[M] Paghandum sa tanang mga Magtutuo nga Nangamatay

PAGBASA GIKAN SA BASAHON SA KAALAM NI SOLOMON

Wis. 3: 1-9

Ang kalag sa mga matarong nga mga tawo panalipdan sa Dios ug dili gayod mag-antos sa kasakit. Usa ka binoang nga sayop ang panghunahuna nga ang mga matarong nga mga tawo mamatay ug nga ang ilang kamatayon usa ka makalilisang kadaot. Ila kitang biyaan, apan dili kini usa ka kadaot. Sa pagkatinuod, ang matarong anaa sa kalinaw. Daw nag-antos sila sa silot, apan naghupot diay sila sa masaligong paglaom sa pagkawalay kamatayon. Ang ilang mga giantos gamay ra kon itandi sa mga kabulahanan nga ilang pagadawaton. Ang Dios nagsulay kanila, ingon sa bulawan diha sa usa ka hasohasoan, ug hikaplagan sila nga angay sa pagpakig-uban kaniya. Gidawat niya sila maingon sa iyang pagdawat sa mga sakripisyo nga sunogon didto sa altar sa mga nagsimba kaniya. Sila nga nagsalig sa Dios moabot sa pagsabot sa kamatuoran sa iyang mga paagi. Sila nga nagmatinumanon kaniya magpuyo uban kaniya diha sa iyang gugma, kay siya maayo ug maluluy-on kanila nga iyang gipili.

SALMO RESPONSORYO

Ps. 115: 5. 6; 116: 10-11. 15-16

Molakaw ako diha sa atubangan sa Ginoo.

Duna silay mga baba apan dili makasulti; Duna silay mga mata apan dili makakita; duna silay mga dalunggan apan dili makadungog; duna silay mga ilong apan dili makapanimaho.

Molakaw ako diha sa atubangan sa Ginoo.

Mituo ako bisan kon niingon ako, "Nasakit ako pag-ayo;" Miingon ako sa akong kalisang, "Walay tawo nga kasaligan."

Molakaw ako diha sa atubangan sa Ginoo.

Bililhon sa mga mata sa Ginoo ang kamatayon sa iyang buotang mga alagad. O Ginoo, imo ako nga alagad; imong gilugit ang akong mga talikala.

Molakaw ako diha sa atubangan sa Ginoo.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 6: 3-4. 8-9

Nasayod kamo nga sa pagbunyag kanato nahiusa kita kang Cristo Jesus, busa nahiusa kita sa iyang kamatayon. Tungod niini, sa pagbunyag kanato gilubong kita uban kaniya ug miambit sa iyang kamatayon, aron ingon nga si Cristo gibanhaw sa mahimayaong gahom sa Amahan, kita usab magpuyo diha sa bag-ong kinabuhi. Kon namatay kita uban kang Cristo, gituohan nato nga mabuhi usab kita uban kaniya. Kay nasayod kita nga si Cristo gibanhaw ug dili na gayod siya mamatay pag-usab, ug ang kamatayon wala nay gahom kaniya.

PAGBASA SA SANTOS NGA EBANGHELYO SUMALA NI SAN JUAN

Jn. 6: 37-40

Si Jesus miingon ngadto sa katawhan, "Ang tanan nga gihatag kanako sa akong Amahan moari kanako. Ug ang moari kanako dili ko gayod isalikway, kay nanaog ako gikan sa langit aron pagbuhat sa kabubut-on sa nagpadala kanako, ug dili sa kaugalingon kong kabubut-on. Kini mao ang kabubut-on sa nagpadala kanako; nga dili ako kawad-an bisag usa sa tanan nga iyang gihatag kanako, ug banhawon ko silang tanan sa katapusang adlaw. Kay kini mao ang kabubut-on sa akong Amahan: nga ang tanan nga makakita sa Anak ug motuo kaniya makabaton sa kinabuhing walay katapusan ug banhawon ko sila sa katapusang adlaw."