Biyernes sa Ikakatloa'g Duha nga Semana sa Ordinaryong Panahon
PAGBASA GIKAN SA IKADUHANG SULAT NI SAN JUAN
2 Jn. 4-9
Gikalipay ko kaayo nga ang pipila sa imong mga anak nagkinabuhi sumala gayod sa kamatuoran, ingon sa gisugo kanato sa Amahan. Busa hangyoon ko ikaw, minahal nga Ginang, nga maghigugmaay kitang tanan. Kining gisulat ko kanimo dili bag-ong sugo, kondili dinhi na kanato sukad pa sa sinugdan. Kining paghigugma nga akong gipasabot mao nga magmatinumanon kita sa mga sugo sa Dios. Sumala sa nasayran ninyo sukad pa sa sinugdan, ang sugo mao nga magkinabuhi kamong tanan subay sa gugma. Ania karon sa kalibutan ang daghang magtutudlo nga bakakon nga wala motuo nga nahimong tawo si Jesucristo. Mao kini sila ang malimbongon ug ang Kaaway ni Cristo. Busa pagbantay kamo aron dili mawala kaninyo ang gihagoan; hinonoa, makadawat kamo sa tibuok nga ganti. Ang Dios wala diha sa tawo nga dili mosunod sa pagtulon-an ni Cristo kondili magdugang hinoon niini. Apan ang Amahan ug ang Anak anaa kaniya nga nagsunod sa pagtulon-an ni Cristo.
ANG PULONG SA GINOO
SALMO RESPONSORYO
Ps. 119: 1. 2. 10. 11. 17. 18
Bulahan sila nga nagatuman sa Balaod sa Ginoo.
Bulahan sila kansang dalan way buling, nga nagalakaw diha sa balaod sa Ginoo.
Bulahan sila nga nagatuman sa Balaod sa Ginoo.
Bulahan sila nga nagatuman sa iyang kasugoan, nga nangita kaniya sa tibuok nilang kasingkasing.
Bulahan sila nga nagatuman sa Balaod sa Ginoo.
Sa tibuok kong kasingkasing nangita ako kanimo; dili unta ako mahisalaag sa imong mga kasugoan.
Bulahan sila nga nagatuman sa Balaod sa Ginoo.
Sulod sa akong kasingkasing gimahal ko ang imong saad, aron dili ako makasala batok kanimo.
Bulahan sila nga nagatuman sa Balaod sa Ginoo.
Pagminaayo sa imong sulugoon, aron mabuhi ako ug tumana ang imong mga pulong.
Bulahan sila nga nagatuman sa Balaod sa Ginoo.
Abliha ang akong mga mata, aron palandongon ko ang mga katingalahan sa imong balaod.
Bulahan sila nga nagatuman sa Balaod sa Ginoo.
PAGBASA SA SANTOS NGA EBANGHELYO SUMALA NI SAN LUKAS
Lk. 17: 26-37
Si Jesus miingon sa iyang mga tinun-an: "Ingon sa nahitabo sa panahon ni Noe, mao usab unya ang mahitabo inig-abot sa Anak sa Tawo. Nagpadayon ang tanan pagpangaon ug pagpanginom, ug nagminyoay ang mga lalaki ug ang mga babaye, hangtod sa adlaw sa pagsulod ni Noe sa arka; unya miabot ang Lunop ug milaglag kanilang tanan. Mahisama usab kini sa panahon ni Lot. Ang tanan nagpadayon pagpanga-on ug pagpanginom, pagpamalit ug pagpamaligya, pagpananom ug pagpamuhat og balay. Sa adlaw sa pagbiya ni Lot sa Sodoma, ang kalayo ug asupre miulan gikan sa langit ug milaglag kanilang tanan. Mao usab unya kini ang mahitabo sa adlaw nga ipadayag ang Anak sa Tawo." "Ang atua sa ibabaw sa atop sa iyang balay niadtong adlawa kinahanglan nga dili manaog ug mosulod sa iyang balay aron pagkuha sa iyang mga kabtangan. Ang atua usab sa iyang uma kinahanglan nga dili mopauli sa iyang balay. Hinumdomi ninyo ang asawa ni Lot! Ang maninguha pagluwas sa iyang kinabuhi, mawad-an hinoon niini, apan ang magwagtang sa iyang kinabuhi, magluwas niini. Niadtong gabhiona, may duha ka tawo nga magdulog sa higdaanan; kuhaon ang usa ug ang usa ibilin. Ug may duha ka babaye nga maggaling: kuhaon usab ang usa ug ang usa ibilin." Ang mga tinun-an nangutana kaniya, "Asa man, Ginoo?" Si Jesus mitubag, "Hain gani ang lawas nga patay adto usab didto magpundok ang mga agila."
ANG EBANGHELYO SA GINOO
