Huwebes sa Ikakatloa'g Usa nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 3: 3-8

Mga igsuon: Kay kita ug dili sila ang tinuod nga tinuli, kay nagsimba man kita sa Dios pinaagi sa iyang Espiritu, ug nagkalipay sa atong pagkinabuhi diha kang Cristo Jesus; wala kita magsalig sa mga seremonyas. Makasalig gayod unta ako niining mga butanga, kay kon may maghunahuna nga makasalig siya sa mga seremonyas, labaw pa ako. Kay gituli ako sa nag-edad pa lang akog usa ka semana. Natawo ako nga Israelita, sa tribo ni Benjamin, ug lumad gayod nga Hebreo. Bahin sa pagtuman sa balaod sa mga Judio. Pariseo ako, ug hilabihan ang akong kamadasigon nga gilutos ko gani ang simbahan. Kon ang pagkamatarong ipasubay pa sa pagtuman sa Balaod, walay ikasaway kanako. Apan kadtong tanan nga kaniadto giisip ko nga bililhon, karon giisip ko na nga walay bili tungod kang Cristo. Ug dili kay kana ra kondili giisip ko na ang tanan nga walay bili tungod sa kahibalo bahin ni Cristo Jesus nga akong Ginoo nga labaw pa kaayo kabililhon. Tungod kaniya gisalikway ko ang tanan ug giisip kong basura lamang aron maangkon ko si Cristo.

SALMO RESPONSORYO

Ps. 105: 2. 3. 4-5. 6-7

Pasadyaa ang mga kasingkasing nga nangita sa Ginoo.

Awiti siya, awita ang iyang kadayganan, isangyaw ang tanan niyang katingalahang mga buhat. Himayaa ang iyang balaang ngalan; pagsadya kamo, O mga kasingkasing nga nangita sa Ginoo.

Pasadyaa ang mga kasingkasing nga nangita sa Ginoo.

Paabota ang Ginoo diha sa iyang gahom; paningkamuti ang pag-alagad kaniya kanunay. Hinumdomi ang katingalahang mga buhat nga iyang nahimo; ang iyang kahibulongang mga buhat, ug ang mga hukom nga iyang gibungat.

Pasadyaa ang mga kasingkasing nga nangita sa Ginoo.

Kamong mga kaliwat ni Abraham, iyang mga sulugoon, mga anak ni Jacob, ang iyang mga pinili. Siya, ang Ginoo, mao ang atong Dios; sa tibuok kalibutan nagahari ang iyang kahukmanan.

Pasadyaa ang mga kasingkasing nga nangita sa Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 15: 1-10

Usa niana ka higayon may daghang mga kobrador sa buhis ug mga makasasala nga miadto kang Jesus aron pagpamati kaniya. Unya ang mga Pariseo ug ang mga magtutudlo sa Balaod nagbagulbol nga nag-ingon, "Kining tawhana nag-abiabi sa mga makasasala ug nakigsalo pa gani kanila!" Tungod niini misugilon kanila si Jesus ug usa ka sambingay: "Pananglit usa kaninyo may usa ka gatos ka karnero ug nawala ang usa niini, unsa may iyang buhaton? Iyang biyaan ang kasiyaman ug siyam didto sa sibsibanan ug pangitaon niya ang nawala nga karnero hangtod nga kini iyang makaplagan. Ug inigkakaplag niya niini, malipay siya pag-ayo ug iya kining pas-anon ug dad-on pagbalik ngadto sa ila. Unya iyang dapiton ang iyang mga higala ug mga silingan, ug moingon siya kanila, 'Maglipay kita kay akong nakaplagan ang nawala kong karnero!' Sa ingon usab niini, sultihan ko kamo nga mas dako ang kalipay didto sa langit tungod sa usa ka makasasala nga naghinulsol kay sa kasiyaman ug siyam ka tawo nga matarong nga wala magkinahanglan nga maghinulsol." O, pananglit usa ka babaye nga may napulo ka tagsa ka dako, kawad-an ug usa, unsa may iyang buhaton? Magdagkot siya ug suga ug manilhig sa iyang balay ug iya kining pangitaon pag-ayo hangtod nga makaplagan. Ug inigkakaplag niya niini, tawgon niya ang iyang mga higala ug mga silingan. Moingon siya kanila, 'Maglipay kita kay akong nakaplagan ang nawala kong usa ka dako!' Sa ingon usab niini, sultihan ko kamo nga mangalipay ang mga anghel sa Dios tungod sa usa ka makasasala nga maghinulsol."