Sabado sa Ikakatloan nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 1: 18-26

Gikalipay ko kini basta lang isangyaw si Cristo sa bisan unsang paagi, hiwi o matarong ang tuyo. Ug magpadayon ako pagkalipay, kay nasayod ako nga tungod sa inyong mga pag-ampo ug sa panabang sa Espiritu ni Jesucristo, buhian gayod ako. Ang dako kong tinguha ug paglaum mao nga dili ko gayod pakyason pagtuman ang akong katungdanan, kondili magmaisog ako sa tanang panahon, labi na gayod ning panahona aron makapasidungog ako kang Cristo, buhi ako o patay. Kay alang kanako ang kinabuhi mao si Cristo, ug ang kamatayon maghatag kanakog dugang kaayohan. Apan kon buhi ako, makahimo akog mas mapuslanon nga buhat, busa wala ako masayod hain niini ang akong pilion. Naglibog gayod ako kon unsay akong pilion. Buot ako mobiya ning kinabuhia ug makig-uban kang Cristo, nga mas maayo alang kanako; apan labi pang maayo alang kaninyo nga buhi ako. Nasiguro ko nga dili pa ako mamatay kondili magpabilin pa uban kaninyong tanan aron makatabang alang sa inyong kauswagan ug kalipay diha sa pagtuo. Busa kon mahiuban na usab ako kaninyo, mas makapasigarbo kamo kanako diha ni Cristo Jesus.

SALMO RESPONSORYO

Ps. 42: 2. 3. 5

Ang akong kalag giuhaw sa buhi nga Dios.

Ingon nga ang lagsaw nangandoy sa nagdagan nga mga tubig, ang akong kalag nangandoy usab kanimo, O Dios.

Ang akong kalag giuhaw sa buhi nga Dios.

Ang akong kalag giuhaw sa Dios, ang buhing Dios. Anus-a man ako moadto ug mosud-ong sa nawong sa Dios?

Ang akong kalag giuhaw sa buhi nga Dios.

Milakaw ako uban sa panon sa katawhan ug giunahan ko sila diha sa pasunding ngadto sa balay sa Dios. Taliwala sa masipa nga mga singgit sa kasadya ug sa pasalamat, uban sa katawhan nga nagasaulog sa pangilin.

Ang akong kalag giuhaw sa buhi nga Dios.

PAGBASA SA SANTOS NGA EBANGHELYO SUMALA NI SAN LUKAS

Lk. 14: 1. 7-11

Usa niana ka Adlawng Igpapahulay miadto si Jesus sa balay sa usa sa mga inilang Pariseo aron mokaon, ug ang mga tawo naniid pag-ayo kaniya. Namatikdan ni Jesus nga dihay pipila sa mga bisita nga nagpili sa labing pinasidunggang dapit sa kan-anan, busa iyang gisulti kining sambingaya ngadto kanilang tanan: "Kon dapiton gani kamo pagtambong sa usa ka kombira sa kasal, ayaw kamo paglingkod sa labing pinasidunggang dapit sa kan-anan kay tingali unyag may laing dinapit nga labi pang importanti kay kanimo, ug ang nagdapit kaninyong duha moduol ug moingon kanimo, 'Siyay palingkora diha'. Unya maulawan ka ug mapugos paglingkod sa labing ubos nga dapit. Hinonoa, kon dapiton ka, adto lingkod sa labing ubos nga dapit, aron ang nagdapit kanimo moduol ug moingon: 'Higala, balhin ngari sa pinasidunggang dapit.' Sa ingon niini, kapasidunggan ka atubangan sa tanang dinapit. Kay kadtong magpataas ipaubos, ug ang magpaubos ipataas."