[M] Paghandum sa tanang mga Magtutuo nga Nangamatay
Ikatulong Misa
PAGBASA GIKAN SA BASAHON NI PROPETA ISAIAS
Is. 25: 6. 7-9
Niining bukira himoon sa Ginoo nga Labing Gamhanan alang sa tanang katawhan ang usa ka kombira sa mga lamiang pagkaon, ug labing maayong bino. Ug langkaton niya ang panganod sa kagul-anan nga nagpandong sa kanasoran. Wagtangon sa Ginoong Dios ang kamatayon, ug pahiran ang mga luha, ug papason niya ang kaulaw sa iyang katawhan; mao kini ang gisulti sa Ginoo. Ikaingon niadtong adlawa, "Siya mao ang atong Dios nga atong gilauman nga maoy moluwas kanato. Siya ang atong gipaabot; maglipay kita sa iyang pagluwas kanato."
ANG PULONG SA GINOO
SALMO RESPONSORYO
Ps. 42: 2. 3. 5; 43: 3. 4. 5
Ang akong kalag giuhaw sa buhi nga Dios: anus-a man ako makaatubang kaniya.
Sama sa lagsaw nga nangandoy sa nagadagan nga mga tubig, ang ako nga kalag nangandoy kanimo, O Dios.
Ang akong kalag giuhaw sa buhi nga Dios: anus-a man ako makaatubang kaniya.
Giuhaw ang akong kalag sa Dios, sa buhi nga Dios. Anus-a man ako moadto ug motan-aw sa nawong sa Dios?
Ang akong kalag giuhaw sa buhi nga Dios: anus-a man ako makaatubang kaniya.
Sa paglakaw nako uban sa pundok ug pagdala nako kanila diha sa pasunding ngadto sa balay sa Dios, taliwala sa makusog nga mga singgit sa kasadya ug pasalamat uban sa katawhan nga nagasaulog sa pangilin.
Ang akong kalag giuhaw sa buhi nga Dios: anus-a man ako makaatubang kaniya.
Ipadala ang imong kahayag ug ang imong kamatinumanon; sila ang magtultol kanako, ug magdala kanako ngadto sa imong balaang bukid, ngadto sa imong puloy-anan.
Ang akong kalag giuhaw sa buhi nga Dios: anus-a man ako makaatubang kaniya.
Unya moadto ako sulod sa altar sa Dios, sa Dios sa akong kalipay ug kasadya; Unya magpasalamat ako kanimo diha sa alpa, O Dios, akong Dios.
Ang akong kalag giuhaw sa buhi nga Dios: anus-a man ako makaatubang kaniya.
Nganong naguol ka man pag-ayo, O kalag ko? Nganong naghupaw ka man sa kasakit? Laum sa Dios, kay pasalamatan ko siya pag-usab, diha sa atubangan sa akong manunubos ug akong Dios.
Ang akong kalag giuhaw sa buhi nga Dios: anus-a man ako makaatubang kaniya.
PAGBASA GIKAN SA UNANG SULAT NI SAN PABLO NGADTO SA TAGA-CORINTO
1 Cor. 15: 20-24. 25-28
Ang tinuod mao nga gibanhaw si Cristo, ingon nga pasalig nga kadtong nangamatay banhawon usab. Kay ingon nga miabot ang kamatayon pinaagi sa usa ka tawo, moabot usab ang pagkabanhaw pinaagi sa usa ka tawo. Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Cristo. Apan ang matag usa anaa sa iyang husto nga dapit: si Cristo maoy una sa tanan, unya mosunod kadtong iya ni Cristo inig-abot na niya. Unya moabot ang kataposan ug buntogon ni Cristo ang tanang pangulo nga espirituhanon, mga awtoridad, mga kagamhanan, ug itugyan niya ang Gingharian ngadto sa Dios nga Amahan. Kay kinahanglan maghari si Cristo hangtod mabuntog sa Dios ang tanan niyang mga kaaway ug himoon sila nga tumbanan sa iyang mga tiil. Ang kataposang kaaway nga buntogon mao ang kamatayon. Kay ang Kasulatan nag-ingon, "Himoon sa Dios ang tanang butang nga tumbanan sa iyang mga tiil." Hinuon, tataw kaayo nga niini wala mahilakip ang Dios nga naghimo sa tanang butang nga tumbanan ni Cristo. Apan kon ang tanang butang ipailalom na sa pagmando ni Cristo, ang Anak mismo harian sa Dios nga maoy nagtugyan sa tanan ubos sa iyang pagmando, ug maghari ang Dios sa tanan sa hingpit gayod.
ANG PULONG SA GINOO
PAGBASA SA SANTOS NGA EBANGHELYO SUMALA NI SAN JUAN
Jn. 11: 17-27
Sa pag-abot ni Jesus, nasayran niya nga si Lazaro upat na ka adlaw didto sa lubnganan. Ang Betania mga tulo ka kilometro lamang gikan sa Jerusalem, ug daghang mga Judio miduaw kang Marta ug kang Maria aron paghupay sa ilang kaguol gumikan sa kamatayon sa ilang igsoon. Sa pagkabalita ni Marta nga taliabot si Jesus, migula siya aron pagsugat kaniya; apan nagpabilin sa balay si Maria. Si Marta miingon kang Jesus, "Kon dinhi ka pa lamang, Ginoo, dili unta mamatay ang akong igsoon! Hinuon, nasayod ako nga bisan karon mohatag ang Dios kanimo bisag unsay imong pangayoon." Si Jesus miingon kaniya, "Mabanhaw ang imong igsoon." Siya mitubag, "Nahibalo ako nga mabanhaw siya sa kataposang adlaw." Ug si Jesus miingon kaniya, "Ako ang pagkabanhaw ug ang kinabuhi. Ang nagtuo kanako, bisan tuod mamatay, mabuhi; ug ang tanan nga buhi ug nagtuo kanako dili gayod mamatay. Mituo ka ba niini?" Ug siya mitubag, "Oo, Ginoo, mituo ako nga ikaw ang Mesiyas, ang Anak sa Dios, nga moanhi sa kalibotan."
ANG EBANGHELYO SA GINOO
