[M] Santa Isabel sa Hungaria, relihiyosa

PAGBASA GIKAN SA BASAHON SA ANG GIPADAYAG

Rv. 3: 1-6. 14-22

Ako, si Juan, nakadungog sa Ginoo nga miingon kanako: "Isulat kini alang sa anghel sa simbahan sa Sardis:" "Kini ang giingon sa naghupot sa pito ka espíritu sa Dios ug sa pito ka bitoon. Nasayod ako sa imong gibuhat ug nasayod usab ako nga gidungog ka nga buhi, bisan tuod patay ka! Busa pagmata ug lig-ona ang anaa pa kanimo aron dili mamatay—kay nakita ko nga ang imong nahimo dili pa hingpit sa atubangan sa akong Dios. Busa hinumdomi kadtong pagtulon-an nga gitudlo kanimo; tumana kini ug hinulsoli ang imong mga sala. Kon dili ka magmata, moanha ako kanimo sama sa usa ka kawatan ug dili ka mahibalo sa takna sa akong pag-abot. Apan wala kabulingi ang bisti sa pipila kaninyo diha sa Sardis. Mokuyog sila kanako nga binistihag puti kay takos man sila. Ang modaog bistihag puti sama niini, ug dili ko papason ang ilang ngalan sa libro sa mga buhi. Sa atubangan sa akong Amahan ug sa iyang mga anghel ipahayag ko nga sila akong mga sakop." "Busa kon may dalunggan ka, pamati-a ang giingon sa Espiritu ngadto sa mga simbahan!" "Isulat kini alang sa anghel sa simbahan sa Laodicea:" "Kini ang giingon sa Amen, ang kasaligan ug matuod nga saksi nga mao ang sinugdanan sa tanan nga gibuhat sa Dios. Nasayod ako sa gibuhat mo; dili ka bugnaw ka na lang gayod o init ba hinoon! Apan tungod kay ikaw init-init man lamang, isuka ko ikaw! Nag-ingon ka, 'Dato ako ug maayong pagkabutang, ug walay nakulang kanako.' Apan wala ka masayod nga alaot ug makaluluoy ka kaayo! Kabos ka, hubo ug buta. Busa tambagan ko ikaw sa pagpalit gikan kanako ug lunsayng bulawan aron ka madato. Palit usab ug bisting puti nga isapot mo aron katabonan ang imong makauulawng pagkahubo. Palit usab ug tambal nga idihog sa imong mata aron ka makakita. Gibadlong ko ug gikastigo ang tanan nga akong gihigugma. Busa pagmatinud-anon ug hinulsoli ang imong mga sala. Nagtindog ako sa pultahan ug nagtuktok; kon may makadungog sa akong tingog ug moabli sa pultahan, mosulod ako sa iyang balay ug makigsalo kaniya, ug mokaon siya uban kanako. Ang modaog patuparon ko paglingkod sa akong trono, ingon nga gipalingkod ako tupad sa akong Amahan sa iyang trono tungod kay midaog man ako." "Busa kon may dalunggan ka, pamati-a ang giingon sa Espiritu ngadto sa mga simbahan!"

SALMO RESPONSORYO

Ps. 15: 2-3. 3. 4-5

Siya nga nakadaug palingkuron ko tupad kanako sa akong trono.

Siya nga nagalakaw nga walay sala ug nagabuhat sa matarong; nga nagahunahuna sa kamatuoran diha sa iyang kasingkasing ug wala magsultig dautan sa iyang dila.

Siya nga nakadaug palingkuron ko tupad kanako sa akong trono.

Siya nga wala magdagmal sa iyang isigkatawo, ni magpasangil batok sa iyang silingan; Pinaagi kaniya ang sad-an gitamay, samtang nagapasidungog siya kanila nga mahadlokon sa Ginoo.

Siya nga nakadaug palingkuron ko tupad kanako sa akong trono.

Siya nga wala magpatanto nga hilabihan sa iyang sapi ug wala modawat og soborno batok sa walay sala. Siya nga nagabuhat niining mga butanga dili gayod masamok.

Siya nga nakadaug palingkuron ko tupad kanako sa akong trono.

PAGBASA SA SANTOS NGA EBANGHELYO SUMALA NI SAN LUKAS

Lk. 19: 1-10

Si Jesus mipadayon ngadto sa Jerico ug samtang miagi siya, may usa ka dato nga ginganlag Saqueo, nga pangulo sa mga kobrador sa buhis, nga naninguha pagtan-aw kon kinsa siya. Apan mubo si Saqueo ug wala siya makakita kang Jesus tungod sa panon sa mga tawo. Busa midagan siya una sa panon ug misaka sa kahoyng sikomoro, aron makakita siya kang Jesus nga moagi niadtong dalana. Sa pag-abot na ni Jesus niadtong dapita, mihangad siya sa kahoy ug miingon kang Saqueo, "Kanaog dayon, Saqueo, kay adto ako moabot sa imong balay karong adlawa." Mikanaog si Saqueo pagdali ug sa dakong kahinangop midawat kang Jesus. Ang tanan nga nakakita niini nagbagulbol, "Kining tawhana namisita sa balay sa usa ka makasasala!" Ug mitindog si Saqueo ug miingon sa Ginoo, "Sir, paminaw! Ihatag ko ang katunga sa akong katigayonan ngadto sa mga kabus, ug kon ako nakalimbong kang bisan kinsa, ulian ko siyag upat ka pilo." Si Jesus miingon kaniya, "Karong adlawa miabot ang kaluwasan niining balaya, kay kining tawhana kaliwat usab ni Abraham. Kay mianhi ang Anak sa Tawo aron sa pagpangita ug pagluwas sa nawala."