[M] Paghandum sa tanang mga Magtutuo nga Nangamatay
Unang Misa
PAGBASA GIKAN SA IKADUHANG BASAHON SA MGA MACABEO
2 Mc. 12: 43-45
Nagpaamot si Judas gikan sa tanan niyang mga tawo, nga mikabat og duha ka libo ka salapi nga plata, ug gipadala kini ngadto sa Jerusalem aron gamiton alang sa usa ka halad alang sa sala. Si Judas naghimo niining hamili nga butang tungod kay nagtuo siya sa pagkabanhaw. Kon wala pa siya magtuo nga ang patay mabanhaw, usa unta ka butang nga binoang ug walay kapuslanan ang pag-ampo alang kanila. Niining malig-on ug diosnon nga hunahuna nga ang tanang mga tawo nga nagtuo sa Dios makadawat ug usa ka ganti nga katingalahan, si Judas nangandam alang sa usa ka halad alang sa sala aron malingkawas sa ilang mga sala sila nga nangamatay.
ANG PULONG SA GINOO
SALMO RESPONSORYO
Ps. 103: 8. 10. 13-14. 15-16. 17-18
Ang Ginoo maayo ug maluluy-on.
Maluluy-on ug maayo ang Ginoo, dugayng masuko ug puno sa kaayo. Dili sumala sa atong mga sala nagdumala siya kanato ni nagbalos siya kanato sumala sa atong kasal-anan.
Ang Ginoo maayo ug maluluy-on.
Maingon nga ang usa ka amahan naluoy sa iyang mga anak sa ingon naluoy ang Ginoo kanila nga mahadlokon kaniya. Kay nasayod siya giunsa kita pagbuhat; nahinumdom siya nga kita abog lamang.
Ang Ginoo maayo ug maluluy-on.
Ang mga adlaw sa tawo ingog mga adlaw sa balili; sama sa usa ka bulak sa uma mobuklad siya; Ang hangin mohuros ibabaw kaniya ug mahanaw siya, ug wala nay masayod sa iyang luna.
Ang Ginoo maayo ug maluluy-on.
Apan ang kaluoy sa Ginoo gikan sa kahangturan ngadto sa kahangturan alang kanila nga mahadlokon kaniya, ug ang iyang katarong alang sa mga anak sa mga anak diha kanila nga nagaamping sa iyang kasabotan ug nahinumdom sa pagtuman sa iyang mga sugo.
Ang Ginoo maayo ug maluluy-on.
PAGBASA GIKAN SA SULAT NI SAN PABLO NGADTO SA TAGA-ROMA
Rom. 8: 31-35. 37-39
Karon nga ato nang nasayran kini, unsa may atong ikaingon? Kon dapig kanato ang Dios, kinsay makigbatok kanato? Kon wala magdumili ang Dios pagtugyan sa iyang Anak ngadto sa kamatayon tungod kanatong tanan, dili ba hatagan kita niya sa tanang butang nga atong pangayoon kaniya? Kinsay mangahas pagsumbong sa mga piniling katawhan sa Dios? Ang Dios mismo nag-ila kanila nga walay sala. May makahukom ba kanila nga sila sad-an? Si Cristo Jesus mao ang nagpakamatay ug gibanhaw; atua siya sa tuo sa Dios ug nangaliyupo alang kanato! Busa, kinsay makapahimulag kanato sa gugma ni Cristo? Ang kasamok ba, ang kalisdanan, ang mga paglutos, ang gutom, ang kakabos, ang katalagman, o ang kamatayon? Dili! Hinunoa, taliwala niining tanan, may hingpit kitang kadaogan pinaagi kaniya nga nahigugma kanato! Kay siguro ako nga walay bisan unsa nga makapahimulag kanato sa iyang gugma; bisan ang kamatayon, ni ang kinabuhi, ni ang mga anghel, ni ang mga langitnong punoan o mga gahom, ni ang mga butang karon ug sa umaabot nga kapanahonan; bisan ang kalibotan sa itaas o sa ilalom—wala gayoy bisan unsa sa mga binuhat nga makapahimulag kanato sa gugma sa Dios nga naato pinaagi sa atong Ginoong Cristo Jesus.
ANG PULONG SA GINOO
PAGBASA SA SANTOS NGA EBANGHELYO SUMALA NI SAN JUAN
Jn. 14: 1-6
Si Jesus miingon sa iyang mga tinun-an, "Ayaw kamog kaguol. Salig kamo sa Dios ug salig usab kanako. Sa balay sa akong Amahan adunay daghang mga lawak, ug moadto ako aron pag-andam og dapit alang kaninyo. Kon dili pa kini tinuod, dili ko unta kamo sultihan niini. Ug kon atua na ako didto ug makaandam nag dapit alang kaninyo, mobalik ako ug kuhaon ko kamo aron bisag asa ako, atua usab kamo. Nahibalo kamo unsaon pag-adto sa dapit nga akong adtoan." Apan si Tomas miingon kaniya, "Ginoo, wala kami mahibalo kon asa ka paingon, busa unsaon man namo pagkatultol sa dalan?" Si Jesus mitubag, "Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako."
ANG EBANGHELYO SA GINOO
