Sabado sa Ikakatloa'g Duha nga Semana sa Ordinaryong Panahon

PAGBASA GIKAN SA IKATULONG SULAT NI SAN JUAN

3 Jn. 5-8

Minahal kong higala, buotan ka kaayo sa imong pag-alagad sa mga kaigsuonan, bisan pa kon sila mga dumuduong. Nagbalita sila kanako mahitungod sa imong gugma sa simbahan diri. Tabangi intawon sila sa paagi nga makapahimuot sa Dios aron makapadayon sila sa ilang panaw. Kay ang tuyo sa ilang pagpanaw mao man ang pag-alagad kang Cristo ug wala sila modawat ug hinabang gikan sa dili magtutuo. Busa tabangan ta sila aron makaambit kita sa ilang buhat alang sa kamatuoran.

SALMO RESPONSORYO

Ps. 112: 1-2. 3-4. 5-6

Bulahan ang tawo nga mahadlokon sa Ginoo.

Aleluya.

Bulahan ang tawo nga mahadlokon sa Ginoo. Nga nahigugma pag-ayo sa iyang mga sugo. Ang iyang kaliwat mahimong gamhanan ibabaw sa yuta; ang kaliwat nga matarong pagapanalanginan.

Bulahan ang tawo nga mahadlokon sa Ginoo.

Aleluya.

Kadato ug kahamugaway maanaa sa iyang balay. Ang iyang kamanggihatagon mohangtod sa kahangturan. Mobanag-banag siya latas sa kangitngitan, usa ka kahayag alang sa matarong; mahigugmaon siya ug maluluy-on ug matarong.

Bulahan ang tawo nga mahadlokon sa Ginoo.

Aleluya.

Maayo ang tawo nga manggihatagon ug magpahulam, nga magadumala sa iyang mga butang uban sa katarong; Dili gayod siya matarong; ang tawo nga matarong hinumdoman sa kanunay.

Bulahan ang tawo nga mahadlokon sa Ginoo.

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 18: 1-8

Unya gisugilon ni Jesus kining sambingaya aron pagtudlo nga kinahanglan sila mag-ampo ug dili gayod nila wad-on ang paglaum. "Sa usa ka lungsod dihay usa ka huwes nga walay kahadlok sa Dios ni pagtahod sa mga tawo. Ug may usa ka biyuda niadtong lungsora nga nagbalikbalik pag-adto kaniya aron paghangyo nga panalipdan ang iyang katungod; nagkanayon siya, 'Tabangi intawon ako batok sa akong kaatbang.' Sulod sa taas nga panahon ang maghuhukom midumili pagtabang, apan sa katapusan miingon siya sa iyang kaugalingon, 'Bisan tuod wala akoy kahadlok sa Dios ni pagtahod sa mga tawo, apan tungod kay nagsamok man kanako kining maong biyuda, paningkamotan ko nga kapanalipdan ang iyang katungod; kay kondili ko kini buhaton magsigi siyag balikbalik hangtod nga kaupsan akog pailob!'" Ug mipadayon ang Ginoo, "Pamati-a ninyo ang gisulti niadtong daotang huwes. Karon, dili ba ang Dios maghukom dapig sa iyang kaugalingong katawhan nga nagpakitabang kaniya sa adlaw ug sa gabii? Maglangan ba siya sa pagtabang kanila? Sultihan ko kamo nga maghukom siya dapig kanila, ug dalion niya ang pagbuhat niini. Apan makakaplag ba kaha og pagtuo ang Anak sa Tawo dinhi sa kalibutan sa iya unyang pag-abot?"