[M] San Leon Magno, papa ug doktor sa Simbahan

PAGBASA GIKAN SA SULAT NI SAN PABLO NGADTO KANG TITO

Ti. 2: 1-8. 11-14

Apan ikaw kinahanglan magtudlo sa hustong pagtulon-an. Tambagi ang mga lalaking gulanggulang na nga magmaugdang sila, magmabuot, magpugong sa kaugalingon, magmalig-on sa ilang pagtuo, sa ilang paghigugma, ug magmainantuson. Tambagi usab ang mga babayeng gulanggulang na sa pagpuyog kinabuhi nga balaan. Kinahanglan dili sila manlibak ug maghuboghubog. Kinahanglan nga ang maayo maoy ilang itudlo, aron pagbansay sa batan-ong mga babaye sa paghigugma sa ilang bana ug kabataan, sa pagpugong sa ilang kaugalingon ug sa pagkinabuhi nga putli, maayong moatiman sa panimalay ug matinahuron sa ilang bana, aron walay makabiaybiay sa mensahe sa Dios. Dasiga usab ang mga batan-ong lalaki sa pagpugong sa kaugalingon. Ikaw mismo kinahanglan mahimong panig-ingnan sa mga maayong buhat. Ug sa imong pagpanudlo ipakita ang kamatinud-anon ug kaligdong. Gamita ang mga maayong pulong nga dili masaway aron maulawan ang imong mga kaaway tungod kay wala silay ikasulting dautan batok kanato. Kay nagpadayag ang Dios sa iyang grasya alang sa kaluwasan sa tanang mga tawo. Ang maong grasya nagtudlo kanato pagbiya sa kinabuhing dautan ug sa kalibutanong kailibgon ug sa pagkinabuhi nga mapinugnganon sa kaugalingon, matarong ug diosnon, samtang nagpaabot kita sa bulahang Adlaw nga atong gilaoman inigpadayag na sa himaya sa atong gamhanang Dios ug Manluluwas nga si Jesucristo. Gitugyan niya ang iyang kaugalingon aron pagluwas kanato sa tanang pagkadautan ug paghimo kanato nga putling katawhan nga iyaha ra gayod, ug masibuton pagbuhat sa maayo.

SALMO RESPONSORYO

Ps. 37: 3-4. 18. 23. 27. 29

Ang kaluwasan sa matarong nagagikan sa Ginoo.

Salig sa Ginoo ug pagbuhat sa maayo, aron magpuyo ikaw sa yuta ug maghimulos sa kalinaw. Paglipay diha sa Ginoo, ug hatagan ka niya sa mga tinguha sa imong kasingkasing.

Ang kaluwasan sa matarong nagagikan sa Ginoo.

Ang Ginoo nagabantay sa mga kinabuhi sa matarong; ang ilang kabilin nagalungtad sa kahangturan. Ang mga lakang sa tawo lig-onon sa Ginoo, ug giuyonan niya ang iyang dalan.

Ang kaluwasan sa matarong nagagikan sa Ginoo.

Talikdi ang dautan ug buhata ang maayo, aron molungtad ka sa kahangturan; Ang matarong makaangkon sa yuta ug magpuyo siya niini hangtod sa kahangturan.

Ang kaluwasan sa matarong nagagikan sa Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 17: 7-10

Si Jesus miingon: "Pananglitan adunay usa kaninyo nga may sulugoon nga nagdaro o nag-atiman sa mga karnero. Inig-abot niya gikan sa uma, ingnon ba nimo siya, 'Pagdali diha aron mokaon ka!' Dili gayod! Imo hinoon siyang ingnon, 'Andama ang akong panihapon, ug unya pagtapis ug silbihi ako; human niini, ikaw na usab ang mokaon.' Ang usa ka sulugoon dili angayng pasalamatan tungod sa iyang pagtuman sa sugo, dili ba? Mao usab kamo; kon nakabuhat na kamo sa tanan nga gisugo kaninyo, ingna ninyo, 'Mga sulugoon kami ug nagbuhat lamang sa among katungdanan.'"