Lunes sa Ikakatloa'g Tulo nga Semana sa Ordinaryong Panahon

PAGBASA GIKAN SA BASAHON SA ANG GIPADAYAG

Rv. 1: 1-4; 2: 1-5

Nasulat niining basahona ang mga butang nga gipadayag sa Dios kang Jesucristo, aron iyang ipakita sa mga sulugoon sa Dios ang mahitabo sa dili madugay. Ug gipadayag kini ni Cristo pinaagi sa iyang anghel ngadto sa iyang sulugoon nga si Juan. Gisugilon ni Juan ang tanan nga iyang nakita ug kini ang iyang asoy mahitungod sa mensahe sa Dios ug sa kamatuoran nga gipadayag ni Jesucristo. Bulahan ang mobasa niining basahona ug ang mamati niining maong mga panagna ug magtuman sa nahisulat niini, kay duol na ang panahon nga mahitabo kining tanan. Gikan ni Juan alang sa pito ka simbahan sa lalawigan sa Asia: Mainyo unta ang grasya ug kalinaw sa Dios—ang Dios karon, kaniadto, ug ang moanhi—ang grasya ug kalinaw nga gikan sa pito ka espiritu nga anaa sa atubangan sa iyang trono. "Isulat kini alang sa anghel sa simbahan sa Efeso: Mao kini ang mensahe gikan kaniya nga nagkupot sa pito ka bituon sa iyang tuong kamut, ug naglakaw taliwala sa pito ka kandelero nga bulawan. Nasayran ko ang imong nabuhat, ang imong paghago ug ang imong pailob. Nasayran ko usab nga dili ka gusto sa dautang mga tawo ug giusisa mo kadtong nagpakaapostol ug nakaplagan mo nga sila mga bakakon. Nagpailob ka ug giantos mo ang mga kasakitan tungod kanako, ug wala ka moangka. Apan ang ikasaway ko kanimo mao nga wala ka na mahigugma kanako sama kaniadto. Hinumdomi nga nakasala kag dako. Paghinulsol ug buhata ang gibuhat mo sa sinugdan. Kon dili ka maghinulsol, moanha ako kanimo ug kuhaon ko ang imong kandelero sa nahimutangan niini."

SALMO RESPONSORYO

Ps. 1: 1-2. 3. 4. 6

Sila nga nakadaug pakan-on sa kahoy sa kinabuhi.

Bulahan ang tawo nga wala magsunod sa tambag sa dautan ni maglakaw sa dalan sa mga makasasala, ni makig-uban sa mga walay ulaw, kondili nalipay pagpalandong sa balaod sa Ginoo adlaw ug gabii.

Sila nga nakadaug pakan-on sa kahoy sa kinabuhi.

Sama siya sa usa ka kahoy nga gitanum sa tampi sa masulog nga tubig, nga nagahatag sa iyang bunga sa tingbunga, ang iyang dahon dili gayod malarag. (Bisan unsay iyang buhaton molampos.)

Sila nga nakadaug pakan-on sa kahoy sa kinabuhi.

Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan nagalaglag sa dalan sa dautan.

Sila nga nakadaug pakan-on sa kahoy sa kinabuhi.

PAGBASA SA SANTOS NGA EBANGHELYO SUMALA NI SAN LUKAS

Lk. 18: 35-43

Sa nagkaduol si Jesus sa Jerico, may usa ka buta nga naglingkod ug nagpakilimos diha sa daplin sa dalan. Sa pagkadungog niya sa paglabay sa panon sa mga tawo, nangutana siya, "Unsa ba kini?" "Si Jesus nga taga Nazaret milabay," miingon sila kaniya. Unya misinggit siya, "Jesus! Kaliwat ni David! Kaloy-i intawon ako!" Tungod niini gikasab-an siya sa mga tawo nga nag-una ug gipahilom siya. Apan mikusog hinoon siya pagsinggit, "Kaliwat ni David! Kaloy-i intawon ako!" Busa mihunong si Jesus ug misugo nga ang buta dad-on ngadto kaniya. Sa nahiduol na siya, nangutana si Jesus kaniya, "Unsa may buot mong buhaton ko alang kanimo?" Mitubag siya, "Sir, gusto unta ako nga makakita pag-usab." Ug giingnan siya ni Jesus, "Makakita ka! Ang imong pagtuo maoy nakaayo kanimo." Ug dihadiha nakakita siya ug misunod kang Jesus ug nagpasalamat sa Dios. Sa pagkakita niini sa mga tawo, midayeg silang tanan sa Dios.