Ikakatloa'g Duha nga Domingo sa Ordinaryong Panahon

PAGBASA GIKAN SA BASAHON SA KAALAM NI SOLOMON

Wis. 6: 12-16

Ang kaalam nagsidlak nga masiga ug dili gayod moawop; sila nga nahigugma ug nangita kaniya masayon nga makakaplag kaniya. Dali siyang magpaila sa iyang kaugalingon kang bisan kinsa nga nagtinguha kaniya. Bangon ug sayo sa buntag aron pagpangita kaniya, ug wala kay kalisdanan; hikaplagan mo siya nga maglingkod sa imong pultahan. Ang inyong pagmatngon sa Kaalam maoy pagkab-ot sa hingpit nga pagsabot. Kon mangita ka kaniya, sa dili madugay makakaplag ka sa kalinaw sa hunahuna, kay mangita siya kanila nga angay kaniya, ug hikaplagan ka niya bisan asa ka. Maluluy-on siya ug mouban kanimo sa tanan mong hunahuna.

SALMO RESPONSORYO

Ps. 63: 2. 3-4. 5-6. 7-8

Ang akong kalag giuhaw kanimo, O Ginoo, akong Dios.

O Dios, ikaw ang akong Dios nga akong gipangita; kanimo nangandoy ang akong unod ug giuhaw ang akong kalag; Sama sa yuta nga uhaw, walay kinabuhi ug walay tubig.

Ang akong kalag giuhaw kanimo, O Ginoo, akong Dios.

Sa ingon nagatuktok ako kanimo diha sa santuwaryo aron pagtan-aw sa imong gahom ug sa imong himaya. Kay ang imong kaluoy mas maayo kay sa kinabuhi; ang akong mga ngabil maghimaya kanimo.

Ang akong kalag giuhaw kanimo, O Ginoo, akong Dios.

Sa ingon niini daygon ko ikaw samtang buhi pa ako; sa pagbayaw ko sa akong mga kamut sangpiton ko ang imong ngalan. Ingon sa kabuhong sa usa ka bangkite mabusog ang akong kalag, ug sa masadya nga mga ngabil magdayeg kanimo ang akong ba-ba.

Ang akong kalag giuhaw kanimo, O Ginoo, akong Dios.

Hinumdoman ko ikaw sa akong higdaanan, ug latas sa pagbantay sa kagabhion magpalandong ako kanimo; Ikaw ang akong hinabang ug diha sa landong sa imong mga pako nagasinggit ako sa kasadya.

Ang akong kalag giuhaw kanimo, O Ginoo, akong Dios.

PAGBASA GIKAN SA UNANG SULAT NI SAN PABLO NGADTO SA TAGA-TESALONICA

1 Thes. 4: 13-18 (TINAAS)

Mga igsuon, buot kami nga masayod kamo sa kamatuoran mahitungod niadtong nangamatay na, aron dili kamo maguol ingon sa mga tawo nga walay paglaum. Kay kita nagtuo man nga si Jesus namatay ug nabanhaw; busa nagtuo kita nga banhawon sa Dios kadtong nangamatay nga nagtuo kang Jesus aron paubanon kaniya. Ang pagtulon-an sa Ginoo nga gitudlo namo kaninyo mao kini: kita nga buhi pa inigbalik sa Ginoo, dili mag-una niadtong nangamatay na. Unya mabati ang singgit sa pagmando ug ang tingog sa arkanghel ingon man ang lanog sa trumpeta sa Dios, ug mokunsad ang Ginoo gikan sa langit. Maoy unang mabanhaw kadtong nangamatay nga nagtuo kang Cristo. Unya kita nga buhi pa niadtong adlawa, bayawon uban kanila didto sa mga panganod aron pagsugat sa Ginoo. Ug kita unya uban na kanunay sa Ginoo. Busa pagdasigay kamo tungod niining paglauma.

PAGBASA GIKAN SA UNANG SULAT NI SAN PABLO NGADTO SA TAGA-TESALONICA

1 Thes. 4: 13-14 (MINUBO)

Mga igsuon, buot kami nga masayod kamo sa kamatuoran mahitungod niadtong nangamatay na, aron dili kamo maguol ingon sa mga tawo nga walay paglaum. Kay kita nagtuo man nga si Jesus namatay ug nabanhaw; busa nagtuo kita nga banhawon sa Dios kadtong nangamatay nga nagtuo kang Jesus aron paubanon kaniya.

PAGBASA SA SANTOS NGA EBANGHELYO SUMALA NI SAN MATEO

Mt. 25: 1-13

Si Jesus misugilon ug sambingay ngadto sa iyang mga tinun-an, "Niadtong adlawa ang Gingharian sa Langit mahisama sa napulo ka dalaga nga nagdala sa ilang mga suga ug nanglakaw aron pagsugat sa pamanhonon. Danghag ang lima kanila ug maalamon ang laing lima. Ang mga danghag nagdala sa ilang mga suga apan wala sila magtagana pagdalag lana nga igdudugang samtang ang mga maalamon nagdalag mga sudlanan nga punog lana uban sa ilang mga suga. Ang pamanhonon nalangan pag-abot, busa nagduka ug nakatulog ang mga dalaga. "Tungang gabii na kadto sa dihang milanog ang usa ka singgit, 'Ania na ang pamanhonon! Dali kamo ug sugata siya!' Nangmata ang mga dalaga ug giandam nila ang ilang mga suga. Unya ang mga danghag miingon sa mga maalamon, 'Bahini kamig diyutay sa inyong lana kay hapit na mangapalong ang among mga suga.' Apan ang mga maalamon mitubag, 'Ayaw kay dili na paigo ang lana alang kaninyo ug kanamo. Lakat hinuon kamo sa tindahan ug pagpalit kamog inyong magamit.' Busa ang mga danghag nga dalaga milakaw aron pagpalit ug lana, ug sa wala na sila didto, miabot ang pamanhonon. Ang lima ka dalaga nga nakapangandam mikuyog kaniya pagsulod ngadto sa kombira sa kasal ug gisirhan ang pultahan." "Unya miabot ang ubang mga dalaga ug misangpit sila, 'Sir, sir, pasudla kami!' Apan ang pamanhonon mitubag, 'Wala ako makaila kaninyo.'" Ug gitapos ni Jesus ang sambingay sa pag-ingon, "Busa pagtukaw kamo kay wala kamo mahibalo sa adlaw o sa takna."