[M] San Josafat, obispo ug martir

PAGBASA GIKAN SA SULAT NI SAN PABLO NGADTO KANG FILEMON

Phlm. 1: 7-20

Nakalipay ug nakadasig pag-ayo kanako ang imong gugma, minahal nga igsuon, tungod kay gidasig mo man ang tanang katawhan sa Dios. Tungod niini nakabaton akog kaisog ingon nga imong igsuon diha kang Cristo, pagsugo kanimo sa pagbuhat sa angayng buhaton. Apan tungod sa gugma napugos ako paghangyo kanimo. Gihimo ko kini bisan kon ako, si Pablo, ang embahador ni Cristo Jesus, gibilanggo karon tungod kaniya. Naghangyo ako kanimo alang kang Onesimo nga akong anak diha kang Cristo. Nahimo akong amahan niya sa pagtuo samtang gibilanggo ako. Kaniadto wala siyay kapuslanan kanimo, apan karon mapuslanon na siya kanimo ug kanako. Karon papaulion ko siya kanimo ug dawata siya sama ra nga akoy gidawat nimo. Buot unta ako nga magpabilin siya diri aron makatabang siya kanako puli kanimo samtang gibilanggo pa ako tungod sa Ebanghelyo. Apan dili ko ikaw pugson sa pagtabang kanako. Busa dili ako magbuhat ug bisan unsa nga dili nimo uyonan. Tingali si Onesimo nahimulag kanimo sa makadiyot aron mahibalik siya kanimo ug dili na gayod mobulag hangtod sa hangtod. Dili na siya karon ulipon lamang kondili minahal nang igsuon diha kang Cristo. Gimahal ko siya ug labi pa siyang mahalon mo ingon nga ulipon ug igsuon diha sa Ginoo. Kon giila mo ako nga imong katabang, dawata siya sama ra nga akoy gidawat nimo. Kon kaniadto makahimo siya kanimog sayop o nakautang kanimo, ako lay paningli. Ako gayod ang nangunay pagsulat niining mosunod: Ako, si Pablo, mobayad gayod kanimo. (Dili ako buot nga pahinumdoman ka nga utang mo kanako ang imong kinabuhi.) Busa, igsuon, buhata kini alang kanako tungod sa Ginoo; lipaya ako ingon nga igsuon mo diha kang Cristo.

SALMO RESPONSORYO

Ps. 146: 7. 8-9. 9-10

Bulahan sila nga gitabangan sa Dios ni Jacob.

Aleluya.

Bulahan siya nga matinumanon hangtod sa kahangturan nga nagapadangat sa katarong alang sa gidaugdaog, nagahatag og pagkaon sa gutom. Ang Ginoo nagahatag ug kagawasan sa mga bihag.

Bulahan sila nga gitabangan sa Dios ni Jacob.

Aleluya.

Ang Ginoo nagahatag ug pagtan-aw sa buta, ang Ginoo nagabangon kanila nga nalukapa; ang Ginoo nahigugma sa matarong, ang Ginoo nanalipod sa mga langyaw.

Bulahan sila nga gitabangan sa Dios ni Jacob.

Aleluya.

Iyang gibuhi ang mga ilo ug ang balo, apan iyang gibawog ang paagi sa dautan. Ang Ginoo maghari hangtod sa kahangturan; ang imong Dios, O Sion, latas sa tanang kaliwatan. Aleluya.

Bulahan sila nga gitabangan sa Dios ni Jacob.

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 17: 20-25

May mga Pariseo nga nangutana kang Jesus kon kanus-a maghari ang Dios. Mitubag siya, "Ang paghari sa Dios dili butang nga inyong makita. Walay makaingon, 'Ania ra!' o, 'Atua ra!'; kay ang paghari sa Dios anaa sa sulod ninyo." Unya miingon siya sa mga tinun-an, "Moabot ang panahon nga mangandoy kamo pagtan-aw sa usa sa mga adlaw sa Anak sa Tawo, apan dili gayod kamo makakita niini. Adunay daghan nga moingon, 'Tua didto!' o, 'Dia diri!' Apan ayaw kamo pag-adto aron pagsusi niini. Ingon nga ang kilat mokilab tadlas sa kalangitan gikan sa usa ka bahin niini ngadto sa pikas nga bahin, mao usab unya ang pag-abot sa Anak sa Tawo. Apan una sa tanan kinahanglan mag-antos siya pag-ayo ug unya isalikway siya sa mga tawo nga nagpuyo niining panahona karon."