Sabado sa Ikakatloa'g Usa nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 4: 10-19

Mga igsuon: Malipayon ako kaayo diha sa Ginoo kay karon, human sa taas nga panahon, nakahigayon na usab kamo sa pagpakita sa inyong gugma kanako. Wala ako magpasabot nga wala na kamo mahigugma kanako kay ang tinuod mao nga wala lang kamoy higayon sa pagpakita niini. Wala ako magpasabot nga nakulangan ako sa akong mga gikinahanglan kay nakat-onan ko ang pagkatagbaw sa bisan unsay ania kanako. Nasinati ko ang pagpuyo diha sa kawad-on ug kahamugaway. Nakakat-on na ako niining paagiha sa pagkinabuhi bisan diin ug bisan kanus-a, busog ako kon gigutom, hamugaway kon nagkalisodlisod. May kalig-on ako sa pagsagubang sa tanan tungod sa gahom nga gihatag kanako ni Cristo. Apan dalaygon kamo tungod sa inyong pagtabang kanako sa akong mga kalisdanan. Nasayod kaayo kamong mga taga-Filipos nga sa pagbiya ko sa Macedonia, sa bag-o pang gisangyaw ang Maayong Balita, kamo ray simbahan mitabang kanako; kamo ray nakig-ambit sa akong mga kadaogan ug mga kapakyasan. Dili lang kay kausa ra nga gipadad-an ninyo akog hinabang sa nagkalisodlisod ako didto sa Tesalonica. Dili kay gusto lang akong modawat og mga gasa, kondili buot ko nga mabulahan usab kamo. Busa nakabalos na kamo kanako ug sobra pa gani. Sangkap na ako sa tanan kong gikinahanglan, karon nga gidad-an na ako ni Epafrodito sa tanan ninyong mga gasa. Kini sama sa usa ka mahumot nga halad sinunog ngadto sa Dios, usa ka halad nga makapahimuot kaniya. Ug ang akong Dios, uban sa naghingapin niyang bahandi diha kang Cristo Jesus, magsangkap sa tanan ninyong mga kinahanglan.

SALMO RESPONSORYO

Ps. 112: 1-2. 5-6. 8. 9

Bulahan ang tawo nga mahadlokon sa Ginoo.

Bulahan ang tawo nga mahadlokon sa Ginoo, nga nahigugma pag-ayo sa iyang mga sugo. Ang iyang kaliwat mahimong gamhanan ibabaw sa yuta; ang kaliwat nga matarong pagapanalanginan.

Bulahan ang tawo nga mahadlokon sa Ginoo.

Maayo ang tawo nga manggihatagon ug magapahulam, nga nagadumala sa iyang mga butang uban sa katarong; Dili gayod siya matarog; ang tawo nga matarong handumon sa kanunay.

Bulahan ang tawo nga mahadlokon sa Ginoo.

Ang iyang kasingkasing dili matarog; dili siya mahadlok. Kusog siyang manghatag sa kabus; ang iyang kamanggihatagon molungtad hangtod sa kahangturan: ang iyang gahom bayawon diha sa himaya.

Bulahan ang tawo nga mahadlokon sa Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 16: 9-15

Si Jesus miingon sa iyang mga tinun-an, "Pagbaton kamog mga higala pinaagi sa mga bahandi niining kalibutana aron inigkahurot na niini, dawaton kamo didto sa walay katapusang puloy-anan. Kinsa kadtong kasaligan sa gagmayng butang, kasaligan usab sa dagko; ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi? Ug kondili kamo kasaligan sa mga butang sa uban, kinsay mohatag kaninyo sa inyong kaugalingong mga butang?" "Walay tawo nga mahimong ulipon sa duha ka agalon, kay mahitabo gayod nga iyang dumtan ang usa ug ang usa iyang higugmaon; o unongan niya ang usa ug ang usa iyang tamayon. Dili kamo makapaulipon sa Dios ug sa salapi." Sa pagkadungog sa mga Pariseo niining tanan, ilang gibugalbugalan si Jesus kay makisapi man sila. Miingon si Jesus kanila, "Nagpakamatarong kamo atubangan sa mga tawo, apan nasayod ang Dios sa inyong kasingkasing. Kay ang giisip sa mga tawo nga bililhon kaayo walay bili sa atubangan sa Dios."