Biyernes sa Ikakatloa'g Usa nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 3: 17 - 4: 1

Mga igsuon: Padayon kamong tanan pag-awat kanako. Gipakita na namo kaninyo ang hustong panig-ingnan; busa awata ninyo kadtong nagsunod niini. Gisultihan ko na kamo niini sa makadaghan ug karon sublion ko kini pag-ingon uban sa mga luha, nga dunay daghang mga magtutuo kansang pagkinabuhi sukwahi sa tuyo sa kamatayon ni Cristo sa krus. Mosangko gayod sila sa impiyerno, kay ang ilang gipakadios mao man ang mga kailibgon nga lawasnon. Nagpasigarbo sila sa angay unta nilang ikaulaw, ug naghunahuna lamang sila sa mga butang niining kalibutana. Apan kita mga lumulupyo sa langit, ug mahinangpon kitang nagpaabot sa pag-anhi sa atong Manunubos gikan sa langit ang Ginoong Jesucristo. Ilisan niya ang atong mga lawas nga may kamatayon sa lawas nga mahimayaon sama sa iyaha pinaagi sa gahom nga gigamit niya sa pagmando sa tanan. Busa mga igsuon nga gimahal ko ug gihandom, kalipay ug garbo ko, paglig-on kamo diha sa Ginoo.

SALMO RESPONSORYO

Ps. 122: 1-2. 3-4. 4-5

Nalipay ako nga giingnan ako nila: Mangadto na kita sa balay sa Ginoo.

Nalipay ako kay giingnan ako nila, "Mangadto na kita sa balay sa Ginoo." Ug karon nagabarog na kami sulod sa imong mga ganghaan, O Jerusalem.

Nalipay ako nga giingnan ako nila: Mangadto na kita sa balay sa Ginoo.

Jerusalem, nga gitukod ingog usa ka siyudad nga gipundok sa kahiusa. Ngadto kaniya nanungas ang mga tribo, ang mga tribo sa Ginoo.

Nalipay ako nga giingnan ako nila: Mangadto na kita sa balay sa Ginoo.

Sumala sa kasugoan alang sa Israel aron pagpasalamat sa ngalan sa Ginoo. Diha kaniya gipabarog ang mga lingkoranan sa hukmanan, ang mga lingkoranan alang sa balay ni David.

Nalipay ako nga giingnan ako nila: Mangadto na kita sa balay sa Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 16: 1-8

Si Jesus miingon sa iyang mga tinun-an, "Dihay usa ka dato nga may piniyalan, ug gisuginlan siya nga giusik-usikan lamang sa iyang piniyalan ang iyang salapi. Busa iyang gitawag ang piniyalan ug giingnan, 'Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan, kay sukad karon dili ka na akong piniyalan.' Busa nagkanayon sa iyang kaugalingon ang piniyalan, 'Papahawaon na man ako sa akong agalon, unsa na may buhaton ko? Dili ako makahimo sa pagpangalot og kanal, ug maulaw usab ako sa pagpakilimos. Ah, kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.' Busa iyang gitawag ang tanan nga utangan sa iyang agalon. Ang una iyang gipangutana, 'Pila bay utang nimo sa akong agalon?' 'Usa ka gatos ka taro nga lana,' mitubag ang tawo. 'Ania ang imong bali. Lingkod og kalim-an lang ang isulat,' matod sa piniyalan. Ug giingnan niya ang usa, 'Ug ikaw, pila may imong utang?' 'Usa ka libo ka bakid nga trigo,' mitubag ang tawo. 'Ania ang imong bali; walo ka gatos lang ang isulat,' miingon ang piniyalan. Ang agalon niining tikasan nga piniyalan midayeg kaniya tungod sa iyang inantigo nga buhat; kay ang mga tawo niining kalibutan mas maantigo modumala sa ilang buluhaton kay sa mga tawo nga iya sa kahayag."