Martes sa Ikakatloa'g Usa nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 2: 5-11

Angayng batonan ninyo ang hunahuna nga gibatonan ni Cristo Jesus nga mao kini: Diha niya kanunay ang kinaiya gayod sa Dios, apan wala siya maghunahuna pagpakigtupong sa Dios pinaagi sa kusog. Kondili sa iyang kaugalingong kabubut-on iya kining gibiyaan. Ug gisul-ob niya ang kinaiya sa usa ka sulugoon. Natawo siya sama kanato ug nakita siya ingon nga tawo; Nagpaubos siya ug nagmasinugtanon hangtod sa kamatayon—ang iyang kamatayon sa krus. Tungod niini gituboy siya sa Dios ngadto sa kinatas-ang dapit sa kalangitan, ug gihatagan siyag ngalan nga labaw sa tanang ngalan. Busa mangluhod ang tanang binuhat nga atua sa langit, sa yuta ug sa ilalom sa yuta; sa pagpasidungog sa ngalan ni Jesus. Ug ang tanan magsangyaw nga si Jesucristo mao ang Ginoo, alang sa himaya sa Dios nga Amahan.

SALMO RESPONSORYO

Ps. 22: 26-27. 28-30. 31-32

Daygon ko ikaw, Ginoo, diha sa pundok sa imong lungsod.

Tumanon ko ang akong mga panaad atubangan kanila nga mahadlokon sa Ginoo. Ang mapaubsanon mokaon hangtod mabusog, sila nga nangita sa Ginoo magdayeg kaniya; "Magsadya unta kanunay ang inyong mga kasingkasing."

Daygon ko ikaw, Ginoo, diha sa pundok sa imong lungsod.

Ang tanang kautlanan sa yuta mahinumdom ug modangop sa Ginoo; Ang tanang kabanayan sa mga nasod mohapa sa iyang atubangan. Kay iyaha sa Ginoo ang kamandoan, ug nagahari siya sa kanasuran. Kaniya lamang mohapa ang tanan nga nangamatay dinhi sa yuta.

Daygon ko ikaw, Ginoo, diha sa pundok sa imong lungsod.

Alang kaniya magpakabuhi ang akong kalag; ug ang akong mga anak mag-alagad kaniya. Ang umaabot nga kaliwat suginlan unta mahitungod sa Ginoo aron magsangyaw sila ngadto sa katawhan nga wala pa matawo. Sa katarong nga iyang gipakita.

Daygon ko ikaw, Ginoo, diha sa pundok sa imong lungsod.

PAGBASA SA SANTOS NGA EBANGHELYO SUMALA NI SAN LUKAS

Lk. 14: 15-24

Usa sa mga tawo nga nagtambong sa kan-anan nakadungog niini ug miingon siya kang Jesus, "Bulahan kadtong makatambong sa kan-anan didto sa Gingharian sa Dios!" Si Jesus miingon kaniya, "May tawo nga naghimog dakong kombira, ug daghang mga tawo ang iyang gidapit. Sa pag-abot na sa adlaw sa kombira, iyang gipadala ang iyang sulugoon aron pagpahibalo sa iyang mga dinapit nga andam na ang tanan. Apan namalibad ang tagsatagsa kanila. Ang una miingon sa sulugoon, 'Nakapalit akog yuta ug kinahanglan nga susihon ko kini; pasayloa nga dili ako makatambong.' Ang ikaduha miingon, 'Nakapalit akog lima ka parisan nga baka ug paingon ako ngadto aron sulayan sila; busa pasayloa nga dili ako makatambong.' Ug ang ikatulo miingon, 'Bag-o pa akong gikasal, busa dili ako makatambong.' Tungod niini, mipauli ang sulugoon ug gisuginlan niya sa tanan ang iyang agalon. Labihang sukoa sa iyang agalon ug miingon sa sulugoon, 'Lakaw pagdali ngadto sa mga kadalanan ug kasuok-suokan sa lungsod, ug dad-a nganhi ang mga kabus, ang mga bakol, ang mga buta, ug ang mga piang.' Wala madugay miingon ang sulugoon, 'Sir, natuman na ang imong sugo, apan may bakante pa.' Busa ang agalon miingon sa sulugoon, 'Lakaw ngadto sa kadalanan ug sa kasuokan nga gawas sa lungsod ug paanhia ang mga tawo aron mapuno ang akong balay. Sultihan ko kamo: walay usa niadtong una kong gidapit nga makatilaw sa akong kombira!'"