trono, may upat ka buhing mananap nga nalukop og mga mata sa atubangan ug sa likod. Ang unang mananap sama sa liyon; ang ikaduha sama sa nating baka; ang ikatulo samag dagway sa tawo ug ang ikaupat sama sa naglupad nga agila. Ang tagsatagsa may unom ka pako, ug sa gawas. Wala silay hunong sa ilang pag-awit adlaw ug gabii: "Balaan, balaan, balaan, ang Ginoong Dios nga Labing Gamhanan, ang kaniadto, ang karon ug ang umaabot." Sa matag higayon nga ang upat ka buhing mananap magdayeg ug magpasalamat sa naglingkod sa trono nga buhi kanunay, manghapa sa atubangan niya ang kawhaag-upat ka pangulo, ug magsimba kaniya. litsa nila ang ilang mga korona atubangan sa trono, ug mag-ingon, "Among Ginoo ug Dios! Angay kang daygon ug pasidunggan ug modawat sa gahom. Kay ikaw may nagbuhat sa tanang butang, ug naghatag kanilag kinabuhi."

SALMO RESPONSORYO

Ps. 150: 1-2. 3-4. 5-6

Santos, santos, santos nga Ginoo, Dios nga gamhanan.

Dayga ang Ginoo diha sa iyang santuwaryo, dayga siya diha sa ali sa iyang kusog. Dayga siya tungod sa iyang gamhanang mga buhat, dayga siya tungod sa iyang harianong kahalangdon.

Santos, santos, santos nga Ginoo, Dios nga gamhanan.

Dayga siya sa tingog sa trompeta, dayga siya sa lira ug alpa, dayga siya sa tamborin ug sayaw, dayga siya sa mga koldas ug plawta.

Santos, santos, santos nga Ginoo, Dios nga gamhanan.

Dayga siya sa malanog nga mga agong, dayga siya sa mga masipa nga piyangpiyang. Ang tanan nga may ginhawa padayga sa Ginoo! Aleluya.

Santos, santos, santos nga Ginoo, Dios nga gamhanan.

PAGBASA SA SANTOS NGA EBANGHELYO SUMALA NI SAN LUKAS

Lk. 19: 11-28

Unya misugilon si Jesus og usa ka sambingay ngadto sa nakadungog niini. Niadtong tungora hapit na si Jesus moabot sa Jerusalem, ug naghunahuna ang mga tawo nga hapit na mopakita ang Gingharian sa Dios. Busa miingon siya, "May usa ka tawo nga harianon nga miadto sa usa ka layong nasod aron himoong hari, ug unya mopauli siya sa ila. Sa wala pa siya mogikan, gipatawag niya ang iyang napulo ka sulugoon, ug gihatagan niya ang tagsatagsa kanila og kuwartang bulawan ug giingnan sila, 'Ipatigayon ninyo kini samtang wala ako dinhi.' Apan gikasilagan siya sa iyang mga katagilungsod, busa nagsugo silag mga tawo pag-apas kaniya aron sa pag-ingon, 'Dili kami gusto nga kining tawhana maoy maghari kanamo.'" "Apan siya nahimo gayong hari ug unya mipauli. Ug gipatawag dayon niya ang iyang mga sulugoon nga gihatagan niyag kuwarta aron hisayran niya pila ang ilang ganansiya. Ang una miadto ug miingon, 'Sir, nakaganansiya akog napulo gikan niadtong puhonan nga imong gihatag kanako.' Ug miingon ang tawong halangdon, 'Maayo, buotan ka nga sulugoon! Sanglit kasaligan ka man sa gagmayng mga butang, piyalan ko ikaw sa napulo ka siyudad.' Miadto usab ang ikaduhang sulugoon ug miingon, 'Sir, nakaganansiya akog lima gikan sa puhonan nga imong gihatag kanako.' Ang agalon miingon kaniya: 'Piyalan ko ikaw sa lima ka siyudad.' Ug ang ikatulong sulugoon miadto kaniya ug miingon, 'Sir, ania ang imong kuwartang bulawan; giputos ko gayod kini sa panyo, kay nahadlok ako kanimo, tungod kay ikaw estrikto ra ba kaayo. Nagkuha ka sa dili imo, ug nag-ani sa wala nimo ipugas.' Ug miingon siya sa iyang sulugoon: 'Wala kay hinungdan! Gamiton ko ang imong kaugalingong mga pulong sa paghukom kanimo. Nasayod ka man diay nga ako estrikto kaayo, nagkuha sa dili ako ug nag-ani sa wala ko ipugas, ngano nga ang akong kuwarta wala mo man ideposito sa bangko? Madawat ko unta kini nga may tubo sa akong pagbalik.' Unya miingon siya niadtong nagtindog didto, 'Kuhaa kanang kuwarta nga anaa kaniya ug ihatag ngadto sa sulugoon nga may napulo ka kuwartang bulawan.' Miingon sila kaniya, 'Apan Sir, duna na siyay napulo ka kuwartang bulawan!' Unya mitubag siya, 'Sultihan ko kamo nga ang tanan nga anaay iya dugangan, apan siya nga wala gayoy iya, bisan pa ang diyotay nga anaa kaniya kuhaon pa gayod. Nan, karon mahitungod sa akong mga kaaway nga dili gusto nga ako maghari kanila, dad-a sila dinhi ug pamatya sa akong atubangan.'" Si Jesus misulti niini ug unya mipadayon siya ngadto sa Jerusalem nga nag-una kanila.