Ikakatloa'g Tulo nga Domingo sa Ordinaryong Panahon

PAGBASA GIKAN SA BASAHON SA PANULTIHON

Prv. 31: 10-13. 19-20. 30-31

Ang buotang asawa mas bililhon pa kay sa mga alahas, apan pagkalisod nga pangitaon! Kasaligan siya sa iyang bana ug magmauswagon gayod ang iyang bana. Dili siya mobuhat sa bisan unsa nga makadaot sa iyang bana. Kugihan siya nga mohabol sa delana ug sa lino. Siya ray magkalinyas sa hilo nga iyang gamiton paghabol. Mahinatagon siya sa mga kabus. Ang kaanyag sa babaye malimbongon ug dili molungtad, apan dalaygon ang babayeng nagpasidungog sa Ginoo. Dayga siya sa tanan niyang gibuhat. Angay siyang tahoron sa tanan.

SALMO RESPONSORYO

Ps. 128: 1-2. 3. 4-5

Bulahan sila nga mahadlokon sa Ginoo.

Bulahan ikaw nga mahadlokon sa Ginoo, nga nagalakaw sa iyang kadalanan! Kay nagakaon ka sa bunga sa imong binuhatan; mabulahan gayod ikaw ug mapanalanginan.

Bulahan sila nga mahadlokon sa Ginoo.

Ang imong asawa mahisama sa usa ka mabungahon nga bagon nga anaa sa tugkaran sa imong balay; ang imong mga anak sama sa mga tanom nga olibo libot sa imong talad.

Bulahan sila nga mahadlokon sa Ginoo.

Ania, ingon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion: makakita unta ikaw sa kausbawan sa Jerusalem, sa tanang mga adlaw sa imong kinabuhi.

Bulahan sila nga mahadlokon sa Ginoo.

PAGBASA GIKAN SA UNANG SULAT NI SAN PABLO NGADTO SA TAGA-TESALONICA

1 Thes. 5: 1-6

Mga igsuon, wala nay kinahanglan nga ako magsulat pa kaninyo kon kanus-a mahitabo kining mga butanga, kay kamo mismo nasayod kaayo nga ang pagbalik sa Ginoo sama sa usa ka kawatan nga moabot sa gabii. Inig-ingon sa mga tawo, "Malinawon ang tanan ug walay kabilinggan," sa kalit moabot kanila ang kalaglagan. Dili sila makalikay niini, kay ingon kini sa kasakit nga moabot sa babaye nga nagbati. Apan kamo, mga igsuon, wala na magpuyo diha sa kangitngit, busa dili kamo hikalitan sa maong Adlaw nga moabot ingon sa usa ka kawatan. Kamong tanan iya sa kahayag ug iya sa adlaw. Dili kita iya sa gabii ni iya sa kangitngit. Busa dili kita mangatulog sama sa uban kondili magtukaw ug magmaugdang kita.

PAGBASA SA SANTOS NGA EBANGHELYO SUMALA NI SAN MATEO

Mt. 25: 14-30 (TINAAS)

Si Jesus misugilon niining sambingay ngadto sa iyang mga tinun-an, "Sama kini sa usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan, ug gihatagan silag puhonan sumala sa ilang katakus: ang usa gihatagan niyag lima ka libo ka pisos, ang usa duha ka libo ka pisos, ug ang usa pa gayod usa ka libo ka pisos. Unya mipanaw siya. Ang sulugoon nga nakadawat og lima ka libo ka pisos milakaw dayon ug gipatigayon niya ang salapi, ug nakaganansiya siya og lima ka libo ka pisos. Ang nakadawat og duha ka libo ka pisos nakaganansiyag duha ka libo ka pisos. Apan ang sulugoon nga nakadawat og usa ka libo ka pisos milakaw ug nagkalot sa yuta, ug gitagoan niya ang salapi sa iyang agalon." "Tapus sa taas nga panahon, mipauli ang agalon niadtong mga sulugoon ug nangayog husay kanila. Ang sulugoon nga nakadawat ug lima ka libo ka pisos miadto kaniya ug mihatag sa laing lima ka libo ka pisos. 'Sir,' miingon siya, 'gihatagan mo akog lima ka libo ka pisos; tan-awa, aniay laing lima ka libo ka pisos nga akong naganansiya.' 'Maayo, buotan ka ug maayong sulugoon!' miingon ang agalon. 'Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!' Unya misulod ang sulugoon nga nahatagan og duha ka libo ka pisos ug miingon, 'Sir, gihatagan mo akog duha ka libo ka pisos. Tan-awa! Aniay laing duha ka libo ka pisos nga akong naganansiya.' 'Maayo, buotan ka ug maayong sulugoon,' miingon ang iyang agalon. 'Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!' Unya misulod ang sulugoon nga nakadawat og usa ka libo ka pisos ug miingon, 'Sir, nasayod ako nga estrikto ka kaayo; nag-ani ka sa wala mo itanom, ug naghipos sa wala mo ipugas. Nahadlok ako, busa milakaw ako ug gitagoan ko ang imong salapi sa ilalom sa yuta. Tan-awa, sir, ania ang imong salapi.' 'Walay hinungdan ug tapolan nga sulugoon,' miingon ang agalon. 'Nasayod ka man diay nga ako nag-ani sa wala ko itanom, ug naghipos sa wala ko ipugas, nganong wala mo man ideposito sa bangko ang akong salapi aron mahibalik kini kanako nga may tubo na? Karon, kuhaa kaniya ang salapi ug ihatag ngadto sa sulugoon nga may napulo ka libo ka pisos. Kay ang anaay iya hatagan pagdugang, ug makabaton siyag labaw pa sa iyang gikinahanglan; apan ang wala gayoy iya, bisan pa gani ang diotay nga iyaha kuhaon pa gikan kaniya. Ug kining walay hinungdan nga sulugoon ilabog ngadto sa gawas nga mangitngit; didto maghilak siya ug magkagot ang iyang ngipon.'"

PAGBASA SA SANTOS NGA EBANGHELYO SUMALA NI SAN MATEO

Mt. 25: 14-15. 19-21 (MINUBO)

Si Jesus misugilon niining sambingay ngadto sa iyang mga tinun-an, "Sama kini sa usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan, ug gihatagan silag puhonan sumala sa ilang katakus: ang usa gihatagan niyag lima ka libo ka pisos, ang usa duha ka libo ka pisos, ug ang usa pa gayod usa ka libo ka pisos. Unya mipanaw siya. "Tapus sa taas nga panahon, mipauli ang agalon niadtong mga sulugoon ug nangayog husay kanila. Ang sulugoon nga nakadawat ug lima ka libo ka pisos miadto kaniya ug mihatag sa laing lima ka libo ka pisos. 'Sir,' miingon siya, 'gihatagan mo akog lima ka libo ka pisos; tan-awa, aniay laing lima ka libo ka pisos nga akong naganansiya.' 'Maayo, buotan ka ug maayong sulugoon!' miingon ang agalon. 'Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!'"