[M] San Martin, obispo
PAGBASA GIKAN SA SULAT NI SAN PABLO NGADTO KANG TITO
Ti. 3: 1-7
Pahinumdomi ang mga magtutuo sa pagtahod ug pagsugot sa mga punoan ug sa mga anaa sa kagamhanan, andam pagbuhat sa tanang butang nga maayo. Tambagi sila nga dili magsultig dautan kang bisan kinsa, kondili magmakigdaiton ug magmahigalaon ug kanunay magpakita sa malumong kinaiya ngadto sa tanang mga tawo. Kay kita usab kaniadto mga buangbuang, sukihan ug masalaypon. Naulipon kita sa mga kailibgon ug sa tanang matang sa kahilayan, ug nagkinabuhi sa pagkadautan ug pagkamasinahon. Ang uban nasilag kanato ug ato usab silang gikasilagan. Apan sa dihang gipadayag na ang kaluoy ug gugma sa Dios nga atong Manluluwas, kita iyang giluwas, dili tungod sa bisan unsang maayo nga atong nabuhat, kon dili tungod sa iyang kaluoy pinaagi sa paghugas nga gihimo sa Espiritu Santo aron kita makabaton ug bag-ong kinabuhi. Kay madagayaong gibubo sa Dios ang Espiritu Santo dinhi kanato pinaagi kang Jesucristo nga atong Manluluwas.
ANG PULONG SA GINOO
SALMO RESPONSORYO
Ps. 23: 1-3. 3-4. 5. 6
Magbalantay kanako ang Ginoo wala nay magmakulang pa kanako.
Magbalantay kanako ang Ginoo, wala nay magmakulang pa kanako. Sa lunhaw nga sibsibanan iya ako nga gipapahulay; Sa daplin sa malinaw nga tubig iya akong gidala; iyang gihupay ang akong kalag.
Magbalantay kanako ang Ginoo wala nay magmakulang pa kanako.
Iya ako nga gitultolan sa matarong nga mga agianan tungod sa iya nga ngalan. Bisan kon magalakaw ako sa walog nga mangitngit wala akoy kahadlokan nga dautan; Kay anaa ka man sa akong kiliran sa imong igbubugaw og sungkod gihatagan mo ako og kaisog.
Magbalantay kanako ang Ginoo wala nay magmakulang pa kanako.
Gihikyaran mo ako og lamesa sa akong atubangan samtang nagatan-aw ang akong mga kaaway; Gidihogan mo ang akong ulo og lana; nagaawas gayod ang akong kopa.
Magbalantay kanako ang Ginoo wala nay magmakulang pa kanako.
Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi; Ug magpuyo ako sa balay sa Ginoo sa mga katuigan sa katuigan.
Magbalantay kanako ang Ginoo wala nay magmakulang pa kanako.
PAGBASA SA SANTOS NGA EBANGHELYO SUMALA NI SAN LUKAS
Lk. 17: 11-19
Sa nagpadulong si Jesus sa Jerusalem, miagi siya sa utlanan sa Samaria ug Galilea. Samtang nagpaingon siya sa usa ka balangay, gisugat siya og napulo ka sanlahon. Nagpaantaw sila ug naninggit, "Jesus! Magtutudlo! Kaloy-i intawon kami!" Nakakita kanila si Jesus ug miingon, "Lakaw ug pahiling kamo sa mga pari." Samtang diha pa sila sa dalan, nangaayo sila. Ang usa kanila, sa pagtan-aw nga naayo na siya, mibalik ug nagdayeg sa Dios sa kusog nga tingog. Mihapa siya sa tiilan ni Jesus ug nagpasalamat kaniya. Ang maong tawo Samaryanhon. Unya miingon si Jesus, "Dili ba napulo man ka tawo ang nangaayo? Hain na man ang siyam? Ngano man nga kining dumuduong mao ra may mibalik aron pagpasalamat?" Ug miingon kaniya si Jesus, "Tindog ug lakaw; ang imong pagtuo maoy nakaayo kanimo."
ANG EBANGHELYO SA GINOO
